ރެއާލް މެޑްރިޑަށް ކުޅެމުން އަންނަ ގެރެތް ބޭލް ވިއްކާލުމުގެ  ވިސްނުމެއް އެ ކްލަބުގެ ނެތް ކަމަށް ރެއާލްގެ ރައީސް ފްލޮރެންޓީނޯ ޕެރޭޒް ވިދާޅުވެއްޖެ އެވެ.

ނޫސްވެރިންނަށް މައުލޫމާތު ދެމުން ޕެރޭޒް ވިދާޅުވީ، ބޭލް އަކީ ރެއާލް އަށް ވަރަށް މުހިންމު ކުޅުންތެރިޔެއް ކަމަށާއި، އޭނާ ވިއްކާލުމުގެ  އެއްވެސް ވިސްނުމެއް ރެއާލް އިން ނުގެންގުޅޭ ކަމަށެވެ.

ޕެރޭޒް ވިދާޅުވީ، ޔުއެފާ ޗެމްޕިއަންސް ލީގު ނެގުމަށް ފަހު ސްކޮޑަށް ބަދަލު ގެންނަން ރެއާލްގެ ކޯޗު ޒައިނުއްދީން ޒިދާން ވެސް ބޭނުންނުވާ ކަމަށާއި، މިހާރުގެ ސްކޮޑާއެކު ކުރިޔަށްދާން އޭނާވެސް ބޭނުންވާ ކަމަށެވެ.

މީގެއިތުރުން އޭނާ ވިދާޅުވީ، ހޯދާ ކޮންމެ މޮޅަކީ ވެސް މުހިންމު މޮޅެއް ކަމަށާއި، ހަރުފަތަކަށް ފަހު ހަރުފަތެއް ރެއާލް ކުރިއަރަމުން އަންނަ ކަމަށެވެ.

މިދިޔަ އަހަރުގެ އޮކްޓޯބަރު މަހު 2022 ވަނަ އަހަރުގެ ނިޔަލަށް ރެއާލްގައި މަޑުކުރަން ބޭލް ނިންމާފައިވާއިރު، މި ޓްރާންސްފާގައި ބޭލް ހޯދުމަށް ޔުނައިޓެޑުން މަސައްކަތް ކުރަމުން އަންނައިރު، މިދިޔަ ޖެނުއަރީ ޓްރާންސްފާގައި ވެސް އޭނާ ހޯދުމަށް އެޓީމުން ވަނީ މަސައްކަތް ކޮށްފައެވެ.

މިދިޔަ ސީޒަނުގެ ބޮޑު ބައެއް އަނިޔާގައި ހުންނަން ޖެހުނު ބޭލް މި ސީޒަނުގައި ކުޅެފައި ވަނީ 27 މެޗެވެ. އަނިޔާގެ ސަބަބުން ބޭލް އަށް ގިނަ މެޗުތައް ގެއްލިފައިވާއިރު، ފިޓްވުމަށް އޭނާ އަންނަނީ މަސައްކަތް ކުރަމުންނެވެ.

ޓޮންމަހް ހޮޓްސްޕާއިން 2014 ވަނަ އަހަރު ދުނިޔޭގެ ރެކޯޑް އަގަކަށް ރެއާލް މެޑްރިޑަށް ބަދަލުވެ، ބޭލް ވަނީ މިހާތަނަށް ރެއާލްއަށް 67 ލަނޑު ކާމިޔާބު ކޮށްދީފައެވެ. އެޓީމާއެކު އޭނާ ވަނީ ކޮޕާ ޑެލްރޭ، ފީފާ ކްލަބް ވޯލްޑްކަޕް، ޔޫއެފާ ސުޕަރކަޕް، އަދި ޔޫއެފާ ޗެމްޕިއަންސް ލީގު ދެފަހަރު ކާމިޔާބު ކޮށްފައެވެ.