ސްރީ ލަންކާއަށް ކުރަމުންދާ ވިއްސާރައިގައި  ފެންބޮޑުވެ ބިންގަނޑު ކަނޑައިގެން ދިޔުމުގެ ހާދިސާތަކުގައި މަރުވި މީހުންގެ އަދަދު 194 އަށް އަރައިފި ކަމަށާއި އަންގާރަ ދުވަހާ ހަމަޔަށް ރިލީފް ކޭމްޕްތަކުގައި ތިބި މީހުންގެ އަދަދު 80،000 އަށް އަރާ ކަމަށް ރިޕޯޓުތައް ބުނެފިއެވެ.

ހުކުރު ދުވަހުން ފެށިގެން ސްރީލަންކާ އަށް ކުރާ ވިއްސާރާއާ ގުޅިގެން ފެންބޮޑުވުމާއި ބިންގަނޑު ކަނޑައިގެން ދިޔުމާ ގުޅިގެން، އަދިވެސް ގާތްގަނޑަކަށް 100 އެއްހާ މީހުން ވަނީ ގެއްލިފައެވެ.

ސާދަ އަހަރުތެރޭ ލަންކާ އަށް ކުރިމަތިވެފައިވާ އެންމެ ބޮޑު ފެންބޮޑުވުން ކުރިމަތިވެފައިވާ އިރު، މަރުވެފައިވާ މީހުންގެ އަދަދު އިތުރު  ވާނެ ކަމަށް އޮފިޝަލުން ބުނެއެވެ.

ބޯކޮށް ވާރެވެހުމުގެ ސަބަބުން އޭގެ އަސަރު ބައި މިލިއަނަށްވުރެ ގިނަ މީހުންނަށް ކޮށްފައިވާއިރު ބައިނަލްއަގްވާމީ މުޖުތަމައު އިން ދަނީ ލަންކާ އަށް އެހީ ވަމުންނެވެ. އެގޮތުން އިންޑިއާއިން ވަނީ އެގައުމުގެ އަސްކަރީ މަނަވަރު އައިއެންއެސް ކިރިޗް މެދުވެރިކޮށް ކާބޯތަކެއްޗާއި، ބޭހާއި، އެނޫނަސް ޒަރޫރީ އެހީތެެރިކަން ފޯރުކޮށްދިނުމުގެ މަސައްކަތް ހޮނިހިރު ދުވަހުން ފެށިގެން ފަށާފައެވެ.

ލަންކާ ސަރުކާރުން ވަނީ ހާލުގައި ޖެހިފައިވާ ސަރަހައްދުތަަކަށް އެހީވުމަށް 2,000 ސިފައިން ފޮނުވާފައެވެ. އޮފިޝަލުން ބުނާގޮތުން ކުރިއަށް ހުރި ދުވަސްތަކުގައި ވެސް ލަންކާއަށް މޫސުން ގޯސްވާނެއެވެ.

މިއީ 2003 ވަނަ އަހަރުގެ ފަހުން ލަންކާ އަށް ކުރާ އެންމެ ގެއްލުން ބޮޑު ވިއްސާރަ އެވެ. އެ ފަހަރުގެ ވިއްސާރައިގައި 10،000 ގެ ހަލާކުވެ 250 މީހުން ވަނީ މަރުވެފަ އެވެ.