ގައުމީ ޓީމަށް ދިއުމަށް މާކޭޒް ބާސެލޯނާ ދޫކޮށްލަނީ

މެކްސިކޯގެ ގައުމީ ފުޓްބޯޅަ ޓީމުގެ އެސިސްޓެންޓް ކޯޗު ކަމާ ހަވާލުވުމަށް، ބާސެލޯނާގެ ބީ ޓީމުގެ ކޯޗު ރަފޭލް މާކޭޒް ކުލަބު ދޫކޮށްލަން ނިންމައިފި އެވެ.

ބާސެލޯނާ އަށް 2003ން 2010ށް ކުޅެދިން އިތުބާރު ޑިފެންޑަރު މިހާތަނަށް ބެލެވެމުން އައީ ކުރިމަގުގައި ސީނިއާ ޓީމާ ހަވާލުވުން އެންމެ ގާތް އެއް ކޯޗުގެ ގޮތުގަ އެވެ. ސަބަބަކީ އޭނާއަށް ކުލަބުގެ ރައީސް ހުއާން ލަޕޯޓާ ވަރަށް ބޮޑަށް އިތުބާރުކޮށް، ޖޫނިއާ ޓީމުގެ ހުރިހާ ކަމެއް ދޫކޮށްލާފައިވުމުންނެވެ. މިހެންވެ މާކޭޒް ކުލަބު ދޫކޮށްލަން ނިންމުމަކީ މާލީ މައްސަލަތަކެއްގެ ތެރޭގައި އޮތް ބާސެލޯނާ އަށް ކުރިމަތިވާނެ އިތުރު މައްސަލައެއް ކަމަށް ގިނަ ބަޔަކު ދެކެ އެވެ. ސަބަބަކީ އާ ކޯޗަކު ހޯދައި ޓީމުގެ ކަންކަން ދަސްކުރަން ވަގުތު ނެގުމާއި ޖޫނިއާ ޓީމާ ހަވާލުވާނެ ރަނގަޅު ކޯޗަކު ހޯދުމަށް ބާސެލޯނާ އަށް ވަގުތު ބޭނުންވާނެތީ އެވެ.

އުމުރުން މިހާރު 45 އަހަރުގެ މާކޭޒް އަކީ 1997ން 2018ށް މެކްސިކޯ އަށް ކުޅެ ގައުމީ ކެޕްޓަންކަން ކޮށްފައިވާ އެ ގައުމު ދުށް އެންމެ މޮޅު ޑިފެންޑަރެވެ. އޭނާ ވަނީ ގައުމީ ޓީމަށް 147 މެޗު ކުޅެދީ 17 ގޯލު ވެސް ޖަހައިދީފަ އެވެ. މެކްސިކޯއިން މާކޭޒް އެ ގައުމުގެ އެސިސްޓެންޓް ކޯޗަކަށް ގެންދިއުމުގެ ބޭނުމަކީ ދުވަސްކޮޅެއް ފަހުން އޭނާ އަށް ގައުމީ ކޯޗުކަން ދިނުމެވެ. މި ގޮތުން މިހާރުގެ ޕްލޭނަކީ މިހާރުގެ ކޯޗު ޖިމީ ލޮޒާނޯއާއެކު މަސައްކަތް ކުރުމަށްފަހު 2026 ވަނަ އަހަރުގެ ވޯލްޑްކަޕަށް ފަހު މާކޭޒަށް ގައުމީ ކޯޗުކަން ދިނުމެވެ. ސްޕޭނުގައި 2030 ވަނަ އަހަރު ބާއްވާ ވޯލްޑްކަޕަށް މެކްސިކޯގ ގައުމީ ޓީމު ތައްޔާރުކުރުމުގެ ޒިންމާ ދޭނީ މާކޭޒަށެވެ.

ބާސެލޯނާގެ ޔޫތު އެކަޑަމީ އަކީ ދުނިޔޭގެ އެންމެ ނަން ހިނގާ އެންމެ މަޝްހޫރު އެކަޑަމީ އެވެ. މިތަނުގައި ހުރުމަށްފަހު މާކޭޒް ފަދަ ކުލަބުގެ މުހިންމު ލެޖެންޑަކު ކުއްލި ގޮތަކަށް ވަކިވުމަކީ މިހާރުގެ މެނޭޖްމަންޓަށް ކުރިމަތިކުރުވި އިތުރު ޕްރެޝަރެއް ކަމަށް ވެސް ސްޕޭނުގެ ނޫސްތަކުން ބުނެ އެވެ. ސަބަބަކީ 2026 ވަނަ އަހަރުގެ ކުރީކޮޅު ބާއްވާ ބާސެލޯނާގެ އިންތިހާބުގައި މިހާރުގެ ރައީސް ހުއާން ލަޕޯޓާއާ ވާދަކުރަން ގިނަ ބަޔަކު ތައްޔާރުވަމުން ދިއުމެވެ.