"ދިރިހުއްޓަސް ދިރުމެއް ނެތް، ފުރާނަ ހުއްޓަސް ރޫޙެއް ނެތް"

ދުވަހަކީ އޭޕްރިލް މަހުން 2 ވަނަ ދުވަހެވެ. މިދިޔަ އަންގާރަ ދުވަހެވެ. ބަރަކާތްތެރި ރަމަޟާން މަހުގެ ފަހު ދިހައިގެ ދުވަސްތަކުން ދުވަހެކެވެ. ނިރުބަވެރި އިޒްރޭލުން ހިންގަމުން ގެންދާ ނިމުން ފެންނަން ނެތް ގަތުލުއާންމުގެ ޝިކާރައަކަށް ވެފައިވާ ފަލަސްޠީނުގެ ޣައްޒާގެ ރަށްވެހިން އަވަދިނެތި އުޅެމުން ދިޔައީ، އަލް-ޝިފާ ހޮސްޕިޓަލު ސަރަޙައްދުގައި ވާ އެ މީހުންގެ ޢާއިލީ މެންބަރުންގެ ފުރާނަ ނެތް މަސްގަނޑުތައް އެއްތަން ކުރެވޭތޯއެވެ.

ޣައްޒާ ކޮންޓްރޯލް ކުރާ ޙަމާސް ޖަމާޢަތުގެ ވަސް، މި ދުނިޔެއިން ފޮހެލަން ވަޢުދުވާ ކަމަށް ބުނެ، ޔަހޫދީ އިޒްރޭލުން ހިންގަމުންދާ ގަތުލުއާންމުގައި ހުއްޓުމެއް ނެތި ދެމުން ގެންދާ ޙަމަލާތައް އެންމެ ފަހުން ވަރުގަދަ ކުރި އެއް ތަނަކީ އަލް-ޝިފާ ހޮސްޕިޓަލެވެ. އެންމެ ވަރުގަދަ ހަނގުރާމަތަކުގައިވެސް ހޮސްޕިޓަލުތަކަށް ހަމަލާ ދިނުމަކީ ބޮޑުވެގެންވާ ޖަރީމާއެއް ކަމުގައި ކަނޑައަޅާ، ބައިނަލްއަޤުވާމީ މުޖުތަމަޢުން އިއްތިފާޤުވެފައި އޮތް ކަމެކެވެ.

ދުނިޔޭގެ އެންމެ ޑިމޮކްރަޓިކް ޤައުމު ކަމަށް ވަކާލާތު ކުރާ އެމެރިކާގެ ޚުދުމުޚުތާރީ މިނިވަންކަމުގެ ނިވާފަތްގަނޑުގައި އޮވެގެން އިޒްރޭލުން ހިންގަމުން ގެންދާ ގަތުލުއާންމުގައި، އޭޕްރިލް 1 ވަނަ ދުވަހު އަލް-ޝިފާ ހޮސްޕިޓަލުގައި ވަރުގަދަ އޮޕަރޭޝަނެއް ކުރިއަށް ގެންދިޔައެވެ. އޭރުވެސް އެ ބުނާ އޮޕަރޭޝަނެއް ކުރިއަށް ގެންދާތާ 2 ހަފުތާއެއްހާ ދުވަސް ވެއްޖެއެވެ. އެ ދުވަހު އޮޕަރޭޝަން ނިންމާލިއިރު އަލް-ޝިފާ ހޮސްޕިޓަލު ހުރި ސަރަހައްދު ހަފުސްކޮށް ނިންމައިފިއެވެ. ފުނިފުންޏަށް ހުރި ގައުކުނޑިތަކުގެ ތެރޭގައި އިންސާނުންގެ ހަށިތައް ފެންނަން ހުރީވެސް މަދެއްކޮށެއް ނޫނެވެ. އިޒްރޭލުން ވަނީ އެ ހޮސްޕިޓަލުގައި މަރުކަޒު ވެގެން ތިބި ހަމާސްގެ އެތައް ސަތޭކަ ހަނގުރާމަވެރިންނެއް މަރާލާފައި ވާނެ ކަމަށް ބުނެފައެވެ. ނަމަވެސް ހޮސްޕިޓަލުގެ މުވައްޒަފުންނާއި ޙަމާސް ޖަމާޢަތުންވެސް ވަނީ، ހޮސްޕިޓަލުގައި ހަނގުރާމަވެރިން ތިބޭ ކަމަށް އިޒްރޭލުން ކުރާ ތުހުމަތަށް އިންކާރުކޮށް، ދޮގުކޮށްފައެވެ.

