"ފޫހި ފިލުވަންވެސް ފަލަސްތީން މީހުންގެ ގަޔަށް ބަޑި ޖަހާ މަރަން"

ވަކި ސަބަބެއް ނެތި ފޫހި ވެގެން ވެސް ފަލަސްތީނުގެ މީހުންގެ ގަޔަށް ބަޑި ޖަހާ މަރާ ކަމަށް ގާޒާ ހަނގުރާމައިގައި ބައިވެރިވި އިޒްރޭލުގެ ބައެއް ސިފައިން ބުނެފިއެވެ.

އިޒްރޭލް ސިފައިން ފޫހި ފިލުވަންވެސް ފަލަސްތީން މީހުން މަރާ ކަމަށް ހަނގުރާމައިގައި ބައިވެރިވި އިޒްރޭލުގެ ބައެއް ސިފައިން ބުނާތީ އެކަން އެންމެ ސިރީއަސް ކަމާއެކު ތަހުގީގު ކުރަން ހަމާސް އިން އިންޓަނޭޝަނަލް ކްރިމިނަލް ކޯޓް (އައިސީސީ) އަށް ގޮވާލައިފިއެވެ.

ހަމާސް އިން ބުދަ ދުވަހު މިކަމަށް ގޮވާލީ، ފަލަސްތީންގެ އުދުވާނުގައި ބައިވެރިވި ބައެއް ޔަހޫދީ ސިފައިން އެމީހުންގެ ހަނގުރާމައިގެ ތަޖުރިބާތައް 972+ މެގަޒިން އަށް ކިޔައިދެމުން އިޒްރޭލް ސިފައިން ފޫހިވެގެން ފޫހި ފިލުވުމަށް ވެސް ވަކީ މީހެއް ނުބަލާ ފަލަސްތީނު މީހުން ގަޔަށް ބަޑިޖަހާ މަރާ ކަމަށް ބުނި ވާހަކަ ތަކާ ގުޅިގެންނެވެ.

ގާޒާ އަށް ހަމަލާ ދިނުމުގައި އިޒްރޭލް ސިފައިންގެ ތެރޭގައި ހިމެނުނު 6 ސިފައިންގެ މީހަކު ހަނގުރާމައިގެ ތަޖުރިބާތައް ކިޔައިދެމުން ބުނެފައިވަނީ، އާދައިގެ މަތިން ފަލަސްތީން މީހުން އެންމެ ގިނައިން މަރާ އެއް ކަމަކަށް އޮންނަނީ ވަނުން މަނާ ސަރަހައްދެއް ކަމަށް އިޒްރޭލް ސިފައިން ފާހަގަ ކޮށްފައިވާ ސަރަހައްދަކަށް ފަލަސްތީނު މީހަކު ވަނުން ކަމުގައެވެ. އެ ގޮތައް މީހަކު އެފަދަ ސަރަހައްދަކަށް ވަދެވިއްޖެ ނަމަ މަރާލުން ނޫން އެހެން ގޮތެއް ނޯންނާނެ ކަމަށް އިޒްރޭލް ސިފައިން ކިޔައިދީފައިވެއެވެ. އިޒްރޭލު ސިފައިން ބުނާ ގޮތުގައި އެ ގޮތައް މަރުވެގެން ވެއްޓޭ މީހުންގެ ހަށިތައް އެ ހުރި ގޮތައް ކުނި ހަލާކުވާން ދޫކޮށްލާ ފައި ހުންނަނީ ކަމަށެވެ. ބައެއް ފަހަރު މަރުވެފައިވާ މީހުންގެ ހަށިތައް ޖަނަވާރުގެ ކާނާ އަށް ވެގެން ދާ ކަމަށްވެސް އެމީހުން ކިޔައިދީފައިވެއެވެ.

ޔަހޫދީ ސިފައިން ބުނާ ގޮތުގައި މަރުވެފައިވާ މީހުންގެ ހަށިތައް ނުފެންނަ ގޮތް ހަދާލަނީ، ބައިނަލް އަގްވާމީ އެހީ ފޯރުށްދޭ ފަރާތްތަކުން އެހީ ހިފައިގެން އަންނަ ވަގުތު އެކަނި ކަމަށެވެ.

އެމީހުން ކިޔައިދީފައިވާ ގޮތުގައި، އިޒްރޭލް ސިފައިންގެ މީހަކާ ދިމާލަށް އަންނަ ނުރައްކަލެއް ކަމަށް އެމީހުންނަސް ހީވާ ކޮންމެ މީހެއްގެ ގަޔަށް ބަޑިޖެހުމުގެ ހުއްދަ އޮންނަނީ ދީފައެވެ. އިންޒާރު ކުރުމުގެ ގޮތުން ކޮންމެހެން ވައިގެ ތެރެއަށް ބަޑިޖަހާކަށް ނުޖެހެއެވެ. އެއީ ހަތިޔާރު ހިފައިގެން ހުރި މީހެއްތޯ އަންހެނެއްތޯ، ކުޑަކުޖެއްތޯ، މުސްކުޅިއެއްތޯ ބަލަން ނުޖެހޭ ކަމަށް އިޒްރޭލް ސިފައިން ބުނެފައި ވެއެވެ.

އިންސާނިއްޔަތާ ޚިލާފް މިފަދަ ކުށްތައް އިޒްރޭލުން ކަރުމުން ދާއިރު އިޒްރޭލުގެ ވެރިންނަށް ހައްގު އަދަބު ނުދެވި ދާ ދިއުމަށް ހަމާސް އިން ނެރުނު ބަޔާނުގައި ބައިނަލް އަގްވާމީ މުޖްތަމައަށް ވަނީ ވަރަށް ބޮޑަށް ކަންބޮޑުވުން ފާޅު ކޮށް ފާޑު ކިޔައިފައެވެ. ހަމާސް އިން ބުނެފައިވަނީ، ފޫހި ފިލުވުމުގެ ގޮތުން މީހުންގެ ގަޔަށް ބަޑި ޖެހުމާއި، އަދި ކުށެއް ނެތް އިންސާނުންގެ ގަޔަށް ބަޑި ޖެހުމާ މީސް މީހުންގެ ގޯތި ގެދޮރުގައި ހުޅު ޖަހާ އަންދާ މީހުންގެ އަމިއްލަ ގެދޮރުން ނެރެ ބޭރުކުމުގެ ހުއްދަ ޔަހޫދީ ދައުލަތުގެ ވެރިން އިޒްރޭލް ސިފައިންނަށް އޮންނަނީ ދީފައި ކަމުގައެވެ.

ގާޒާގެ ހެލްތު މިނިސްޓްރީން ބުނެފައިވަނީ އޮކްޓޯބަރު 7 ގެ ފަހުން އިޒްރޭލުން ދެމުންދާ ހަމަލާތަކުގައި މިހާތަނަށް 38،241 މީހުން މަރުވެ، އިތުރު 88،241 މީހުން ޒަޚަމްވެފައިވާ ކަމަށެވެ. އަނެއްކޮޅުން ދުނިޔޭގެ މަޝްހޫރު މެޑިކަލް މަޖައްލާ - ދި ލެންސެޓް އިން ޝާއިއު ކުރި ރިޕޯޓެއްގައި ބުނެފައިވަނީ އިޒްރޭލުގެ އުދުވާނުގައި ފަލަސްތީނުން މަރުވި މީހުންގެ އަދަދު 186،000ށް ވުރެ މައްޗައް ދާނެ ކަމަށް އަންދާޒާ ކުރެވޭ ކަމުގައެވެ.