މާލޭ ލީގުގައި ގްރީން ސްޓްރީޓް އަތުން 0-3 ގެ ނަތީޖާއަކުން މޮޅުވި މެޗަކީ އޭއެފްސީ ކަޕް މެޗަށް ތައްޔާރުވާން ލިބުނު ފުރުސަތެއް ކަމަށާއި، އެ މެޗަށްފަހު ޓީމު ރިކަވާވެ ތިން ޕޮއިންޓަށް ޓާގެޓް ހިފާފައިވާ ކަމަށެވެ.

އަބާނީއާ ދެކޮޅަށް ކުޅުމަށް ބަންގްލަދޭޝްއަށް ފުރުމުގެ ކުރިން ނޫސްވެރިންނަށް މައުލޫމާތު ދެމުން މާޒިޔާގެ ކޯޗު ސެކުލޮވްސްކީ ބުނީ އިދިކޮޅަށް ކުޅޭ ޓީމާ ބެހޭ މައުލޫމާތު ވަރަށް ރަނގަޅަށް ހޯދާފައިވާ ކަމަށާއި، އެގޮތުން އެޓީމު ޝައިހް ކަމާލް އިންޓަނޭޝަނަލް ކަޕްގައި ކުޅުނު ތިން މެޗުވެސް ބަލާފައިވާނެ ކަމަށެވެ.

އެހެންނަމަވެސް އަބާނީ ޓީމު ކުރިއަށްވުރެ ތަފާތުވާނެކަން ފާހަގަކުރަމުން ސެކުލޮވްސްކީ ބުނީ އެޓީމު ވަރުގަދަ ކުރުމަށް ފަސް ކުޅުންތެރިން ގެނެސްފައިވާ ކަމަށާއި، އޭގެ ތެރެއިން އެއް ކުޅުންތެރިޔަކީ ބިދޭސީއެއް ކަމަށެވެ.

ސެކުލޮވްސްކީ ބުނީ މިއީ އެޓީމު ގްރޫޕް ސްޓޭޖުގައި ކުޅޭ ފުރަތަމަ މެޗަށްވެފައި، އެއްވެސް ޓާގެޓެއް ކަނޑައަޅަން ބޭނުންނުވާ ކަމަށެވެ. އެހެންނަމަވެސް އޭނާ ބުނީ މުބާރާތް ފަށަން ބޭނުންވަނީ މޮޅަކާއެކު ކަމަށާއި، މެޗުން ތިން ޕޮއިންޓް ބޭނުންވާ ކަމަށެވެ.

އަބާނީގެ ކޯޗަކަށް ރާއްޖޭގެ ކުރީގެ ކޯޗު މަމިޗް ހުރި ނަމަވެސް އެއީ ކަންބޮޑުވާންޖެހޭ ކަމެއް ނޫން ކަމަށް ސެކުލޮވްސްކީ ވަނީ ބުނެފައެވެ. އެގޮތުން އޭނާ ބުނީ ގައުމީ ޓީމުގެ ކޯޗުކަން މަމިޗް އަދާކޮށްފައިވަނީ މީގެ ދެވަރަކަށް އަހަރު ކުރިން ކަމަށާއި، މިހާރު އެ ކުޅުންތެރިން ތަފާތުވާނެ ކަމަށެވެ.

އޭއެފްސީ ކަޕްގައި މާޒިޔާ ހިމެނޭ ގުރޫޕު އީގައި ހިމެނޭ އެހެން ޓީމު ތަކަކީ މޯހަން ބަގާން އާއި ޑާކާ އަބާނީގެ އިތުރުން މިމުބާރާތުގެ އެންމެ ފަހުގެ ރަނައަފް އިންޑިއާގެ ބެންގަލޫރު އެފްސީ އެވެ.