ދައުލަތުގެ ޚަރަދުތައް ކުޑަކުރުމަށް އަދި ޚާއްސަކޮށް ރިކަރަންޓް ޚަރަދުތައް ކުޑަކުރުމަށް ގިނަ ފިޔަވަޅުތަކެއް އެޅުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމަވައި އެކަން ހާމަކުރެއްވީ 27 ޖޫން 2024 ގައެވެ. އެކްސްގައި ކުރެއްވި ޕޯސްޓެއްގައި ރައީސް ވިދާޅުވެފައިވަނީ ދައުލަތުގެ ޚަރަދުތައް ކުޑަކުރުމަށް އަޅުއްވާ ފިޔަވަޅުތަކުގެ ތެރޭގައި ސިޔާސީ މަގމުތައް މަދުކުރުމާއި، އެކި މުނާސަބަތުތަކުގައި ބާއްވާ ޙަފުލާތަކަށް ކުރާ ޚަރަދުތައް ކުޑަކުރުން ނުވަތަ ނުބޭއްވުން ހިމެނޭކަމަށެވެ.

އެގޮތުން ކުޅިވަރުތަކާއި ރިޝެޕްޝަން ފަދަ ކަންކަން ނުބޭއްވުމަށާއި، މިނިވަން ދުވަސް ފާހަގަކުރުމަށް ހަމައެކަނި ޖަލްސާއެއް ބާއްވައި ޚަރަދުތައް އެތައް ގުނައަކުން ކުޑަކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށް ވެސް ރައީސް ވިދާޅުވެފައިވެއެވެ. އަދި މީގެ އިތުރުން ވެސް ގިނަ ފިޔަވަޅުތަކެއް ކުރިޔަށް އޮތް ދުވަސްތަކުގައި އަޅުއްވާނެކަމަށް ރައީސް ވިދާޅުވެފައިވެއެވެ.

ރައީސްގެ ހަރަދު ކުޑަކުރުމުގެ ސިޔާސަތަށް މަހަކަށް ވުރެ ގިނަ ދުވަސްވެފައިވާއިރު، ސިޔާސީ މަގާމުތަކަށް މީހުން އައްޔަން ކުރުމަކަށް ނިމުމެއް ނާދެއެވެ. ބޮޑެތި މުސާރަތަކަށް އަދިވެސް ދަނީ ސިޔާސީ ބޭފުޅުން އައްޔަން ކުރައްވަމުންނެވެ. އިގްތިސާދީ ހާލަތު ވަރަށް ނުރައްކާތެރި ފައްތަރެއްގައި އޮތް ކަމަށް މިސަރުކާރުގެ ބޭފުޅުން ވިދާޅުވި ނަމަވެސް ކޮންމެހެން ބޭނުންނުވާ މަގާމުތައް އުފައްދައިގެން އެމަގާމުތަކަށް ވެސް ބޭފުޅުން ހޯދުމަށް ވަނީ އިއުލާން ކޮށްފައެވެ. އެގޮތުން 55،000 ރުފިޔާ އާއި 50،000 ރުފިޔާ މުސާރަ ލިބޭ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ފަސް މެނޭޖިންގ ޑިރެކްޓަރުން، އެކިއެކި މުއައްސަސާތަކަށް 40،000 ރުފިޔާއަށް ވުރެ މަތިން ސެކްރެޓަރީ ޖެނެރަލް ހޯދުމަށް ސަރުކާރުން ދަނީ މަސައްކަތް ކުރަމުންނެވެ. ނަމަވެސް އާދައިގެ ވަަޒީފާތަކުން މުވައްޒަފުން ދަނީ ވަކިކުރަމުންނެވެ. އޮގަސްޓް މަހުގެ 15 ގެ ނިޔަލަށް ފެނަކަ ކޯޕްރޭޝަނުން އެކަނި ވެސް 700ށް ވުރެ ގިނަ މުވައްޒަފުން ވަޒީފާއިން ވަކިކޮށްފައިވެއެވެ. މިއީ ރައީސް މުއިއްޒުގެ ހަރަދު ކުޑަ ކުރުމުގެ ސިޔާސަތަށް ވެދާނެއެވެ.

މީގެ އިތުރުން ހަރަދު ކުޑަ ކުރުމަށް ހަފްލާތައް ނުބާއްވާނެ ކަމަށް ރައީސް މުއިއްޒު ވިދާޅުވި ނަމަވެސް މިނިވަން ދުވަހާއި ގުޅިގެން ބޭއްވި ހަފްލާގައި އެކަނި ވެސް އެމަނިކުފާނު ވާހަކަފުޅު ދެއްކެވުމަށް 1 ގަޑީއިރާ 15 މިނެޓް ހޭދަ ކުރެއްވިއެވެ.

