ސްޕޭނުގެ ކެޕްޓަން އަލްވާރޯ މޮރާޓާ ޔޫރޯ ފައިނަލް މެޗުގައި ކުޅޭނެ ކަމަށް އޭނާގެ ގައުމުން ބުނެފި އެވެ.
އިނގިރޭސިވިލާތާ ދެކޮޅަށް މާދަމާ ރޭ ކުޅޭ ފައިނަލް މެޗުގައި މޮރާޓާ އަށް ނުކުޅެވިދާނެ ކަމަށް ލަފާކުރެވުނީ ސެމީ ފައިނަލް މެޗަށް ފަހު އުފާފާޅު ކުރަނިކޮށް ޓީމުގެ ސެކިއުރިޓީ އޮފިސަރެއްގެ ފައިން ޖެހިފައި އޭނާ ވެއްޓުމުންނެވެ. ކުރިން ބެލެވުނީ މޮރާޓާގެ ފައިގެ ކަށިގަނޑެއްގައި ރެނދުލާފައިވާ ކަމަށެވެ. ނަމަވެސް ހޮނިހިރު ދުވަހު ހެދި މެޑިކަލް ޓެސްޓްތަކަށް ފަހު ސްޕޭނުގެ ގައުމީ ޓީމުން ބުނީ މޮރާޓާ އަށް ކުޅެވޭނެ ކަމަށެވެ.
އޭނާ އަށް ކުޅެވޭނެކަން ޔަގީން ވެފައިވާއިރު ޓީމުގައި އިތުރު އަނިޔާގެ މައްސަލައަކަށް އޮތީ މިޑްފީލްޑަރު ޕެޑްރީ ގޮންޒާލޭޒްގެ އަނިޔާ އެކަންޏެވެ. ކުއާޓާ ފައިނަލްގައި ޖަރުމަނާ ދެކޮޅަށް ކުޅެނިކޮށް ލިބުނު އަނިޔާގެ ސަބަބުން ޕެޑްރީ އަށް ފައިނަލް މެޗުގައި ނުކުޅެވޭނެ އެވެ.
ސްޕޭން ޓީމުގައި އަނިޔާގެ ކުދިކުދި މައްސަލަ ހުއްޓަސް އިދިކޮޅަށް ނުކުންނަ އިނގިރޭސި ޓީމުގައި މި ފަދަ އެއްވެސް މައްސަލައެއްނެތެވެ.