ޢަބްދުﷲ އަބޫ އީލާފްއަކީ އޭނާގެ ދައްތައާއި އެ ދައްތަގެ ދަރިންކޮޅުގެ ހަށިގަނޑު ފެނޭތޯ އަތްފުނާ އަޅަމުންދާ އެކަކެވެ. އެ މީހުން ވަނީ އަލް-ޝިފާ ހޮސްޕިޓަލުގެ ގޯތި ތެރެއަށް ވާ ގޮތަށް އޮތް ސަރަޙައްދުގައި 'ވަޅުލެވިފަ'އެވެ.

އޮކްޓޯބަރ 7 ވަނަ ދުވަހު އިޒްރޭލުން ގަތުލުއާންމު ފެށުމާ ހިސާބަށް، އަލް-ޝިފާ ހޮސްޕިޓަލަކީ ޣައްޒާގައި ހުރި އެންމެ ބޮޑު ހޮސްޕިޓަލެވެ. ގަތުލުއާންމު ފެށިފަހުން ހޮސްޕިޓަލަށް ޢަމާޒުކޮށް ސިލްސިލާ އެތައް ޙަމަލާއެއް ދިނުމުގެ ސަބަބުން، ހޮސްޕިޓަލުން ދެމުންދިޔަ ޚިދުމަތްތައް ބޮޑުތަނުން މަދުވިއެވެ. ނަމަވެސް އެއީ އެންމެ ފަހުގެ ރެއިޑާ ޖެހެން ދެކަށް، އުތުރުގެ ސަރަޙައްދުގައި ޞިއްޙީ ޚިދުމަތް ދެމުންދިޔަ މަދު ތަންތަނުގެ ތެރެއިން އެއް ތަން ކަންވެސް ފާހަގަ ކުރަން ޖެހެއެވެ.

ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ) އިން މިދިޔަ އަންގާރަ ދުވަހު ސިފަ ކުރި ގޮތުގައި، ޣައްޒާގެ އެންމެ ބޮޑު ހޮސްޕިޓަލު، 2 ހަފުތާގެ ރެއިޑެއްގައި ސުންނާފަތިކޮށް ހަފުސްކޮށްލުމަކީ، ޣައްޒާގެ ޞިއްޙީ ނިޒާމުގެ ހިތް، މައި ނާރުން ވަކިކޮށްލުން ފަދަ ކަމެކެވެ. ފަލަސްޠީނުގެ އޮފިޝަލުންވެސް ވަނީ، އެތައް ބަލި މީހުންނަކަށް ފަރުވާ ދެމުން ދިޔަ އަލް-ޝިފާ ހޮސްޕިޓަލަށް ޢަމާޒުކޮށްގެން އިޒްރޭލުން ޙަމަލާތަކަކީ، ހަނގުރާމައިގެ ޖަރީމާއެއްގެ ގޮތުގައި ސިފަކޮށްފައެވެ. ކަން މިހެން އޮތް އިރު، އިޒްރޭލުން ދަނީ އެ ނިރުބަވެރި ޢަމަލު ދިފާޢު ކުރަމުންނެވެ. ސަބަބެއް ކަމަށް ބުނަނީ، ޣައްޒާގެ އެންމެ ނާޒުކު މީހުންގެ ތެރޭގައި ޙަމާސްގެ ހަނގުރާމަވެރިން ހަރަކާތްތެރި ވާ ކަމަށެވެ. ނަމަވެސް، އެ ތުހުމަތުތަކަށްވެސް ޙަމާސްއިން އިންކާރު ކުރެއެވެ.