ފާއިތުވާ ކޮންމެ ދުވަހަކީ އެތައް ރަސްމިއްޔާތުތަކެއްގެ މަންޒަރުތައް ފެންނަ ދުވަހެކެވެ. ރައީސުލް ޖުމްހޫރިއްޔާގެ އިވެންޓްތަކެވެ. ފަސްޓްލޭޑީގެ އިވެންޓްތަކެވެ. ވަޒީރު ބޭފުޅުންނާ އެމްޑީންގެ އިވެންޓްތަކެވެ. ދިވެހި ރާއްޖެ މި ފަހުގެ ތާރީޚް ގައި ނުދެކޭފަދަ އިވެންޓްފުލް ސަރުކާރެކެވެ. ތާކުންތާކު ނުޖެހޭ ކަންކަމުގައި މިހާ ގިނަ ރަސްމިއްޔާތު ބާއްވާ ސަރުކާރެއް ދުނިޔޭގެ އެއްވެސް ގައުމެއްގައި އޮންނާނެ ކަމަކަށް ނުފެނެއެވެ. ކޯޓު ފަޓުލޫނު ކޮޅުގައި ދިދަޖެހި ކާރުކޮޅުގައި ވަޑައިގަންނަވާ މަންޒަރުތައް ދައްކާލައްވަން އެއް ވަޒީރަކަށް ވުރެ ކުރީގައި އަނެއް ވަޒީރަކު އުޅުއްވާހެންވެސް ބައެއް ފަހަރު ހީވެއެވެ. ޚަރަދުގެ މައްޗަށް ޚަރަދެވެ.

ސަރުކާރުގެ ވަޒީރުންނާއި، ސިޔާސީ އެކިއެކި ބޭފުޅުން ރާއްޖޭން ބޭރަށް ކުރައްވަމުންދާ ދަތުރުފުޅުތައް ވެސް ޚަރަދު ކުޑަކުރުމުގެ ސިޔާސަތުގެ ދަށުން ވީ އިތުރެވެ. ވަޒީރަކު ދެ ވަޒީރަކު ނުވަތަ މަޖިލީހުގެ އިއްޒަތްތެރި މެމްބަރުންގެ ބޮޑެތި ވަފުދުތައް ރާއްޖޭން ބޭރުގައި ނެތް ހަފްތާއެއް ފާއިތުވެގެން ގޮސްފައެއް ނުވެއެވެ.

މިލިއަނަކަށް ވުރެ ގިނަ ރުފިޔާ ހުސްކޮށްލެއްވުމަށް ޕެރިސް 2024 އޮލިމްޕިކްސް ފެށުމުގެ ރަސްމިއްޔާތުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް 24 ޖުލައި 2024 ގައި ފުރާވަޑައިގެންނެވިއެވެ. ރާއްޖެއަށް ވަޑައިގެންނެވީ 28 ޖުލައި 2024 ގައެވެ. އަދި "ރައްކާ" ޕްރޮގްރާމަށް 10 އަހަރު ފުރުން ފާހަގަކުރުމަށް ފުވައްމުލައް ސިޓީގައި ބޭއްވި ހަފުލާގައި ބައިވެރިވެވަޑައިގެންނެވުމަށް ވެސް ނައިބު ރައީސްގެ އިތުރުން ސަރުކާރުގެ ވައުފެއް ވަޑައިގެންނެވިއެވެ. ސިވިލް ސަރވިސް މުވައްޒަފުންގެ ފުލް ސްޕޮންސަރ ތަޖުރިބާ ދަތުރުތައް ކެންސަލް ކޮށް، މިހެން ގިނަ ބާއްވާ ގިނަ ރަސްމިއްޔާތުތަކާއި ހަފްލާތަކަށް ސިޔާސީ ބޭފުޅުން ވަޑައިގަންނަވާއިރު، މިއީ ރައީސް މުއިއްޒުގެ ހަރަދު ކުޑަ ކުރުމުގެ ސިޔާސަތަށް ހަމަ ވެދާނެއެވެ.

މިހިސާބުން ނިމުނީއެއް ނޫނެއެވެ. ސަރުކާރު ޕްރޮމޯޓް ކުރުމަށް ސަރުކާރުގެ މުއައްސަސާތަކުން ދަނީ އެކިއެކި މައުރަޒުތަކާ ހަފްލާތައް ބާއްވަމުންނެވެ. އަދި އަދި ބައެއް ސެންޓަރުތަކުގެ ނަން ބޯޑު ބަދަލުކޮށްލުމަށް ވެސް ހަފްލާތައް ދަނީ ބާއްވަމުންނެވެ. "ނޭޝަނަލް ޖޮބް ސެންޓަރ" ގެ ނަން "ނޭޝަނަލް ކެރިއަރސް ސަރވިސް" ގެ ނަމަށް ބަދަލުކޮށް އެކަން ވެސް ވަނީ ފާހަގަކޮށްފައެވެ. މިކަހަލަ އޮއްޓަރެއް ނެތް ގިނަ ކަންކަމަށް ސަރުކާރުން ހެސްކިޔާފައި ޚަރަދު ކުރަމުން، ރައްޔިތުން ގާތުގައި މި ބުނަނީ ގަރުދިޔަ އާއި ބަތާ ކައިގެން ޚަރަދު ތައް ކުޑަކުރާށެވެ.