ސްޕެނިޝް ސުޕަކަޕްގެ ފުރަތަމަ ލެގުން ރެއާލް އަތުން ބަލިވި ނަމަވެސް މިރޭ ކުޅޭ ދެ ވަނަ ލެގް މެޗުގައި ނަތީޖާ އަނބުރާ ލެވޭނެ ކަމަށާއި، އެކަމަށް ބާސެލޯނާ މިހާރު އޮތީ ތައްޔާރަށް ކަމަށް ބާސާގެ ކޯޗް އެރުނެސްޓޯ ވަލްވެރުޑޭ ބުނެފި އެވެ.

މިރޭ ކުޅޭ ސްޕެނިޝް ސްޕަ ކަޕްގެ ދެ ވަނަ ލެގްގައި ރެއާލްއާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަމުން، ވަލްވެރުޑޭ ބުނީ ބާސާ އަކީ ދުނިޔޭގައި އޮތް އެންމެ ވަރުގަދަ އެއް ޓީމު ކަމަށާއި އެގޮތުން 1-3 ގެ ނަތީޖާއަކީ އަނބުރާލެވޭނެ ނަތީޖާއެއް ކަމަށެވެ.

ރެއާލް އަކީ ބާސެލޯނާއަށް ވުރެ ވަރުގަދަ ޓީމެއް ކަމަށް ގަބޫލް ނުކުރާ ކަމަށާއި ނަތީޖާއެއް އަނބުރާ ލުމަކީ ބާސާއަށް ނުވާނެ ކަމެއް ނޫން ކަމަށެވެ.

" އަހަރެން ގަބޫލްކުރަން ފުރަތަމަ މެޗުގައި ރެއާލް ވަރުގަދަ ކަމަށް. އަދި މޮޅަށް ކުޅެފައިވަނީވެސް ރެއާލް ކަމަށް. ނަމަވެސް އެރޭގެ ނަތީޖާ އަކީ ބަދަލުކޮށް ނުލެވޭނެ ނަތީޖާއެއް ނޫން. ފާއިތުވި އަހަރުތަކުގައި ބާސެލޯނާއިން ވަނީ މިފަދަ ނަތީޖާތައް އަނބުރާލާ އެއީ ވެދާނެކަމެއް ކަން ދައްކަދީފަ." ބާސާގެ ކޯޗު ވަލްވެރުޑޭ ބުންޏެވެ.

ވަލްވެރުޑޭ ބުނީ މިކަން މިގޮތަށް ވާނީ ރެއާލުން އުފައްދާ ކައުންޓާ އެޓޭކްތައްވެސް ހުއްޓުވައިގެން ގޯލް ޖަހައިގެން ކަމަށާއި އެހެން ނޫން ގޮތަކަށް އެކަން ކާމިޔާބު ނުވާނޭ ކަމަށެވެ.

އޭނާ ބުނީ ރެއާލްގައި ތިބީ މުޅިންވެސް މޮޅެތި ކުޅުންތެރިން ކަމަށާއި އެގޮތުން މޮޅުވަން ކުރަންޖެހޭ މަސައްކަތް ބޮޑުވާނޭކަމަށެވެ.

ބާސާއިން ދަނީ ޓީމު އިތުރަށް ވަރުގަދަ ކުރުމަށްޓަކައި ކުޅުންތެރިން އެޓީމަށް ގެނައުމަށް ބުރަ މަސައްކަތްތަކެއް ކުރަމުންނެވެ. އެގޮތުން އެޓީމުން އެންމެ ބޮޑަށް މ،ަސައްކަތް ކޮށްފައިވަނީ ލިވަޕޫލްގެ ބްރެޒިލްގެ މިޑްފީލްޑާ ފިލިޕޭ ކުޓީނިއޯ އާއި ބޫރުޝިއާ ޑޯޓަމުންޑްގެ ފްރާންސްގެ އުސްމާން ޑެމެބެލޭ ގެނައުމަށެވެ. އެހެން ނަމަވެސް އެކަން ނާކާމިޔާބުވުމުން އެޓީމުން ވަނީ މިއަދު ބްރެޒިލްގެ މިޑްފީލްޑާ ޕައުލީނިއޯގެ ސޮއި ހޯދާފައެވެ.

މިރޭގެ މެޗަށް ބާސާއާ ދެކޮޅަށް ރެއާލް ނިކުންނައިރު އެޓީމުގެ އިތުބާރު ފޯވާޑް ކްރިސްޓިއާނޯ ރޮނާލްޑޯއަށް ނުކުޅެވޭނެއެވެ. އޭނާއަށް ނުކުޅެވެނީ  ބާސާގެ ދަނޑުގައި ކުޅުނު ފުރަތަމަ ލެގުގެ މެޗުގައި ރޮނާލްޑޯ އަށް ރަތް ކާޑު ދެއްކުމުން، އޭނާ، އެމެޗުގެ ރެފްރީގެ ބުރަކަށީގައި އަތް އަޅާ ކޮށްޕާލުމުގެ ސަބަބުން ރޮނާލްޑޯ ފަސް މެޗަށް ސަސްޕެންޑް ކުރުމުންނެވެ.

އެހެން ނަމަވެސް ކުރީ މެޗުގައި ނުކުޅެވުނު ލުކަ މޮޑްރިޗް މިރޭގެ މެޗުގައި ކުޅޭނެއެވެ.