ރައްޔިތުން އެއްބާރުލުންދީ މަގުތަކަށް ނުނުކުމެއްޖެނަމަ ރާއްޖެ ދުވަހަކު ވެސް ނުދެކޭހާ ފަހަތަށް ސޮއްސާލައިގެންދާނެ - މީކާއިލް
މީޑިއާ ބިލުން އިސްލާމިކް މިނިސްޓަރުގެ ދަރިކަލުން އެތެރެކުރި ވޭޕުގެ ވާހަކަ ކުރިއަށް އޮތްތަނުގައި ނުދެއްކޭނެ
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
ރައްޔިތުން އެއްބާރުލުންދީ މަގުތަކަށް ނުނުކުމެއްޖެނަމަ ރާއްޖެ ދުވަހަކު ވެސް ނުދެކޭހާ ފަހަތަށް ސޮއްސާލައިގެންދާނެ ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.
އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޕާލަމެންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި މެންބަރު މީކާއިލް ވިދާޅުވީ މިހާރު ހުށަހެޅިގެން އުޅޭ މީޑިއާ ބިލުން ނުދެއްކޭނެ ކިތަންމެ ވާހަކައެއް އެބައޮތް ކަމަށެވެ. އެގޮތުން ދާދި ފަހުން އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދުގެ ދަރިކަލުން މާހިލް އެތެރެކުރި ވޭޕުގެ ވާހަކަ ކުރިއަށް އޮތްތަނުގައި ނުދެއްކޭނެ ކަމަށެވެ. އަދި ޔޫތް އެޑްވައިޒަރީ ބޯޑުގައި ތިއްބަވާ ޒުވާނުން ހިންގާ ޖަރީމާތަކުގެ ވާހަކަ މީޑިއާތަކުގައި ނުދެއްކޭނެކަމަށް މީކާއިލް ވިދާޅުވިއެވެ.
މީކާއިލް ވިދާޅުވީ ރައީސް ޑރ. މުހައްމަދު މުއިއްޒު ކިތައްމެ ވަރަކަށް އިތުރުފުޅު ހެއްދެވިޔަސް އެމަނިކުފާނަކީ 'ކައްޒާބު' ގެ ގޮތުގައި މީޑިއާގައި ދެން ސިފަ ނުކުރެއްވޭނެ ކަމަށާއި، މިދެވެނީ ފަހަތަށް ކަމަށެވެ. މީކާއިލް ވިދާޅުވީ ރައްޔިތުން އެއްބާރުލުންދީ މަގުތަކަށް ނުނުކުމެއްޖެނަމަ ގަބޫލުކުރައްވަނީ ރާއްޖެ ދުވަހަކު ވެސް ނުދެކޭހާ ފަހަތަށް ސޮއްސާލައިގެން ދާނެ ކަމަށެވެ.
އަޅުގަނޑު އިލްތިމާސްކުރަން އެމްޑީޕީއާއެކު ހުރިހާ ބޭފުޅުންވެސް މި ސަރުކާރު ޖަވާބުދާރީ ކުރުމަށް އަދި މި ސަރުކާރު ހަމަމަގަށް އެޅުވުމަށް އެއްބާރުލުން ދެއްވުމަށް.ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މެންބަރު މީކާއިލް ވިދާޅުވީ މަޖިލިސް ފެށިގެން ދިޔައީ މަޖިލީހުގެ އިމްތިޔާޒަށް ފޮރިން މިނިސްޓަރ ޑރ. އަބްދުﷲ ޙަލީލު އަރައިގަނެފައިވާތީ މަޖިލީހުގެ ތަޅުމަށް މައްސަލައެއް ހުށަހަޅައިގެން ކަމަށެވެ. ނަމަވެސް ޕީއެންސީގެ ސުޕަރ މެޖޯރިޓީގެ ބާރު ބޭނުންކޮށްގެން ކަނޑައެޅިގެން ސާފުކޮށް ފެންނަން އޮތްކަމެއްގައި އިތުރުފުޅު ހެއްދެވުމުން ވެސް އެއީ ނުވާކަމެއްގެ ގޮތުގައި ހަދާފައިވާ ކަމަށް މީކާއިލް ވިދާޅުވިއެވެ.
މީކާއިލް ވިދާޅުވީ މަޖިލީހުގެ ގަވާއިދުގައި ހަފްތާއަކު 3 ދުވަހު ޖަލްސާ ބާއްވަން ލާޒިމް ކަމަށާއި، ނަމަވެސް ހަފްތާގެ 3 ދުވަހު ޖަލްސާ ނުބާއްވާ ކަމަށެވެ. އަދި މަޖިލީހުގެ ގަވާއިދުގައި ބުނަނަނީ ރަސްމީ ބަންދު ދުވަސްތައް ހިމަނައިގެން 14 ދުވަސް ތެރޭގައި ވަޒީރުން މަޖިލީހަށް ޖަވާބުދާރީވުމަށް ހާޒިރުވާންޖެހޭނެ ކަމަށެވެ. ނަމަވެސް އެ އޮންނަ މުއްދަތުގައި ހާޒިރުވެވަޑައި ނުގަންނަވާ ކަމަށާއި، ހާޒިރުވާ ފަހަރުގައިވެސް މެންބަރުން ކުރާ ސުވާލުތަކަށް ޖަވާބު ދެއްވުމުގެ ބަދަލުގައި ބޮޑު ރިޔާސީ ބަޔާނެއް އިއްވާފައި ވަޒީރުން ވަޑައިގަންނަވާ ކަމަށް މީކާއިލް ވިދާޅުވިއެވެ.
