މިއީ ގާނޫނީ ހީލަތް ހަދަމުންދާ ސަރުކާރެއް، ގާނޫނަށް ބަދަލުތައް ގެންނަމުންދަނީ ވެސް ހީލަތުން ސަލާމަތްވުމަށް: ވަކީލު ނިޝާން
މި ފަސް އަހަރު ނިމުމުން މިސަރުކާރުގެ ބޭފުޅުންގެ ބާރުވެރިކަން ނެތިދާނެ
ފަލަސުރުހީ ޕްރޮގްރާމްގައި މަޝްހޫރު ގާނޫނީ ވަކީލް މުހައްމަދު ނިޝާން އިބްރާހިމް ވާހަކަދައްކަވަނީ
މިއީ ގާނޫނީ ހީލަތް ހަދަމުންދާ ސަރުކާރެއް ކަމަށާއި، ގާނޫނަށް ބަދަލުތައް ގެންނަމުންދަނީ ވެސް ފަހަށް އޮތްތަނުގައި ހީލަތުން ސަލާމަތްވުމަށް ކަމަށް މަޝްހޫރު ގާނޫނީ ވަކީލް މުހައްމަދު ނިޝާން އިބްރާހިމް ވިދާޅުވެއްޖެއެވެ.
އަންގާރަ ދުވަހުގެ ރޭ ކުރިއަށް ގެންދިޔަ ރާއްޖެޓީވީގެ ފަލަސުރުހީ ޕްރޮގްރާމްގައި ވަކީލް ނިޝާން ވިދާޅުވީ ރާއްޖޭގައި މިހާތަނަށް ކަންކަން ހިނގާފައި އޮތް ގޮތަށް ބަލާއިރު، މިސަރުކާރުގެ ފަސް އަހަރު ނިމުމުން މި ބޭފުޅުންގެ ބާރުވެރިކަން ނެތިދާނެކަން އެބޭފުޅުންނަށް އެނގޭ ކަމަށާއި، ގާނޫނު އަރާހަމަކޮށް ޖަވާބުދާރީވާންޖެހޭ ދުވަސް އަންނާނެ ކަމަށެވެ.
އެހެންކަމުން ގާނޫނު އަސާސީ މެދުވެރިކޮށް ސަލާމަތްވާނެ ގޮތްތައް އެބޭފުޅުން ހޯދާ ކަމަށާއި، މިހާރު މިގެންދަނީ ގާނޫނީ ހީލަތް ހެދުމުގެ މަސައްކަތްތައް ކަމަށް އޭނާ ވިދާޅުވިއެވެ.
ސަލާމަތްވެވޭ ގޮތަށް ބައިވަރު ގާނޫނުތައް ގެންނާނެކަން ފާހަގަކުރައްވައި ނިޝާން ވިދާޅުވީ ސުޕްރީމްކޯޓުގެ ބެންޗު ބަދަލުކުރުމާއި، އިލެކްޝަން ކޮމިޝަނާއި، އެންޓި ކޮރަޕްޝަން ކޮމިޝަންގެ ރައީސްއާއި، ނައިބު ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް ގާނޫނުން ބާރު ދީފައިވަނީ އެ އުސޫލުގެ ދަށުން ކަމަށް ނިޝާން ވިދާޅުވިއެވެ.
މި ސަރުކާރުގައި މިވީ ދެ އަހަރު ދުވަސްވެގެން ދިޔައިރު އަޅުގަނޑުމެންނަށް ފާހަގަކުރެވުނު އެކި ގޮތްގޮތަށް ގާނޫނު ގެނެސްގެން މިބޭފުޅުންގެ އަމާޒު ހިފާފައިމިހުރީ މިބޭފުޅުންގެ ވެރިކަމުގައި ނުވަތަ މިބޭފުޅުންގެ ޒައާމަތުގައި މިބޭފުޅުންނަށް ދިގު މުއްދަތަކަށް ނުތިބެވޭނެކަން އެނގޭތޯ. ރައްޔިތުން ކޮންމެވެސް ހަމައަކުން ނިންމާ ގާނޫނީ ގޮތުން އިހުތިޔާރު ލިބޭ ހިސާބެއް އެބައާދޭ. އެހެންވީމަ އެހިސާބުން ނިންމީމަ އެބޭފުޅުން ގާނޫނީ ގޮތުން ބެލިކަމުގައި ވިޔަސް 5 އަހަރު އިންނާނީ ޖުމްލަ އަހަރަކަށް. ބާކީ ތިން އަހަރު. އެހެންވީމަ މިބޭފުޅުންނަށް އެބަ ޔަގީންވޭ އެބޭފުޅުންގެ ކަންތައްތައް