ފިލިޕީންސްގެ އިންތިޚާބު – ފެރޑިނާންޑް ބޮންގް ބޮންގް މާރކޯސް އިންތިޚާބު ކާމިޔާބުކުރުމާ ދިމާއަށް

ފިލިޕީންސްގައި ކުރިއަށްދާ ރިޔާސީ އިންތިޚާބުގައި، ފެރޑިނަންޑް ބޮންގް ބޮންގް މާރކޯސް ޖޫނިއަރ، އިންތިޚާބު ކާމިޔާބުކުރުމުގެ އުއްމީދު ބޮޑުކަމަށް ބައިނަލްއަގުވާމީ މީޑިއާތަކުން ރިޕޯޓްކޮށްފިއެވެ.

ބައިނަލްއަގުވާމީ މީޑިއާތަކުގައި ރިޕޯޓްކޮށްފައިވާ ގޮތުން، މިހާތަނަށް ގުނާފައިވާ ވޯޓުތަކުގެ އަދަދު ދައްކާގޮތުން، ފިލިޕީންސްގައި 20 އަހަރު ވަންދެން ޚުދުމުޚުތާރު ވެރިކަމެއް ކުރެއްވި ފަރޑިނަންޑް އެމަނުއެލް އެޑްރަލިން މާރކޯސްގެ ހަމައެކަނި ފިރިހެން ދަރި ބޮންގް ބޮންގް ވަނީ ވޯޓުން ކުރި ހޯދާފައެވެ.

ނުރަސްމީ ތަފާސް ހިސާބުތައް ދައްކާގޮތުން، މިހާތަނަށް ގުނާފައިވާ ވޯޓުގެ 61.05 އިންސައްތަ ނަތީޖާ ބުރަވަނީ ބޮންގް ބޮންގްއަށެވެ. އެއީ 20 މިލިއަން ވޯޓެވެ. އޭނާއާ އެންމެ ކައިރިން ވޯޓު ލިބިފައިވަނީ މިހާރުގެ ނައިބުރައީސް އަދި ކުރީގެ އިންސާނީ ހައްގުތަކުގެ ވަކީލު ލެނީ ރޮބްރެޑޯއެވެ. ލެނީއަށް މިހާތަނަށް ލިބިފައިވަނީ 9.5 މިލިއަން ވޯޓެވެ.

ނަމަވެސް މިހާތަނަށް އައިއިރު ގުނާފައިވަނީ ކޮން ސަރަހައްދުތަކުގެ ވޯޓެއް ކަމެއް ނޭނގެއެވެ. އަދި ބޮންގް ބޮންގް ކުރިހޯދާފައިވަނީ އޭނާއަށް ސަޕޯޓް އޮތް ހިސާބުތަކުން ކަމެއް ވެސް ސާފެއްނޫނެވެ.

އާންމުންގެ ޚިޔާލު ހޯދުމަށް ކުރިއަށް ގެންދިޔަ ސަރވޭއެއް ދައްކާގޮތުން، ބޮންގް ބޮންގް މި އިންތިޚާބު ކާމިޔާބުކުރާނެކަމަށް ވަނީ ބެލެވިފައެވެ.