ލުބުނާންގައި ތިބި ޗައިނާގެ ރައްޔިތުން އެގައުމު ދޫކޮށް ދިއުމަށް ބުރާސްފަތި ދުވަހު ޗައިނާ ސަރުކާރުން އަންގައިފިއެވެ.
ޗައިނާ އެމްބަސީން ނެރުނު ބަޔާނުގައި އެ ގައުމުގެ ރައްޔިތުންނަށް "ވީހާވެސް އަވަހަކަށް" ލުބުނާނުން ފުރައިގެން ދިއުމަށް އިރުޝާދު ދީފައިވެއެވެ.
މި ބަޔާން ޗައިނާގެ އެމްބަސީން ނެރުނު އިރު ބުދަ ދުވަހު އިޒްރޭލުން ހަމަލާދީ ލުބުނާންގައި ހުރި ފަލަސްތީނުގެ އިސް ހަނގުރާމަވެރިއެއް ވަނީ މަރާލާފައެވެ.
"ފަހަކަށް އައިސް ލުބުނާން-އިޒްރޭލު ސަރަހައްދީ އިމުގައި ހިނގާ ހަމަނުޖެހުން ދަނީ ހޫނުވަމުން. އަދި ލުބުނާންގެ ސަލާމަތީ ކަންކަން ވަނީ ނުރައްކާތެރި އަދި އޮޅުންބޮޅުން ބޮޑު ހާލަތެކެއްގައި،" ބެއިރޫތުގައި ހުންނަ ޗައިނާގެ އެމްބަސީގެ ބަޔާނުގައި ބުނެފައިވެއެވެ.
ލުބުނާންގެ ދެކުނު ސަރަހައްދަށާއި ނަބަތިއްޔާ ސަރަހައްދަށް ދަތުރުކުރާ ފަރާތްތަކަށް ރަތް އިންޒާރު (އިންތިހާއަށް ނުރައްކާތެރި) އަދި އެހެން ސަރަހައްދުތަކުގެ އޮރެންޖް އިންޒާރު (ވަރަށް ނުރައްކާތެރި) ނެރެފައިވާ ކަމަށް ޗައިނާ އިން ނެރުނު ބަޔާނުގައި ބުނެފައިވެއެވެ.
ޗައިނާ އިން އެގައުމުގެ ރައްޔިތުންނަށް ދީފައިވާ އިރުޝާދުގައި ބުނެފައިވަނީ ލުބުނާނުގައި އަދި މި ވަގުތު ކޮމާޝަލް ފްލައިޓް އޮޕަރޭޓް ކުރާ ކަމަށާއި، ފްލައިޓް ދަތުރުތައް ކުރާ ދަނޑިވަޅުގައި ފުރުސަތުގެ ބޭނުން ހިފުމަށެވެ.
ލުބުނާނުގައި ދިރިއުޅޭ އެހެން ބައެއް ގައުމުތަކުގެ ރައްޔިތުން ވެސް ލުބުނާން ދޫކޮށް ދިއުމަށް އެ ގައުމުތަކުގެ ސަރުކާރުތަކުން ވަނީ އަންގާފައެވެ.
