ކައުންސިލުގެ ބަޔާނަށް ދެއްވާނެ ރައްދެއް އޮތްތޯ ރައީސް އަރިހުގައި ދެންނެވިން، ރައީސް ވިދާޅުވީ އެފަދަ ކަމެއް ނުކުރައްވަމޭ: އެލްޖީއޭ
ދިދައަށް ހުރުމަތްތެރިކޮށް ހިތަން ޖެހޭހެން ރައީސުލްޖުމްހޫރިއްޔާގެ އޮފީހަށްވެސް ހުރުމަތްތެރިކޮށް ހިތަންޖެހޭނެކަމަށް ވިދާޅުވި
އެލްޖީއޭ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވާ ރަސްމީ ދަތުރުފުޅުތަކުގައި ރަށްތަކަށް ވަޑައިގެން، ސިޔާސީ ކެމްޕޭނު ކުރެއްވުން ކުށްވެރިކޮށް ނ. ކެނދިކުޅުދޫ ކައުންސިލުން ނެރުނު ބަޔާން ބާތިލު ނުކުރި ނަމަވެސް އަޅާނެ އިތުރު ފިޔަވަޅެއް ނެތްކަމަށް އެލްޖީއޭގެ ޗީފް އެގްޒެކެޓިވް އޮފިސަރު (ސީއީއޯ) ޑރ. މަރްޔަމް ޒުލްފާ ވިދާޅުވެއްޖެއެވެ.
ޒުލްފާ ވިދާޅުވީ، އެކަމާ ގުޅިގެން އެ އިދާރާއިން އިތުރަށް އަޅާނެ ފިޔަވަޅެއް ނެތް ކަމަށެވެ. އެގޮތުން ކައުންސިލަކުން ބަޔާނެއް ނެރޭ ކޮންމެ ފަހަރަކު އެ ބަޔާނަކާ ގުޅިގެން އެލްޖީއޭއިން ވަގުތުތަކެއް ހުސް ނުކުރެވޭނެކަމަށްވެސް އޭނާ ވިދާޅުވިއެވެ.
އެއީ ޤާނޫނާއި ޤަވާއިދުތަކާ ޚިލާފާށް ނެރެފައިވާ ބަޔާނެއް ނަމަ، އެކަމަކާއި ގުޅިގެން ކައުންސިލުތަކަށް އެލްޖީއޭއިން ނަސޭޙަތްތެރިވާނެކަމަށް ވެސް އޭނާ ވިދާޅުވިއެވެ.
ޒުލްފާ އިތުރަށް ވިދާޅުވީ، ކެނދިކުޅުދޫ ކައުންސިލުން ނެރުނު ބަޔާން އަމާޒުވަނީ ރާއްޖޭގެ ރައީސުލްޖުމްހޫރިއްޔާއަށް ކަމަށެވެ.
އޭގެ އިތުރުން، ދިވެހިރާއްޖޭގެ ރައީސުލްޖުމްހޫރިއްޔާއަކީ ދިވެހި ހުރިހާ ރައްޔިތުންގެ ވޯޓުގެ އަޣުލަބިއްޔަތުން ހޮވިވަޑައިގަންނަވާ ބޭފުޅެއްކަން ފާހަގަ ކުރައްވައި ޒުލްފާ އިތުރަށް ވިދާޅުވީ، ދިދައަށް ހުރުމަތްތެރިކޮށް ހިތަން ޖެހޭހެން ރައީސުލްޖުމްހޫރިއްޔާގެ އޮފީހަށްވެސް ހުރުމަތްތެރިކޮށް ހިތަންޖެހޭނެ ކަމަށެވެ.
އެހެންކަމުން އެ ބަޔާން ރައްދުވާ ފަރާތުން އެލްޖީއޭއިން މައުލޫމާތު ސާފުކޮށްފައިވާނެކަމަށާއި، އެއީ ކައުންސިލުން ބުނެފައިވާ ގޮތަށް ހިނގާފައިވާ ކަމެއް ނޫންކަން ރައީސްގެ ފަރާތްފުޅުން ޔަޤީންކަން ދެއްވާފައިވާކަމަށް ޒުލްފާ ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވާ ރަސްމީ ދަތުރުފުޅުތަކުގައި ރަށްތަކަށް ވަޑައިގެން، ސިޔާސީ ކެމްޕޭނު ކުރެއްވުން ކުށްވެރިކޮށް ނ. ކެނދިކުޅުދޫ ކައުންސިލުން ނެރުނުބަޔާނުންއަރައިގަތީ ރައީސްގެ ކަރާމާތަށް ކަމަށާއި، އެ ބަޔާން ބާތިލްކުރުމަށް އެލްޖީއޭ އިން އެ ކައުންސިލަށް ވަނީ އަންގާފައެވެ.
އެހެންނަމަވެސް ކައުންސިލުން ހޯމަ ދުވަހު ވަނީ އެ ބަޔާން ބާތިލު ކުރެވެން ނެތްކަމަށް ނިންމާފައެވެ.
