މަސްތުވާތަކެތި އެތެރެކޮށް ވިޔަފާރިކުރި ކަމުގެ ތުހުމަތުގައި 2 މީހަކު ހައްޔަރުކޮށް ބަންދުކޮށްފި
ހައްޔަރުކޮށް ބަންދުގެ މުއްދަތު ޖަހާފައިވަނީ 27 އަހަރުގެ ދިވެހި ފިރިހެނަކާއި 24 އަހަރުގެ ދވެހި ފިރިހެނެއް
ފުލުހުން އަތުލައިގަނެފައިވާ މަސްތުވާތަކެތި
މަސްތުވާތަކެތި އެތެރެކޮށް ވިޔަފާރިކުރި ކަމުގެ ތުހުމަތުގައި 2 މީހަކު ހައްޔަރުކޮށް ބަންދުކޮށްފިއެވެ.
މި މައްސަލައިގައި ހައްޔަރުކޮށް ބަންދުގެ މުއްދަތު ޖަހާފައިވަނީ 27 އަހަރުގެ ދިވެހި ފިރިހެނަކާއި 24 އަހަރުގެ ދވެހި ފިރިހެނެކެވެ. މި މައްސަލައަކީ ދިވެހިރާއްޖެއަށް މަސްތުވާތަކެތި އެތެރެކޮށް ގެންގުޅެ އެތަކެތީގެ ވިޔަފާރި ކުރާކަމުގެ ތުހުމަތުކުރެވޭ މައްސަލައެވެ.
މި މައްސަލައިގައި ހައްޔަރު ކުރި 27 އަހަރުގެ މީހާގެ ބަންދަށް ދީފައިވަނީ 15 ދުވަހެވެ. އަދި 24 އަހަރުގެ މީހާގެ ބަންދަށް ދީފައިވަނީ 5 ދުވަހެވެ. އެ ދެމީހުން ބަންދުކުރުމަށް ކްރިމިނަލް ކޯޓުން އަމުރުކޮށްފައިވަނީ ކަސްޓޯޑިއަލް ޖަލެއްގައެވެ.
ބަންދުގައި ބެހެއްޓުމަށް އަމުރުކުރި ސަބަބެއްގެ ގޮތުގައި ބުނެފައިވަނީ ތުހުމަތުކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވުމާއި، ތަހުގީގު ބަޔާނާއި މޯލްޑިވްސް ކަސްޓަމްސް ސަރވިސްގެ މައްސަލަ ހަވާލުކުރާ ލިޔުުން ހުށަހަޅާފައިވާ ކަމަށެވެ.
އަދި އޭނާ ބަންދުކުރުން ނިންމީ ޖިނާއީ އިޖުރާއަތުގެ ގާނޫނޫގެ ދަށުން މުޖްތަމައުގެ ސަލާމަތާ ރައްކާތެރިކަމަށްޓަކައި ކަމަށާއި، ޝަރީއަތްކުރުމާއި ބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގައި ހިމެނޭ ކަންކަން ފުރިހަމަވާ ކަމަށް ބެލެވޭކަމަށް އަމުރުގައި ބުނެފައިވެއެވެ.
ހައްޔަރުކޮށްފައިވާ 2 މީހުންނަކީ ވެސް ހައްޔަރު ބަންދުގެ ރެކޯޑެއް ނެތް މީހުންނެވެ. ނަމަވެސް 27 އަހަރުގެ މީހާގެ ބައިވެރިވުން އޮތްކަމަށް ބެލެވޭ އިރު، މަސްތުވާތަކެތި ހުރި ޕެކޭޖާއި ލޮޖިސްޓިކް ޕްރޯއާއި ގުޅުމެއް އޮތްކަމަށް ބެލެވޭ އިރު، ލޮޖެކްޓިކް ޕްރޯ އާއި އޭނާއާއި ގުޅުމެއް އޮތްކަމަށް ބެލެވޭ ކަމަށް ބުނެފައިވެއެވެ. އަދި އެ ޕެކޭޖަކީ އޭނާގެ އެއްޗެއް ކަމަށް މި މައްސަލައިގައި ހިމެނޭ 24 އަހަރުގެ މީހާ ބުނެފައިވެއެވެ.
އަދި 24 އަހަރުގެ މީހާ އެހެން ބުނެފައިވީނަމަވެސް، ޕެކޭޖާއި ހަވާލުވުމުގެ ކަންކަން ކޮށްފައިވަނީ އޭނާކަމަށް އަމުރުގައި ބުނެފައިވެއެވެ. އަދި ހުޓުވުނު އިރު ޕެކޭޖް އޮތީ އޭނާގެ އަތުގައި ކަމަށް ބުނެފައިވެއެވެ. އަދި އޭނާގެ ވަކީލުންނާ ބައްދަލުކުރެވޭ ގޮތް ވެފައި ނުވާތީ ކުރުމުއްދަތެއް ދިނުމަށް ވަކީލު އެދިފައިވެއެވެ. އަދި 5 ދުވަސް 24 އަހަރުގެ މީހާއަށް ދީފައިވަނީ އެހެންވެއެވެ.
