މިއަހަރު ދެން އިތުރު އެއްވެސް ޓެނިސް މުބާރާތެއް ނުކުޅޭނެ ކަމަށް ސެރީނާ ވިލިއަމްސް ބުނެފިއެވެ.

ދުނިޔޭގެ ދެވަނަ އަންހެން ޓެނިސް ކުޅުންތެރިޔާ އެމެރިކާގެ ސެރީނާ، މިއަހަރު އިތުރު މުބާރާތެއް ނުކުޅޭނެކަން އިއުލާން ކޮށްފައިވަނީ އޭނާ ކުރި ސްނެޕެއްގައެވެ.

ލޯގަނޑެއްގެ ކުރިމަތީގައި ހުރެގެން ސެރީނާ ކުރި ސްނެޕެއްގައި ބުނެފައިވަނީ އޭނާ ބަނޑުބޮޑު ކަމަށާއި އެހެންވެ މިއަހަރުދެން އެހެން މުބާރާތެއް ނުކުޅޭ ކަމަށެވެ.

ސެރީނާވަނީ އޭނާގެ ސަޕޯޓަރުންނަށް އާންމުކޮށް ދައްކާލަންކުރި ސްނެޕްގައި " '20 ހަފުތާ" މިހެން ޖަހާފައެވެ. މާނައަކީ ސެރީނާގެ ބަނޑަށް 20 ހަފްތާވެފައިވާ ކަމަށެވެ.

އެމެރިކާގެ ކަޅު ނަސްލަށް ނިސްބަތްވާ ދެބެން ކަމަށްވާ ވީނަސް އާ ސެރީނާއަކީ ޓެނިހުގެ ދުނިޔޭގައި ވަރަށް ކާމިޔާބު ދެބެންނެވެ.

މިވަގުތު ދުނިޔޭގެ ދެވަނައިގައި ރޭންކު ކުރެވިފައިވާ ސެރީނާ ބަނޑުބޮޑުވުމާއި ގުޅިގެން އިތުރު މުބާރާތެއް ނުކުޅޭކަން އިއުލާންކުރިއިރު، އޭނާވަނީ މިއަހަރު ޖަނަވަރީ މަހު، ބޭއްވި އޮސްޓްރޭލިއަން އޯޕަން ކާމިޔާބު ކޮށްފައެވެ.

އެ މުބާރާތާއެކު ގްރޭންޑް ސްލޭމްގެ 23 މުބާރާތް ކާމިޔާބުކޮށް ސެރީނާވަނީ ރެކޯޑެއް ޤާއިމްކޮށްފައެވެ. އަނެއްކޮޅުން އެ ރެކޯޑް ސެރީނާ ޤާއިމްކުރީ އޭނާގެ ދައްތަ ވީނަސް ވިލިއަމްސް ބަލި ކުރުމަށްފަހު އެވެ.

ފްރެންޗް އޯޕަން، ޔޫއެސް އޯޕަން، އަދި ވިމްބަލްޑަން މުބާރާތަކީ ސެރީނާ ކާމިޔާބުކުރި ދުނިޔޭގެ އެންމެ ބޮޑު ގްރޭންޑް ސްލޭމް މުބާރާތްތަކުގެ ގޮތުގައި ހިމެނޭ ތިން މުބާރާތެވެ.

ބަނޑުބޮޑުވުމުގެ ސަބަބުން މިއަހަރު އިތުރު މުބާރާތެއް ނުކުޅެން ސެރީނާ ނިންމާފައިވަނީ ދުނިޔޭގެ ރޭންކިންގެ އެއްވަނައަށް އެރެން އޮއްވައެވެ. ނަމަވެސް އެހާލަތުގައި އޭނާއަށް ކުޅެވޭނެ ގޮތެއްވެސް ނޯންނާނެއެވެ.

މިވަގުތު ދުނިޔޭގެ ރޭންކިންގެ އެއްވަނައަށް ނޭރުނަމަވެސް އެ ފުރުސަތުވެސް ސެރީނާއަކަށް ނުގެއްލޭނެއެވެ. އެއީ އަންހެންނުންގެ ޓެނިސް އެސޯސިއޭޝަންގެ ރޭންކިންގައި އަމަލުކުރާ ހާއްސަ އުސޫލަކުން އެފުރުސަތު އޭނާއަށް ނުގެއްލި ލިބޭނެތީއެވެ.

މި އުސޫލުގައިވާ ގޮތުން ވިހައިގެން ނުވަތަ، ދިގު މުއްދަތެއް ހޭދަ ކުރަންޖެހޭ އަނިޔާއެއް ކުރިމަތި ވެއްޖެނަމަ، އެކުޅުންތެރިޔެއްގެ ރޭންކިންގް މަގާމު ނުގެއްލޭނެއެވެ.