ފަލަސްތީނު ގެ މިނިވަން ދައުލަތެއް އުފެއްދުމަކީ ޓްރަމްޕް ސަރުކާރުން އިސްކަންދޭ ކަމެއް ނޫން ކަމަށް އިސްރާއީލަށް އެމެރިކާ އިން ކަނޑައަޅާފައި ހުންނަ ސަފީރު މައިކް ހަކަބީ އަލް އަރަބިއްޔާ އަށް ދެއްވި އިންޓަވިއުއެއްގައި ވިދާޅުވެއްޖެ އެވެ.

މިއީ އާންމުކޮށް ދެ ދައުލަތުގެ ހައްލަކަށް ތާއީދު ކުރަމުން އައި އެމެރިކާގެ ގިނަ އަހަރުތަކެއްވީ ސިޔާސަތަށް އައި ބޮޑު ބަދަލެއްކަން ފާހަގަ ކުރެވެއެވެ.

ހަކަބީ ވިދާޅުވީ، "މިއީ އަޅުގަނޑުމެން އެންމެ އިސްކަންދޭންޖެހޭ ކަންތައްތަކުގެ ތެރެއިން ކަމެއް ކަމަށް ރައީސް ވިދާޅުވަނިކޮށް އަޅުގަނޑު ހަމަގައިމުވެސް އަޑުއަހާފައެއް ނެތް" ކަމަށެވެ. އަދި ރައީސް ޑޮނަލްޑް ޓްރަމްޕް އެ ސަރަޙައްދުގައި ސުލްޙައަށް ތާއީދު ކުރެއްވި ނަމަވެސް، ފަލަސްތީނުގެ ދައުލަތެއް އުފެއްދުމަކީ އޭނާގެ މިހާރުގެ އެޖެންޑާގެ ތެރޭގައި ހިމެނޭ ކަމެއް ނޫން ކަމަށް ވިދާޅުވިއެވެ.

ފަލަސްތީނު ދައުލަތެއް ގަބޫލު ކުރުމަށް ޔޫރަޕްގެ ގިނަ ގައުމު ތަކުން ނިންމި ނިންމުން ކުށްވެރި ކުރަމުން، ހަކަބީ ވަނީ ޕެލަސްޓައިން އޮތޯރިޓީ އާއި ޔޫރަޕުގެ ސަރުކާރުތަކުން ސުލްޙައިގެ މަސައްކަތްތަކަށް ހުރަސްއެޅޭ ގޮތަށް ޢަމަލުކުރާ ކަމަށް ތުހުމަތު ކުރައްވާފައެވެ.

"އެމެރިކާ އިން ކޮންމެ ފަހަރަކު ސުލްހަ އާ ދިމާ އަށް މަސައްކަތްކޮށް، އެކަމާ ގާތްވަމުން އަންނަ ކަމަށް ހީވާއިރަށް، ޔޫރަޕުގެ ނުވަތަ ޕެލަސްޓައިން އޮތޯރިޓީގެ ފަރާތުން އެކަން މުޅިން ހަލާކުކޮށްލާ ފަދަ ޢަމަލުތުތަކެއް ކުރާތަން ފެންނަމުންދާ" ކަމަށް އޭނާ ވިދާޅުވިއެވެ.

އޭނާ ވަނީ ޕެލަސްޓައިން އޮތޯރިޓީ އިން އަމިއްލަ އަށް ފަލަސްތީން "ދައުލަތެއް ގަބޫލު ކުރުމަށް ގޮވާލުމާއި" އަދި ހަނގުރާމަ ކުރާ އާއިލާތަކަށް އެލެލަވަންސް ދިނުންފަދަ ސިިޔާސަތުތައް ކުރިއަށް ގެންދިއުމަކީ "ނޭދެވޭ ނަތީޖާ ނެރޭ" ކަންކަން ކަމަށް ވިދާޅުވެއެވެ.

މީގެ އިތުރުން ސަފީރު ޔޫރަޕުގެ ލީޑަރުންނަށް ގޮވާލާފައި ވަނީ ފަލަސްތީނު ދައުލަތެއް ގަބޫލު ކުރުމާ ގުޅޭ ގޮތުން އެފަރާތްތަކުން އަޅާ ފިޔަވަޅުތަކާ މެދު "އަލުން ވިސްނުމަށާއި" އިސްރާއީލުގެ މައްޗަށް ފިޔަވަޅުއެޅުމުގެ ބަދަލުގައި ހަމާސް އަށް އިތުރަށް ފިޔަވަޅު އެޅުމަށެވެ.

"އިސްރާއީލުން އަމިއްލަ ދިފާޢުގައި ކުރާ ކަންތައްތަކަށް އެހާ ބޮޑަށް ޕްރެޝަރ ކުރުން ހުއްޓާލުމަށް ފަހު، ޔަހޫދީން މެރުމަށް ގަސްތުގައި ހަމާސް އިން ހިންގާ ހަނގުރާމަވެރި ޢަމަލުތަކުގެ މައްޗަށް ފިޔަވަޅު އެޅުމަށް" ހަކަބީ ގޮވާލެއްވިއެވެ.

މި އިންޓަވިއުގައި ހަކަބީ ދެއްކެވި ވާހަކަތަކުން ދޭހަ ވަނީ، އެމެރިކާގެ ކުރީގެ ސަރުކާރުތަކުން ގެންގުޅުނު ދެ ދައުލަތުގެ ހައްލަށް ތާއީދު ކުރުމުގެ ސިޔާސަތަށް ބޮޑު ބަދަލެއް އައިސްފައިވާ ކަމެވެ. އޭނާގެ ބަސްތަކުން ކުން ހާމަވަނީ ޓްރަމްޕް އިދާރާ އިން ފަލަސްޠީނު ދައުލަތެއް އުފެއްދުމަށް އިސްކަމެއް ނުދޭކަމެވެ.