ފިިލިޕީންސަށް އައި ބިންހެލުމެއްގައި އެކަކު މަރުވެ 4 މީހަކަށް އަނިޔާވެއްޖެ

ފިލިޕީންސްގެ ދެވަނައަށް އެންމެ ބޮޑު ރަށްކަމަށްވާ މިންޑަނާއޯއަށް ބާރުގަދަ ބިންހެލުމެއް އައުމުގެ ސަބަބުން މާބަނޑު އަންހެނަކު މަރުވެ، އިތުރު ބަޔަކަށް އަނިޔާ ލިބި، އަދި 9 މީހުން ގެއްލިފައިވާކަމަށް ޚަބަރު ލިބެއެވެ.

ބިންހެލުމާ ގުޅިގެން ޑިފެންސް ސެކްރެޓަރީ ގިލްބަރޓް ޓިއޮޑޯރޯ ވިދާޅުވީ ބިންހެލުމުގެ ސަބަބުން 529 އާއިލާއަށް އެކަމުގެ އަސަރު ކޮށްފައިވާ ކަމަށެވެ.

ޔޫއެސް ޖިއޮލޮޖިކަލް ސަރވޭއިން ދައްކާގޮތުގައި ހޮނިހިރު ދުވަހުގެރޭ 10:37ގައި އައި މި ބިންހެލުން އައިސްފައި ވަނީ 7.6ގެ ބާރުމިނުގައެވެ. ބިންހެލުމަށްފަހު ހަޔަކަށްވުރެ ބާރުގަދަކޮށް އާފްޓަރ ޝޮކްތަކެއްވެސް އައިސްފައި ވެއެވެ.

ފިލިޕީންސަށް އައި ބިންހެލުމާ ގުޅިގެން ސުނާމީގެ އިންޒާރުވެސް ނެރެފައި ވެއެވެ. ނަމަވެސް ފަހުން ވަނީ އިންޒާރު ބާތިލުކޮށްފައެވެ.

އަލިފާން ފަރުބަދައާއި ބިންހެލުންފަދަ ކަންކަމާބެހޭ ފިލިޕީންސްގެ އިދާރާއިން ބުނެފައިވާގޮތުގައި، ބިންހެލުމުގެ ބާރު މިނަކީ 7.4 އެވެ. އަދި މަދުވެގެން 600އެއްހާ އާފްޓަރ ޝޮކް އައިސްފައި ވެއެވެ.

ފުރަތަމަ ބިންހެލުން އައުމާ ގުޅިގެން، އައްސޭރިފަށުގައި ދިރިއުޅޭ ފަރާތްތައް އުސް ހިސާބުތަކަށް ބަދަލުކޮށްފައި ވެއެވެ. ބިންހެލުން އައުމާއެކު ގިނަބަޔަކު ގެތަކުން ނިކުމެ، ހުސް ތަންތަނަށް ވަނީ ޖަމާވެފައެވެ. އަދި ހޮސްޕިޓަލްތަކުން ބަލިމީހުންވެސް ނެރެފައިވާކަމަށް ޚަބަރުތައް ބުނެއެވެ. އަދި އެހެން ހިސާބެއްގައި ޑިޒާސްޓަރ ސެންޓަރަކަށް އެންމެން ޖަމާވެފައި ވެއެވެ.

ޑިޒާސްޓަރ އޮފިޝަލަކު އޭއެފްޕީއަށް މައުލޫމާތު ދީފައިވާގޮތުގައި ބިންހެލުމުގެ ސަބަބުން ތަންތަނަށް ގެއްލުން ލިބުނު ކަމަކަށް ނުބެލެވެއެވެ. ނަމަވެސް ގެއްލުމެއް ލިބިފައިވޭތޯ އޮފިޝަލުން އަވަށްތައް ޗެކް ކުރަމުންދާކަމަށް އޭނާ މައުލޫމާތު ދީފައިވެއެވެ.

މިންޑަނާއޯއަށް މީގެ ދެހަފުތާ ކުރިންވެސް 6.7ގެ ބާރު މިނުގައި ބިންހެލުމެއް އައިސް 9 މީހުން މަރުވެފައި ވެއެވެ. އަދި ޝޮޕިންގ މޯލެއްގެ ފަންގިފިލާ ވެއްޓިފައިވެއެވެ.