ފިލިޕީންސްގެ އުތުރުގައި އޮންނަ މައި ޖަޒީރާ ލޫޒޯންގެ އަބްރާ ޕްރޮވިންސްއަށް ބާރުގަދަ ބިންހެލުމެއް އައުމުގެ ސަބަބުން ހަތަރު މީހުން މަރުވެ ފަސްދޮޅަހަކަށް މީހުންނަށް އެކި އަނިޔާތައް ލިބިއްޖެއެވެ.
އެތާގަޑިން ހެދުނު އަށްގަޑި ސާޅީސް ތިނެއް ހާއިރު، ރިކްޓަރ މިންގަނޑުން ހަތެއް މެގްނެޓިއުޑްގެ ބާރު މިނުގައި އައި މި ބިންހެލުމުގެ ސަބަބުން ބައެއް އިމާރާތްތައްވެސް ވެއްޓިފައިވާ ކަމަށް ޚަބަރު ލިބެއެވެ. ލޫޒޯންއަކީ އެންމެ ބޮޑު މައި ޖަޒީރާއަށް ވެފައި އެންމެ އާބާދީ ގިނަ ހިސާބެވެ. ބިންހެލުމުގެ ސަބަބުން 400 ކިލޯމީޓަރު ދުރުގައިވާ ވެރިރަށް މެނީލާގެ އުސް ޓަވަރު ތައްވެސް ގުޑާފައިވާ ކަމަށް ޚަބަރު ލިބެއެވެ.
ބިންހެލުމުގެ ސަބަބުން މަރުވި މީހުންގެ ތެރޭގައި ވެއްޓުނު ކޮންކްރިޓް ސްލެބަކުން ބޮލުގައި ޖެހުނު ދެމީހުންނާ އަދި އެހެންވެސް އަނިޔާތަކުން މަރުވި ދެމީހުން ހިމެނެއެވެ. އަނިޔާވި މީހުންނަށް ހޮސްޕިޓަލުގައި ފަރުވާ ދެމުން ދާއިރު މަރުވާ މީހުންގެ އަދަދު އަދިވެސް އިތުރުވާނެ ކަމަށް ދަނީ ބެލެމުންނެވެ.
ފިލިޕީންސްއަށް މިއަދު މިއައި ބިންހެލުމަކީ ގިނަ އަހަރުތަކެއްގެ ތެރޭ އައި އެންމެ ބާރުގަދަ ބިންހެލުން ކަމަށް ޚަބަރު ލިބެއެވެ. ބިންހެލުމުގެ ސަބަބުން ބައެއް އިމާރާތްތައް ވެއްޓުމުގެ އިތުރުން ފަރުބަދަ މަތިން ކިސަޑު ފައިބާ ބައެއް އިމާރާތްތައް ވަނީ ވަޅުޖަހާފައެެވެ. އަދި ތިރިޔަށް ފޭބި ކިސަޑުގަނޑު މަގުތަކުމަތީ ދެމޭ ގޮތްވެ އެތައް މަގުތަކެއްވެސް ވަނީ ބަންދުވެފައެވެ.
