ޣައްޒާ ހަނގުރާމަ ވަގުތުން ވަގުތަށް ހުއްޓާލުމަށް ގުޓަރޭސް ގޮވާލައްވައިފި
ޣައްޒާ ސިޓީގެ ފުރިހަމަ ކޮންޓްރޯލް ހޯދުމަށް އިސްރާއީލް އިން ފަށަން ނިންމާފައިވާ އޮޕްރޭޝަން ހުއްޓާލުމަށާއި، ޣައްޒާ ހަނގުރާމަ ހުއްޓާލުމަށް ވެސް ގުޓަރޭސް ގޮވާލެއްވި އެވެ. އަދި ވަގުތުން ޣައްޒާ ހަނގުރާމަ ހުއްޓާލުމަކީ މިހާރު ކުރަން ޖެހޭ އެންމެ މުހިންމު ކަންތައް ކަމަށް ގުޓަރޭސް ވަނީ ފާހަގަ ކުރައްވައިފަ އެވެ.
އދ ގެ ސެކްރެޓަރީ ޖެނެރަލް ގައްޒާގެ ހަނގުރާމަ ވަގުތުން ހުއްޓާލުމަށް ގޮވާލައްވައިފި
ޖަޕާނުގައި ކުރިއަށް ދިޔަ ޓޯކިއޯ އިންޓަނޭޝަނަލް ކޮންފަރެންސް އޮން އެފްރިކަން ޑިވެލޮޕްމަންޓުގައި ގުޓަރޭސް ވާހަކަ ދައްކަވަނީ
އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ވަގުތުން ވަގުތަށް ހުއްޓާލުމަށް، އދ ގެ ސެކްރެޓަރީ ޖެނަރަލް އެންޓޯނިއޯ ގުޓަރޭސް ގޮވާލައްވައިފި އެވެ.
ގުޓަރޭސް މިފަދައިން ގޮވާލައްވާފައި ވަނީ ބުރާސްފަތި ދުވަހު ޖަޕާނުގައި ކުރިއަށް ދިޔަ ޓޯކިއޯ އިންޓަނޭޝަނަލް ކޮންފަރެންސް އޮން އެފްރިކަން ޑިވެލޮޕްމަންޓުގައި ވާހަކަ ދައްކަވަމުންނެވެ.
އެގޮތުން ޣައްޒާ ސިޓީގެ ފުރިހަމަ ކޮންޓްރޯލް ހޯދުމަށް އިސްރާއީލް އިން ފަށަން ނިންމާފައިވާ އޮޕްރޭޝަން ހުއްޓާލުމަށާއި، ޣައްޒާ ހަނގުރާމަ ހުއްޓާލުމަށް ވެސް ގުޓަރޭސް ގޮވާލެއްވި އެވެ. އަދި ވަގުތުން ޣައްޒާ ހަނގުރާމަ ހުއްޓާލުމަކީ މިހާރު ކުރަން ޖެހޭ އެންމެ މުހިންމު ކަންތައް ކަމަށް ގުޓަރޭސް ވަނީ ފާހަގަ ކުރައްވައިފަ އެވެ.
އެގޮތުން ގުޓަރޭސް ވިދާޅުވީ ޣައްޒާގައި ކުރިއަށް ގެންދަމުން އަންނަ ހަނގުރާމައިގެ އޮޕަރޭޝަންގެ ސަބަބުން އެތަކެއް މަރުތަކެއް ކުރިމަތި ވަމުން އަންނަ ކަމަށާއި، ޣައްޒާ ހަލާކުވުން ހުއްޓުވުމަށްޓަކައި ވެސް ހަނގުރާމަ ނިންމަން ޖެހޭ ކަމަށެވެ.
އިސްރާއީލް އިން މިހާރު ނިންމާފައި ވަނީ އެތައް ހާސް ރިޒާވިސްޓު ސިފައިން ބޭނުން ކޮށްގެން، ޣައްޒާގެ އެންމެ ބޮޑު އާބާދީ އޮތް ސަރަހައްދު ހިފުމުގެ ޕްލޭން ކުރިއަށް ގެންދަން ނިންމައިފަ އެވެ. އަދި އިސްރާއީލްގެ ޑިފެންސް މިނިސްޓަރު އިސްރާއީލް ކާޓްޒް ވަނީ، ބުދަ ދުވަހު އެ ޕްލޭން އަށް ރުހުން ވެސް ދީފަ އެވެ.
އިސްރާއީލްގެ މި ނިންމުމަކީ ފަލަސްޠީނުގެ އިތުރު ރައްޔިތުންތަކެއްގެ ގެދޮރު ގެއްލޭނެ ނިންމުމެއް ކަމަށް ބައިނަލްއަޤުވާމީ މުޖުތަމައުން އަންނަނީ ފާހަގަ ކުރަމުންނެވެ. އަދި އެކަން ކުރިއަށް ނުގެން ދިޔުމަށް ވެސް ގިނަ ބަޔަކު އަންނަނީ އިސްރާއީލަށް ގޮވާލަމުންނެވެ. މިހާރު އިސްރާއީލް އިން ވަނީ ޣައްޒާގެ 75 އިންސައްތަ ސަރަހައްދު ހިފައިފަ އެވެ.
2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން އިސްރާއީލަށް ދިން ހަމަލާތަކުގެ ސަބަބުން، އިސްރާއީލް އިން ޣައްޒާގައި ކުރިއަށް ގެންދަން ފެށި ހަނގުރާމައިގައި މިހާތަނަށް ޣައްޒާ އިން ވަނީ 62،000 އަށް ވުރެ ގިނަ ރައްޔިތުން ޝަހީދު ކޮށްލައިފަ އެވެ.
މީގެ އިތުރުން ގުޓަރޭސް ވަނީ، ހަމާސް ޖަމާއަތުން ރަހީނު ކޮށްފައިވާ އިސްރާއީލްގެ ރައްޔިތުން ވެސް ވަގުތުން ދޫކޮށްލުމަށް ގޮވާލައްވައިފަ އެވެ. އަދި އޭގެ އިތުރުން، ވެސްޓް ބޭންކުގައި އިތުރު "ޚިލާފު ޤާއިމުވުން" ހުއްޓުވުމަށް ވެސް ގުޓަރޭސް ވަނީ އިސްރާއީލް އަށް ގޮވާލައްވައިފަ އެވެ.
