ފިލިޕީންސް އަށް އެރި ތޫފާނުގައި މަރުވި މީހުންގެ އަދަދު 123ހަށް

ފިލިޕީންސް އަށް އެރި ތޫފާނުގައި މަރުވި މީހުންގެ އަދަދު 123ށް އަރާފައިވާކަމަށް ރިޕޯޓުތައް ބުނެފިއެވެ.

ތޫފާނުގެ ސަބަބުން ގެއްލުނު މީހުން ހޯދުމުގެ މަސައްކަތް ހުއްޓާނުލައި ކުރިއަށް ގެންދާނެ ކަމަށް ފިލިޕީންސްގެ އަސްކަރިއްޔާއިން ބުރާސްފަތި ދުވަހު ވައުދުވެފައިކަމަށް ރޮއިޓަރސް އިންވަނީ ރިޕޯޓުކޮށްފައެވެ. އަދި އެގައުމުގެ އަސްކަރިއްޔާގެ މަސައްކަތުން ހޯދި ހޯދުންތަކުން މި ކާރިސާގައި މަރުވި މީހުންގެ އަދަދު 123ށް އަރާފައިވާކަމަށް އެނޫހުން ވަނީ ރިޕޯޓުކޮށްފައެވެ. އަދި މީގެ ތެރެއިން 80އަށް ވުރެ ގިނަ މީހުންނަކީ ބޭބޭ ސަރަހައްދުގައި ދިރިއުޅެމުން އައި މީހުން ކަމަށް އެގައުމުގެ ސަރުކާރާ ހަވާލީ ވަނީ ރިޕޯޓުކޮށްފައެވެ.

ފިލިޕީންސްއަށް އެރި ތޫފާން މެގީ އަކީ މިއަހަރު އެގައުމަށް އެރި ފުރަތަމަ ތޫފާނެވެ. މި ތޫފާނުގެ ސަބަބުން ފެންބޮޑުވެ ބިންގަނޑު ކަނޑާއިގެން ދިޔުމުގެ ހާދިސާތައް ހިނގާފައިވާއިރު، އެގައުމުގެ ސަރުކާރުގެ އެންމެ ފަހުގެ އަދަދުތައް ދައްކާގޮތުން 230ށް ވުރެ ގިނަ މީހުންނަށް ވަނީ އެކިވަރުގެ އަނިޔާތައް ލިބިފައެވެ.

ގަޑިއަކު 65 ކިލޯމީޓަރުގެ ގަދަ ވަޔާ އެކު ފިލިޕީންސްއަށް މެގީ އަރާފައި ވަނީ މިދިޔަ އާދީއްތަ ދުވަހުއެވެ. މިތޫފާނުގައި އެގައުމަށް ބޮޑެތި ގެއްލުންތަކެއް ވެފައިވާއިރު އެތައް ބައެއްގެ ގެދޮރު ވަނީ ގެއްލިފައެވެ.

ރިޕޯޓުތައް ބުނާގޮތުން މިހާތަނަށް 162،000ށް ވުރެ ގިނަ މީހުންގެ ގެދޮރު ގެއްލި އިވެކުއޭޝަން ސެންޓަރުތަކަށް ވަނީ ބަދަލުކުރެވިފައެވެ. މީގެ އިތުރުންވެސް އެހެން ތަންތަނަށް ދިރިއުޅުން ބަދަލުކުރި މީހުންގެ އަދަދު 41،000ށް އަރާނެ ކަމަށް ރިޕޯޓުތައް ބުނެއެވެ.