ބުދަ 15 ޖުލައި 2020
01 ފުސް
1441 ޒުލްގައިދާ 24
ފަތިސް 04:43
އިރުއަރާ 06:00
މެންދުރު 12:16
އަސްރު 15:38
އިރުއޮއްސޭ 18:24
އިޝާ 19:41
ސްޕެނިޝް ލަލީގާ

ސްޕެނިޝް ލަލީގާ: ބޭލް އެނބުރި އައިސް ރެއާލް މޮޅުކޮށްދީ މަގާމުގައި ބަހައްޓައިފި

  • އެސްޕަނިއޯލް އޮތީ ކުޅުނު 23 މެޗުން ލިބުނު 32 ޕޮއިންޓާއެކު ޕޮއިންޓް ތާވަލުގެ ނުވަ ވަނައިގައި
  • ރެއާލް އޮތީ ކުޅުނު 21 މެޗުން ލިބުނު 52 ޕޮއިންޓާއެކު ޕޮއިންޓް ތާވަލުގެ އެއްވަނައިގައި
  • މެޗުގައި ބޭލް ކުޅެން އެރީ 72 ވަނަ މިނެޓުގައި، ލަނޑު ޖެހީ 83 ވަނަ މިނެޓުގައި

ކ. މާލެ | 19 ފެބްރުއަރީ 2017 | އާދީއްތަ 15:28 | 2,675

ލަނޑު ޖެހުމަށްފަހު ބޭލް އުފާފާޅުކުރަނީ - ޓްވިޓަރ

ސްޕެނިޝް ލަލީގާގައި ރެއާލް މެޑްރިޑަށް ކުޅެމުން އަންނަ ވޭލްސްގެ ވިންގާ ގެރެތް ބޭލް އަނިޔާއިން ސަލާމަތްވެ އެނބުރި އައިސް ރެއާލް އަށް ކުޅެދިން މެޗުން އެޓީމު މޮޅުކޮށްދީ މަގާމު ދަމަހައްޓަދީފި އެވެ.

ހޮނިހިރު ދުވަހުގެ ރޭ ކުޅުނު މި މެޗު އެސްޕަނިއޯލްއާ ވާދަކޮށް ރެއާލް އިން މެޗު ކާމިޔާބުކުރީ 0-2 ގެ ނަތީޖާއަކުންނެވެ.

ރެއާލް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަލަށް ކުޅުނީ ރެއާލް އެވެ. އެގޮތުން އެޓީމުން ވަނީ އެސްޕަނިއޯލްގެ ހާފަށް ބާރުބޮޑުކޮށް ލަނޑު ޖެހުމަށް ގިނަ ފުރުސަތުތަކެއްވެސް ތަނަވަސްކޮށްފައެވެ.

މެޗުގައި ރެއާލް އިން ލީޑު ނެގީ 33 ވަނަ މިނެޓުގައި އަލްވަރޯ މޮރާޓާ ކާމިޔާބުކޮށްދިން ލަނޑުންނެވެ. މި ލަނޑަށްފަހުވެސް އޭނާ އަށް ވަނީ ލަނޑު ޖެހުމަށް ގިނަ ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން އެސްޕަނިއޯލްގެ މައްޗަށް ރެއާލް ކުރިހޯދައިގެންނެވެ.

ދެވަނަ ހާފް ފެށިގެންވެސް ރެއާލް އިން ދިޔައީ އެސްޕަނިއޯލްގެ ހާފަށް ނުރައްކާކުރަމުންނެވެ. އެގޮތުން ލަނޑު ޖަހަން ގިނަ ފުރުސަތުތަކެއް ދެވަނަ ހާފްގައިވެސް ރެއާލް ވަނީ ލިބި ބޭކާރުވެފައެވެ.

ރެއާލް އިން މެޗުގެ ލީޑު ފުޅާކުރީ 83 ވަނަ މިނެޓުގައި ބަދަލު ކުޅުންތެރިޔެއްގެ ގޮތުގައި ކުޅެން އެރި ގެރެތް ބޭލް އެވެ. މި ލަނޑަށްފަހުވެސް ރެއާލް އަށް ވަނީ ލީޑު ފުޅާކުރަން ގިނަ ފުރުސަތުތަކެއް ލިބިފައެވެ.

މި ނަތީޖާއާއެކު ރެއާލް އޮތީ ކުޅުނު 21 މެޗުން ލިބުނު 52 ޕޮއިންޓާއެކު ޕޮއިންޓް ތާވަލުގެ އެއްވަނައިގަ އެވެ. މެޗުން ބަލިވި އެސްޕަނިއޯލް އޮތީ ކުޅުނު 23 މެޗުން ލިބުނު 32 ޕޮއިންޓާއެކު ޕޮއިންޓް ތާވަލުގެ ނުވަ ވަނައިގަ އެވެ.

އެންމެ ފަހުން އަޕްޑޭޓް ކުރީ: 4 މަސް ކުރިން | ރިވިއު ކުރީ: ހުސެން ފިޔާޒް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.