ކެންސޭލޯގެ ނުރުހުން ސިޓީ އަށް!

ސްޕެއިންގެ ބާސެލޯނާ އަށް ކުޅެމުން އަންނަ ޕޯޗުގަލްގެ ޑިފެންޑަރު ޔާއޯ ކަންސޭލޯގެ ނުރުހުން، މެންޗެސްޓަރ ސިޓީ އަށް އަމާޒު ކޮށްފި އެވެ.

އުމުރުން 29 އަހަރުގެ ކުޅުންތެރިޔާ ބާސެލޯނާ އަށް ކުޅެމުން އަންނަނީ ލޯނު އެއްބަސްވުމެއްގެ ދަށުންނެވެ. މިދިޔަ އަހަރު އޭނާ ބާސެލޯނާ އަށް ބަދަލުވީ، އެއް އަހަރު ދުވަހުގެ ލޯނު އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު މި ސީޒަންގެ ނިޔަލަށް ހަމަވާއިރު، ބާސެލޯނާ އިން ބޭނުން ވަނީ އޭނާ އެ ކުލަބުގައި ބަހައްޓަން ކަމަށް މީޑިއާ ރިޕޯޓުތައް ބުނެ އެވެ.

ސިޓީގައި ހުރުމަށްފަހު ބާސެލޯނާ އަށް ބަދަލުވި ކަންސޭލޯއާ ގުޅޭ ގޮތުން އެކި ވާހަކަތައް ވަނީ ފެތުރިފަ އެވެ. އެކަމާ ގުޅޭ ގޮތުން ވާހަކަ ދައްކަމުން ކަންސޭލޯ ބުނީ، އޭނާއާ ގުޅުވައި ސިޓީގައި ދައްކަމުން އަންނަނީ ހަގީގަތާ ޚިލާފު ވާހަކަތަކެއް ކަމަށެވެ. އަދި އޭނާ އަކީ ސިޓީގެ އެހެން ކުޅުންތެރިންނަށް ގޯސް މީހެއް ނޫން ކަމަށް ވެސް އޭނާ ބުންޏެވެ.

އިތުރަށް ވާހަކަ ދައްކަމުން ކަންސޭލޯ ބުނީ، އޭނާގެ ގެއިން ވައްކަން ކުރި ދުވަސް ނޫން، ޖެހިގެން އައި ދުވަހު ވެސް އޭނާ ދިޔައީ ސިޓީ އާއެކު އާސެނަލާ ދެކޮޅަށް ކުޅެން ކަމަށެވެ. އެ ބިރުވެރި ޙާލަތުގައި ވެސް އޭނާގެ އަންހެނުންނާއި ދަރިފުޅު ދޫކޮށް، ސިޓީއާއެކު ދާނީ ކިހާވަރެއްވީމަތޯ ކަންސޭލޯ ވަނީ ސުވާލު އުފައްދައިފަ އެވެ. ކަންސޭލޯ ފާހަގަ ކުރި ގޮތުގައި އެ ކަންކަަމަކީ ހަނދާނުން ވެސް ފޮހެލަން އުނދަގޫ ކަންތައްތަކެވެ.

މީގެ އިތުރުން އޭނާ ބުނީ، ސިޓީގައި އޭނާއާ ދެކޮޅަށް ވާހަކަތައް ދައްކަމުން އަންނަ ކަމަށާއި، އޭނާއާމެދު ޝުކުރުވެރިވުމެއް ނެތް ކަމަށެވެ. އެކަން ފާހަގަކޮށް ކަންސޭލޯ ބުނީ އޭނާ އަކީ ސިޓީ އަށް މުހިންމު ކުޅުންތެރިޔަކަށްވި ކަމަށާއި، އޭނާގެ ފަރާތުން ސިޓީ އަށް ގިނަ ޚިދުމަތްތަކެއް ވެސް ކޮށްދެވުނު ކަމަށް އުންމީދު ކުރާ ކަމަށެވެ.

ކަންސޭލޯ ވަނީ މިހާތަނަށް ބާސެލޯނާ އަށް ކުޅެދިން 32 މެޗުގައި ހަތަރު ލަނޑު ޖަހައިފަ އެވެ. އޭނާ އަކީ ބާސެލޯނާގެ ކޯޗު ޒަވީ ހެނާންޑޭޒް އިސްކަން ދެމުން އަންނަ ކުޅުންތެރިޔެކެވެ. އަނެއްކޮޅުން ބާސެލޯނާގެ އިސްވެރިން ވެސް ބޭނުން ވަނީ އޭނާ އެ ކުލަބުގައި ބަހައްޓާށެވެ.