މޮރާޓާ ހޯދުމަށް އޭސީ މިލާނުން 60 މިލިއަން ޔޫރޯގެ ބިޑެއް ހުށަހަޅައިފި

ރެއާލް މެޑްރިޑަށް ކުޅެމުން އަންނަ ސްޕެއިންގެ ފޯވާޑް އަލްވަރޯ މޮރާޓާ ހޯދުމަށް އޭސީ މިލާނުން 60 މިލިއަން ޔޫރޯގެ ބިޑެއް ހުށަހަޅާފައިވާ ކަމަށް ރިޕޯޓްތައް ބުނެފި އެވެ.

އިޓަލީގެ ނޫސްތަކުން ބުނާގޮތުން މޮރާޓާ އަށް މިލާނުން ފާރަލަމުން އަންނަތާ ދުވަސްތަކެއް ވެއްޖެއެވެ. އެގޮތުން ކުރިޔަށް އޮތް ސީޒަނަށް އަމާޒުކޮށް އެޓީމުން ހޯދުމަށް އެންމެ މަސައްކަތްކުރާ ކުޅުންތެރިޔަކީވެސް މޮރާޓާ ކަމަށް ރިޕޯޓްތައް ބުނެއެވެ.

މޮރާޓާ ހޯދުމަށް އޭސީ މިލާންގެ އިތުރުން އެހެން ކްލަބްތަކުންވެސް އަންނަނީ މަސައްކަތްކުރަމުންނެވެ. އެގޮތުން އާސެނަލް އިން އޭނާ ހޯދުމަށް 50 މިލިއަން ޕައުންޑޫގެ ބިޑެއް ތައްޔާރުކުރަމުން އަންނަ ކަމަށްވެސް ރިޕޯޓްތައް ބުނެއެވެ.

ރެއާލް މެޑްރިޑްގެ ފުރަތަމަ އެގާރައިން ޖާގަ ލިބުން ދަތިވެފައިވާ މޮރާޓާ މި ސީޒަނަށްފަހު ރެއާލް ދޫކޮށްލާނެ ކަމަށް ރިޕޯޓްތައް ބުނަމުން އަންނަ އިރު، ރެއާލް އިން އަންނަނީ އެޓްލެޓިކޯ މެޑްރިޑްގެ ސްޓްރައިކަރު އެންޓޯނިއޯ ގްރިޒްމަން ހޯދަންވެސް މަސައްކަތްކުރަމުންނެވެ.

މީގެއިތުރުން އާސެނަލްއާއެކު ސްޓްރައިކަރު އެލެކްސަސް ސަންޗޭޒް ހަދާފައިވާ އެއްބަސްވުން އިތުރުކުރާނެކަން އަދިވެސް ކަށަވަރުނުވާއިރު، އެ ކްލަބުން އަންނަނީ ސްޓްރައިކަރުން އިތުރުކުރުމަށް ވިސްނަމުން ކަމަށްވެސް ރިޕޯޓްތައް ބުނެއެވެ. އެގޮތުން އެ ކްލަބަށް ކުރިޔަށް އޮތް ސީޒަނަށް ކޯޗު އާސެން ވެންގާ ގެންނަން އެންމެ ބޭނުންވަނީ މޮރާޓާ ކަމަށްވެސް ރިޕޯޓްތައް ބުނެއެވެ.

ރެއާލް މެޑްރިޑް ޔޫތް ޓީމުން ކެރިޔަރު ފެށި މޮރާޓާ އެ ކްލަބްގެ ސީނިއާ ޓީމަށް ކުޅެން ފެށީ 2010 ވަނަ އަހަރެވެ. އެގޮތުން އޭނާ ވަނީ އެ ކްލަބުގައި ހަތަރު ސީޒަން ހޭދަކޮށް ކުޅުނު 52 މެޗުގައި 11 ލަނޑު ކާމިޔާބުކޮށްފައެވެ.

ރެއާލް ދޫކޮށްލުމަށްފަހު މޮރާޓާ ޔުވަންޓަސް އަށް 2014 ވަނަ އަހަރު ބަދަލުވެފައިވާއިރު، އެ ކްލަބުގައި ދެ ސީޒަން ވަނީ ހޭދަކޮށްފައެވެ. އެގޮތުން އޭނާ ވަނީ އެޓީމަށް ކުޅުނު 94 މެޗުގައި 31 ލަނޑު ކާމިޔާބުކޮށް، އެޓީމާއެކު އިޓާލިއަން ލީގު ދެފަހަރު، އިޓާލިއަން ކަޕް ދެފަހަރު ކާމިޔާބުކޮށްފައެވެ. މީގެއިތުރުން އޭނާ ވަނީ އިޓާލިއަން ސުޕާކަޕްގެ ދެވަނަ އަދި ޔުއެފާ ޗެމްޕިއަންސް ލިގުގެ ދެވަނަ ވެސް ޔުވަންޓަސްއާއެކު ކާމިޔާބުކޮށްފައެވެ.

ޔުވަންޓަސް ދޫކޮށްލުމަށްފަހު މޮރާޓާ ރެއާލް އަށް ބަދަލުވީ މި ސީޒަނުގައެވެ. އެގޮތުން އޭނާ ވަނީ މިވީތަނަށް މި ސީޒަނުގައި އެޓީމަށް ކުޅުނު 40 މެޗުގައި 20 ލަނޑު ކާމިޔާބުކޮށްފައެވެ.