ބޮލުގެ އިސްތަށި ބޭނުންކުރަނީ ކުރެހުން އުފައްދަން

ޖެސްޓޮނީ ގާރސިއާ އޭނާގެ ޓްރިމަރު ނަގައިގެން މަހަކު އެއްފަހަރު އެކި ގޮތްގޮތަށް އަމިއްލައަށް ބޯ ކޮށަނީ، އިސްތަށިގަނޑު ދިގުވެގެނެއް ނޫނެނެވެ. އޭނާ އެއްކުރަމުންދަނީ އޭނާގެ ޝައުގުވެރިކަން އެކަމަށް ހުސްވެފަައިވާ އާރޓްގެ މަސައްކަތަށް ސާމާނު އެއްކުރުމަށެވެ.

ހިމަ ބުރުހަކާއި، ރެސިން ބޭނުން ކޮށްގެން، ފިލިޕީންސްގެ ވެރިރަށް މެނީލާގައި ހުންނަ ސްޕްރިންކްސް ސެލޫންގެ ވެރިޔާ ޖެސްޓޮނީ އިސްތަށި ބޭނުންކޮށްގެން ހުދު ކެންވަސްއެއްގައި އޭނާގެ މަސައްކަތް ފަށައެވެ. އޭނާގެ މަސައްކަތަށް ދެގަޑި އިރާއި ފަސް ގަޑި އިރު ހޭދަވެއެވެ. މުޅި ކުރެހުން އެއްކޮށް ނިންމާލާއިރު ކޮންމެވެސް ލަވަކިޔުންތެރިއެއް ނުވަތަ އެކްޓަރެއްގެ ކުރެހުން އިސްތަށިން އޭނާ ހަދާލައެވެ.

އުމުރުން 32 އަހަރުގެ ޖެސްޓޮނީ އަކީ ސީމަނެކެވެ. އަހަރަކު 8 މަސް އޭނާ ހޭދަކުރަނީ ކަނޑުމަތީގައި ކްރޫޒް ބޯޓެއްގައެވެ. ކަނޑުމަތީގައި އުޅޭއިރު، އޭނާގެ މަސައްކަތަށް ބޭނުންވާ ކުލައާއި ކަރުދާސް ލިބުމަކީ އުނދަގޫ ކަމެކެވެ. ތަކެތި ލިބުމުގެ ދަތިކަމާއެކު އެންމެ ފަހުން 2021 ވަނަ އަހަރު އޭނާ ފެށީ އަމިއްލަ އިސްތަށި ބޭނުންކޮށްގެން މަންޒަރު ކުރެހުމަށެވެ. އެގޮތުން އޭނާގެ އަމިއްލަ ޕޯޓްރެއިޓް ހެދުމަށްފަހު ދެން އޭނާ ފެށީ ސެލެބްރިޓީންގެ ކުރެހުންތައް ހެދުމަށެވެ.

ސެލޫންގައި ހޭދަކުރާ ވަގުތަށްވުރެ ކަނޑުމަތީގައި ހޭދަކުރާ ވަގުތު ދިގުވުމާއެކު އޭނާގެ އަމިއްލަ އިސްތަށި ބޭނުން ކުރުން ނޫން ގޮތެއް ނޯވެއެވެ. އެކަމަށް އޭނާ ބޮލުގެ ދެފަރާތުން އިސްތަށި ކޮށުމަށްފަހު އެ ބޭނުން ކުރެއެވެ.

ޖެސްޓޮނީ ބުނީ އާރޓުގެ މަސައްކަތުގެ ތެރޭގައި އުޅެން ޖެހުމުން އޭނާގެ ސްޓްރެސް ކުޑަވާ ކަމަށާއި، އެކަމުގެ ސަބަބުން ނަފްސާނީ އަދި ޖިސްމާނީ ދުޅަހެޔޮކަން އިތުރުވާ ކަމަށެވެ. އޭނާ ބުނީ ޑިޕްރެޝަނަށް ފަރުވާ ހޯދޭނެ ތަނެއް ނެތް ކަމަށާއި، އޭނާއަށް ފަރުވާއަކީ އާރޓުގެ މަސައްކަތް ކުރުން ކަމަށެވެ. އަދި އޭނާގެ މަސައްކަތް ވިއްކަން ބޭނުންވާ ކަމަށް ވެސް ޖެސްޓޮނީ ބުނެއެވެ.