ސެމީ ފައިނަލްގައި ދެ މެޑްރިޑުގެ ކުރިމަތިލުމެއް

ޗެމްޕިއަންސް ލީގުގެ ސެމީ ފައިނަލުގައި، ރެއާލް މެޑްރިޑާ ދެކޮޅަށް އެތްލެޓިކޯ މެޑްރިޑް ކުޅޭ ގޮތަށް ހަމަޖެހިއްޖެއެވެ.

މުބާރާތުގެ ސެނީފައިނަލުގެ ގުރު ނަގައިގެން ރެއާލް މެޑްރިޑް އާއި އެތްލެޓިކޯ މެޑްރިޑް ކުޅެން ޖެހިފައި ވާއިރު ޖުވެންޓަސްއަށް ދެކޮޅަށް ނިކުންނަން ޖެހޭނީ މޮނާކޯ އަށެވެ.

ރެއާލް އާއި އެތްލެޓިކޯ ވަނީ ފާއިތުވި ތިން ސިޒަނުގައިވެސް މި މުބާރާތުގެ ނޮކްއައުޓް ސްޓޭޖުގައި ބައްދަލުކޮށްފަ އެވެ. އެއިން ކޮންމެ ފަހަރަކުވެސް ވާދަވެރި ކުޅުމަކަށްފަހު ރެއާލް މެޑްރިޑް ވަނީ ކާމިޔާބުހީދާފަ އެވެ. ފާއިތުވި ސީޒަނުގައި މި މުބާރާތުގެ ފައިނަލުގައި ރެއާލް އިން އެތްލެޓިކޯގެ މައްޗަށް ކުރިހޯދީ ޕެނަލްޓީ ޖަހައިގެންނެވެ.

ސެމީފައިނަލުގެ ފުރަތަމަ ލެގުގެއި މިދެޓީމް ނިކުންނަން ޖެހޭނީ ރެއާލް ގެ ދަނޑުގައި އަންނަ މަހުގެ 2 ވަނަ ދުވަހު އެވެ. ދެވަނަ ލެގުގައި އެތްލެޓިކޯ ދަނޑުގައި ކުޅޭމެޗް އޮންނާނީ އަންނަ މަހުގެ 10 ވަނަ ދުވަހު އެވެ.

ސެމީގައި ދެން ވާދަކުރާ ޖުވެންޓަސް އާއި މޮނާކޯގެ މެޗަށް ބަލާއިރު މި ކުރިމަތިލުން ޖުވެންޓަސްއިން ކާމިޔާބު ކުރާނެ ކަމަށް ގިނަ ފަރާތްތަކަކުން އަންނަނީ ބުނަމުންނެވެ. ޖުވެންޓަސްއިން ސެމޯގެ ޖާގަ ކަށަވަރުކުރީ ސްޕެއިނުގެ ގަދަބާރު ބާސެލޯނާ ކަޓުވާލިމަށް ފަހު އެވެ. މޮނާކޯ ސެމީފައިނަލުން ޖާގަ ހޯދީ ބޮރޫޝިއާ ޑޯޓްމަންޑުގެ މައްޗަށް ކުރިހޯދައިގެންނެވެ.

މިދެޓީމް ކުޅޭ ފުރަތަމަ ލެގު އޮންނާނީ މޮނާކޯގެ ދަނޑުގައި އަންނަ މަހުގެ 3 ވަނަ ދުވަހުއެވެ. ޖުވެންޓަސް ގެ ދަނޑުގައި ކެޅޭ ދެވަނަ ލެގުގެ މެޗު އޮންނާނީ އަންނަ މަހުގެ 9 ވަނަ ދުވަހު އެވެ.

މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ ޖޫން މަހުގެ 3 ވަނަ ދުވަހު، ވޭލްސް ގެ ނޭޝަނަލް ސްޓޭޑިއަން ކަމައްވާ ކާޑިފް ގައެވެ.