ފިލިޕީންސްގެ ޔުނިވަރސިޓީއެއްގައި އާދިއްތަ ދުވަހު ދިން ބަޑީގެ ހަމަލާއެއްގައި 3 މީހުން މަރުވެއްޖެއެވެ.
މި ހަމަލާގައި މަރުވެފައިވަނީ ފިލިޕީންސްގެ ދެކުނު އަވަށެއް ކަމަށްވާ ލެމިޓަންގެ ކުރީގެ މޭޔަރު ރޮސިޓާއާއި އޭނާގެ އެސިސްޓެންޓާއި އަދި ޔުނިވަރސިޓީގެ ގާޑެކެވެ. މި ހަމަލާ ދީފައިވަނީ އެޓެނިއޯ ޑި މަނީލާ ޔުނިވަރސިޓީގެ ގްރެޖުއޭޝަން ހަފްލާއަށް އެ ޔުނިވަރސިޓީގެ ގިނަ އަދަދެއްގެ ދަރިވަރުންނާއި ބެލެނިވެރިން ގޮސް އުޅެނިކޮށެވެ.
އެ ގައުމުގެ ފުލުހުންނާ ހަވާލާދީ ބޭރުގެ މީޑިއާތަކުން ރިޕޯޓްކޮށްފައިވާގޮތުގައި، މިއީ ރޮސިޓާއަށް އަމާޒުކޮށްގެން ދިން ހަމަލާއެކެވެ. އަދި ހަމަލާ ދިން މީހާއަކީ ފައިސާއަށް މީހުން މަރާ މީހެއްކަމަށް ޝައްކުކުރެވޭ ކަމަށްވެސް އެ ގައުމުގެ ފުލުހުން ވަނީ ބުނެފައެވެ.
ބަޑީގެ ހަމަލާ ދިން މީހާ ވަނީ އަތުލައިގެންފައެވެ. ނަމަވެސް އޭނާގެ ތަފްސީލެއް މިހާތަނަށް ހާމަކޮށްފައެއްނުވެއެވެ. ޔުނިވަރސިޓީގެ ގާޑުންނާ އޭނާއާ ދެމެދު ހިނގި ހަމަލާ ބަދަލުކުރުމުގައި އޭނާއަށްވެސް އެކިވަރުގެ އަނިޔާ ވަނީ ލިބިފައެވެ. އޭނާ ހައްޔަރުކޮށްފައިވަނީ ހަމަލާ ދިނުމަށްފަހު ފިލަން އުޅުމުގެތެރޭގައެވެ.
