ޔޫރޯ ފުޓްބޯޅަ މުބާރާތުގައި އިންގްލޭންޑާއި ނެދަލޭންޑްސް މާދަމާ ރޭ ކުޅޭ މެޗަށް މީގެ ކުރިން ރިޝްވަރު ނަގާފައިވާކަން ޔަގީންވެފައިވާ ރެފްރީއަކު ޔޫއޭފާއިން އައްޔަންކޮށްފި އެވެ.

މި މެޗަށް ޔޫއޭފާއިން އައްޔަންކޮށްފައިވާ ރެފްރީ އަކީ ޖަރުމަނުގެ ފެލިކްސް ޒްވާޔާ އެވެ. އޭނާ ރިޝްވަތު ނެގިކަން ފަޅާއެރީ 2005 ވަނަ އަހަރު އެވެ. އެހެން ރެފްރީއަކު ދިން 300 ޔޫރޯ ރިޝްވަތުގެ ގޮތުގައި އޭނާ ބޭނުންކުރިކަން ފަޅާއެރުމުން ޖަރުމަނު ފުޓްބޯޅަ ފެޑަރޭޝަނުން ވަނީ އޭނާ އަށް އަދަބުދީފަ އެވެ.

ނަމަވެސް ޔޫރަޕުގެ ފުޓްބޯޅަ ޖަމިއްޔާއިން ބުނީ މުބާރާތުގެ މެޗުތަކަށް ރެފްރީން ކަނޑައަޅަނީ ޕާފޯމަންސަށް ބަލާފައި ކަމަށާއި ޒަވާޔާގެ ޕާފޯމަންސް މި މުބާރާތުގައި ފެނިގެން ގޮސްފައިވަނީ މޮޅަށް ކަމަށެވެ.

މިކަމާ ގުޅޭ ގޮތުން ސުވާލުކުރުމުން އިނގިރޭސި ޑިފެންޑަރު ލޫކް ޝޯ ބުނީ ރެފްރީއާމެދު މައްސަލައެއް ނެތް ކަމަށެވެ. މެޗުން މޮޅުވާނީ މޮޅަށް ކުޅެ ލަނޑު ޖަހާ ޓީމު ކަމަށާއި އިންގްލޭންޑް ވިސްނާނީ މެޗު ކާމިޔާބު ކުރުމަށް ކަމަށެވެ.

އުމުރުން 45 އަހަރުގެ ރެފްރީ އަކީ 2012 ވަނަ އަހަރުން ފެށިގެން ފީފާގެ ރެފްރީއެކެވެ. އޭނާ ވަނީ މީގެ ކުރިން ވެސް ޔޫރޯ އާއި ވޯލްޑްކަޕުގައި ވެސް ރެފްރީކަން ކޮށްފަ އެވެ. އަދި ޔޫއޭފާ ނޭޝަންސް ލީގުގެ ފައިނަލުގައި 2023 ވަނަ އަހަރު ކްރޮއޭޝިޔާ އާއި ސްޕޭން ކުޅުނު މެޗަށް އިންސާފުކޮށްދިނީ ވެސް އޭނާ އެވެ.