ވެކްސިން ފުރިހަމަކޮށްފައިވާ ފަތުރުވެރިންނަށް ފެބްރުއަރީ މަހު ފިލިޕީންސް ހުޅުވާލަނީ

ވެކްސިން ފުރިހަމަކޮށްފައިވާ ފަތުރުވެރިންނަށް ފެބްރުއަރީ މަހުގެ 10 ވަނަ ދުވަހުން ފެށިގެން ފިލިޕީންސް ހުޅުވާލުމަށް އެގައުމުން ނިންމައިފިއެވެ.

ކޮވިޑްގެ ޕެންޑަމިކްގެ ސަބަބުން އިނދަޖެހިފައިވާ އެގައުމުގެ ފަތުރުވެރިކަން ނަގާ ކޮޅަށް ޖެހުމަށް ފިލިޕީންސް ހުޅުވާލުމަށް އެންމެ ފުރަތަމަ މަސައްކަތްކުރީ މިދިޔަ އަހަރުގެ ޑިސެމްބަރ މަހުއެވެ. ނަމަވެސް އޮމިކްރޯން ވޭރިއަންޓްގެ ސަބަބުން އެޕްލޭނަށް އަމަލުކުރުން ވަނީ ފަސްކޮށްފައެވެ.

ފިލިޕީންސް ސަރުކާރުން ބުނާގޮތުގައި ވިސާއާ ނުލާ އެގައުމަށް އެތެރެވުމުގެ ހުއްދަ ލިބިފައިވާ 150 ގައުމެއްގެ ރައްޔިތުންނަށް އެގައުމު ހުޅުވާލާނެއެވެ.

މީގެ އިތުރުން ފިލިޕީންސް ސަރުކާރުން ބުނާގޮތުގައި އެގައުމަށް އަންނަން ބޭނުންވާ އެގައުމުގެ ރައްޔިތުންނަށް ފެބްރުއަރީ 1ން ފެށިގެން ކަރަންޓީނުވުމަކާ ނުލާ އެގައުމަށް އެތެރެވެވޭނެއެވެ. އަދި ފެބްރުއަރީ 10ން ފެށިގެން އެހެން ގައުމުތަކުގެ ރައްޔިތުންނަށް އެގައުމަށް އެތެރެވެވޭއިރު އެމީހުން ވާންޖެހޭނީ ވެކްސިން ފުރިހަމަކޮށްފައިވާ ކޮވިޑް-19ގެ ނެގެޓިވް ޓެސްޓެއް ހިފައިގެން އަންނަ ބަޔަކަށެވެ.

ފިލިޕީންސް އަށް އެންމެ ގިނައިން ފަތުރުވެރިން އަންނަ ގައުމުތަކުގެ ތެރޭގައި ހިމެނެނީ ޖަޕާން، ދެކުނު ކޮރެއާ އަދި ޗައިނާއެވެ. އެގައުމަށް ފަތުރުވެރިން އައި ނިސްބަތް މިދިޔަ އަހަރު ވަނީ 83 އިންސައްތަ ދަށްވެފައެވެ.