ހުރި ގޮތުން ކުރިއަށް އޮތްތާގައި މިބޭފުޅުން ވެރިކަމުގައި ނުތިބޭނެކަން މިބާރުތައް ނިމިގެންދާނެކަން. އެހެންވީމަ މިބޭފުޅުން ކަންތައްތައް ކުރަމުން މިގެންދަނީ ރައްޔިތުންގެ މަޖިލިސް ބޭނުންކޮށްގެން ގާނޫނީ އިމުގެ ތެރެއިން ފިޓުކޮށްފައި އަޅުގަނޑުމެން މިއަށް ކިޔައީ ގާނޫނީ އިމުގެ ތެރެއިން ހީލަތް ހެދުން. ގާނޫނީ ހީލަތް ބަހަކީ. އެހެންވީމަ ގާނޫނީ ހީލަތްތައް ބޭނުންކޮށްގެން މިބޭފުޅުން ސަލާމަތްވާ ގޮތަށް ގާނޫނު މަތިކުރީމަ ކުރީއޭ. މާދަމާ ޖަވާބުދާރީވާންޖެހުނީމަ މިސާލަކަށް އެބޭފުޅުން ބާރު ކެނޑުނީމަ މިބޭފުޅުން ގެންނާނެ ޖަވާބުދާރީވާން ޖެހޭ ތަންތަނަށް ގެންނާނެ''މަޝްހޫރު ގާނޫނީ ވަކީލް މުހައްމަދު ނިޝާން އިބްރާހިމް
ނޫސްތަކުގެ ރަޖިސްޓްރީ ބާތިލު ކުރުމާއި ބޮޑެތި އަދަދުތަކުން ޖޫރިމަނާ ކުރެވޭނެ އުސޫލުތަކެއް ހިމަނައި، ސަރުކާރަށް މީޑިއާ ކޮންޓްރޯލް ކުރެވޭ ގޮތަށް ފަރުމާކޮށް މިމަހުގެ 19ވީ އަންގާރަ ދުވަހު ރައްޔިތުންގެ މަޖިލީހަށް ހުށަހެޅި ބިލަށް އިޝާރާތް ކުރައްވައި ނިޝާން ވިދާޅުވީ އެއީ ބާރުތައް ހަނިކޮށް، ރައްޔިތުންގެ އަގަމަތީގައި ޓޭޕް އެޅުވުމުގެ މަގުސަދުގައި ސަރުކާރުން ކުރާ ކަމެއް ކަމަށެވެ. އަދި ވިދާޅުވީ އެމްޑީޕީން ނޫން ސަރުކާރެއް އަންނަ ކޮންމެ ފަހަރަކު މިފަދަ ކަންކަން ގައުމުގައި ސަރުކާރުގެ ބޭފުޅުން ކުރާނެ ކަމަށެވެ.
މީގެ ކުރީގައި ވެސް އެއްކަމެއް މިއަންނަނީ. މީގެ ކުރީގައި އެމްޑީޕީ ނޫން ސަރުކާރުތަކުގައި އޮތްއިރުގައި ބަންނަން ފަށާފައި އޮތް ދޯންޏެއް މިއީ. އެދޯނި މައްޗަށް މަޑޫ ޖަހަމުން މިދަނީ. އެހެންވީމަ ދޯނީގެ ކިއްސަރަކަށް ބަދަލެއް ނާންނާނެ މަޑޫ ޖެހިއަސް. އެ ކިއްސަރު އިންނާނީ އިންގޮތަށް. އޭތިފުޅާ ވާނީ އެނގޭތޯ.އެހެންވީމަ މަޑޫ ޖަހަމުން މިގެންދަނީ.މަޝްހޫރު ގާނޫނީ ވަކީލް މުހައްމަދު ނިޝާން އިބްރާހިމް
ނިޝާން ވިދާޅުވީ ރާއްޖޭގެ ހާލަތު ރައްޔިތުންނަށް އެނގޭ ކަމަށާއި، ސަރުކާރުގެ ތެރޭގައި ހިނގާ ގޯސްކަންތައްތަކާއިި، ޖަރީމާތައް އެނގޭ ކަމަށެވެ. ސިއްރުން ރައީސްގެ މޭޒުމަތީގައި ބާއްވާ ކަރުދާސްކޮޅު ލީކުވާއިރު، މިފަދަ ބިލަކުން އަދި ރައްޔިތުންނަށް ކަންކަން އޮޅުވާނުލެވޭނެ ކަމަށް އޭނާ ވިދާޅުވިއެވެ. އަދި ވިދާޅުވީ އަނިޔާވެރި އަމަލުތަކުގެ ވާހަކަ ދައްކާ ލިޔާނެ ބަޔަކު ގައުމުގައި ތިބޭނެ ކަމަށާއި، އެކަން ނުހުއްޓުވޭނެ ކަމަށެވެ.
