ޕިލިޕީންސްގައި އާދަޔާ ޚިލާފަށް ހޫނު ގަދަވުމުގެ ސަބަބުން ވެރިރަށް މެނީލާގެ 10 ވަރަކަށް ސްކޫލް ހިމެނޭހެން އެތައް ސަތޭކަ ސްކޫލެއްގައި ކިޔަވައިދިނުން މެދުކަނޑާލައިފިއެވެ.

ހޫނު ގަދަވެގެން ބަންދުކޮށްފައި ވަނީ މެނީލާގެ އެންމެ އާބާދީ ބޮޑު ސަރަހައްދު ކަމަށްވާ ކުއެންޒޯންގެ ޕްރައިމަރީ އަދި ސެކަންޑްރީ ސްކޫލްތަކެވެ. އެހެން ސަރަހައްދުތަކުގެ ސްކޫލްތަކަށް ރިޕޯޓު ލާނިންއަށް ބަދަލުކުރުމުގެ އިހްތިޔާރު ދީފައިވާ ކަމަށް އޮފިޝަލުން ހާމަކުރެއެވެ. މެނީލާގެ ބައެއް ސްކޫލްތަކުން ވަނީ ސްކޫލްގައި ކުދިން ހޭދަކުރާ ވަގުތު މަދުކޮށްފައެވެ.

ފިލިޕީންސްގެ ދެކުނުގައި އޮންނަ މިންޑަނައޯގެ ބައެއް ސަރަހައްދުތަކުގެ ސްކޫލްތައްވެސް ވަނީ ސްކޫލްގައި ކިޔަވައިދޭ ގަޑިތައް ކުރުކޮށްފައެވެ.

ފިލިޕީންސްގައި އިހްސާސްކުރެވޭ ހޫނުމިންވަރު އިއްޔެ ވަނީ 42 ޑިގްރީ ސެލިސިއަސްއަށް އަރައިފައެވެ. އެ މިންވަރު މިއަދު 43 ޑިގްރީ ސެލްސިއަސްއަށް އަރާނެ ކަމަށް ވަނީ ލަފާކޮށްފައެވެ.

އަންގާރަ ދުވަހު އަސްލު ރެކޯޑުކޮށްފައިވާ ހޫނު މިނަކީ 32 ޑިގްރީ ސެލްސިއަސްއެވެ.

ސާޅީސް ދެ ޑިގްރީ ސެލްސިއަސް އާއި 51 ޑިގްރީ ސެލްސިއަސް އާއި ދެމެދުގައި ހޫނުމިން މަތިވާނަމަ، ބޮލުގައި ރިއްސުމާއި ވަރުބަލިވުން ފަދަ ކަންކަން މެދުވެރިވެ ހޫނުވުމުގެ ސަބަބުން ސްޓްރޯކެއް ޖެހުންވެސް އެކަށީގެންވާ ކަމަށް މޫސުމާބެހޭ އިދާރާއިން ބުނެއެވެ.

ބައެއް ސަރަހައްދުތަކުގައި ފިނިހޫނުމިން 40 ޑިގްރީ ސެލްސިއަސް އަށް ވުރެ މައްޗަށް ގޮސްފައިވާއިރު، ހީޓް އިންޑެކްސް 41 ޑިގްރީ ސެލްސިއަސް (106 ޑިގްރީ ފެރަންހައިޓްސް) އަށް ވުރެ މައްޗަށް ދިއުމާ ގުޅިގެން މެނީލާ އިން ވަނީ އޭޕްރީލް މަހުގެ 12 ވަނަ ދުވަހާ ހަމައަށް ސަރުކާރު އަދި ޕްރައިވެޓް ސްކޫލްތައް ވަގުތީ ގޮތުން ބަންދުކުރަން އަންގާފައެވެ.

ކްލާސް ސަސްޕެންޝަންތައް ތަންފީޒު ކުރުމުގައި ޕަމްޕަންގާ، ބުލަކަން އަދި ކެވިޓް ފަދަ އެހެން ސަރަޙައްދުތައް ވެސް އެގޮތަށް އަމަލުކުރިއެވެ.

ހޫނުގަދަވުމުގެ ސަބަބުން ކަރަންޓް ގްރިޑްތައް ހަލާކުވެ، ފެނުގެ ދަތިކަން ކުރިމަތިވެ، ހީޓް ސްޓްރޯކް ފަދަ ސިއްހީ ނުރައްކާތައް ވަނީ ބޮޑުވެފައެވެ.

މި މޫސުމަކީ ޓްރޮޕިކަލް އާކިޕެލަގޯ ގައުމަށް އާދަޔާ ހިލާފު މޫސުމެއް ނަމަވެސް ތަޖުރިބާކާރުން ބުނަނީ މި އަހަރުގެ ހޫނު ގަދަވުމަކީ ފާއިތުވި 60 އަހަރުގެ ތެރޭގައި ހޫނު އެންމެ ގަދަވި ފަހަރު ކަމަށެވެ.

މޫސުމަށް އަންނަ ބަދަލުތަކުގެ ސަބަބުން ފިލިޕީންސާއި ދެކުނު އިރުމަތީ އޭޝިއާގެ އެކި ކަންކޮޅުތަކުގައި މިފަދަ ނުރައްކާތެރި ހާދިސާތައް ދަނީ އިތުރުވަމުންނެވެ.