މާފަރު ފަޅަކީ ފެރިދޫގެ ބައެއްގެ ގޮތުގައި ހަމަ ޖައްސާ، އެ ފަޅުގައި ޕިކްނިކް އައިލެންޑެއް ހަދަނީ
ރަށުގެ މަގު ހެދުމާއި ނެރުގެ މައްސަލައަށް މި އަހަރު ޙައްލު ހޯދާނެ ކަމަށް ވިދާޅުވި
ރައީސް ޑރ މުއިއްޒު އއ. ފެރިދޫ ކައުންސިލާއި، އ.ތ.މ ކޮމިޓީ އާ ބައްދަލު ކުރެއްވުން
މާފަރު ފަޅަކީ އއ. ފެރިދޫގެ ބައެއްގެ ގޮތުގައި ކަނޑައަޅުއްވާ އެ ފަޅުގައި ޕިކްނިކް އައިލެންޑެއް ހެދުމަށް ނިންމަވާފައިވާ ކަމަށް ރައީސް ޑޮކްޓަރ މުޙައްމަދު މުޢިއްޒު ވިދާޅުވެއްޖެ އެވެ.
މުއިއްޒު މި ކަން ހާމަކުރެއްވީ، އެ އަތޮޅުގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި، ފެރިދޫ ރައްޔިތުންނާ ބައްދަލުކުރައްވައި އަންގާރަ ދުވަހު ވާހަކަފުޅު ދައްކަވަމުންނެވެ.
ދޯނި އެހެލާ ސަރަޙައްދަކާއި ޕިކްނިކް އައިލެންޑެއް ތަރައްޤީ ކުރުމަށް މިއަދު ސޮއިކުރެއްވި މަޝްރޫޢަށް އިޝާރާތްކުރައްވަމުން މުއިއްޒު ވިދާޅުވީ، މި ޕިކްނިކް އައިލެންޑް ތަރައްޤީ ކުރައްވާނީ، މާފަރު ފަޅުގައި ކަމަށެވެ. އެ މަނިކުފާނު ވިދާޅުވީ، ފަތުރުވެރިކަމަށް ބަރޯސާވާ ރަށެއް ކަމުގައިވާ ފެރިދޫގެ ތަރައްޤީގެ މުސްތަޤުބަލަށްޓަކައި، ރަށަށް އާމްދަނީ ހޯދޭނެ ވަޞީލަތެއްގެ ގޮތުގައި އެ ފަޅު ބޭނުން ކުރެވޭނޭ ކަމަށެވެ.
މި ދަތުރުފުޅުގައި ފެރިދޫ ޞިއްޙީ މަރުކަޒުގެ އެކްސްޓެންޝަން ޢިމާރާތް ޤާއިމުކުރުމުގެ މަޝްރޫޢުގެ އެއްބަސްވުމާއި، އއ އަތޮޅު މަދަރުސާގެ މަލްޓިޕަރޕަސް ހޯލާއި ޢުމްރާނީ މަސައްކަތް ހަވާލުކުރުމުގެ އެއްބަސްވުމުގައި ވަނީ ސޮއިކޮށްފައެވެ.
ރައީސް ވިދާޅުވީ، ސްކޫލަށް ބޭނުންވާ އިންފްރާސްޓްރަކްޗަރ ޤާއިމު ކުރުމުގެ މަޝްރޫޢުގެ ޢަމަލީ މަސައްކަތް، ގިނަވެގެން ތިން މަސް ދުވަހުގެ ތެރޭގައި ފެށޭނޭ ކަމުގެ ޔަޤީންކަން ދެއްވާ ކަމަށެވެ.
ރަށުގެ މަގު ހެދުމުގެ މަޝްރޫޢުގެ ޢަމަލީ މަސައްކަތް މި އަހަރު ފައްޓަވާނޭ ކަމަށާއި، ނެރުގެ މައްސަލައަށްވެސް މި އަހަރު ޙައްލެއް ހޯއްދަވައި ދެއްވާނޭ ކަމަށް މުއިއްޒު ވިދާޅުވިއެވެ. އަދި ފުޓުބޯޅަ ދަނޑު ނިންމުމާއި ފިޓްނަސް އެންޑް ރިކްރިއޭޝަން ސެންޓަރާއި އައުޓްޑޯ ޖިމްގެ މަސައްކަތްވެސް މި އަހަރަށް ތާވަލު ކުރެވިފައިވާ ކަމަށް ވިދާޅުވިއެވެ.
ރަށުގައި އަޅާ މިސްކިތުގެ މަސައްކަތް މިހާރު އޮތީ، ބިން ކަނޑައެޅުމާ ހިސާބުގައިކަން ފާހަގަކުރައްވައި، އެ ކަމުގައި އުފެދިފައިވާ ޚިލާފު ނައްތާލުމުގެ ގޮތުން ރައްޔިތުންގެ ވޯޓެއް އަލުން ނެގުމަށްފަހު، ބިން ކަނޑައެޅުނުހާ އަވަހަކަށް، މިސްކިތުގެ މަސައްކަތް ފެށޭނެ ކަމަށް މުއިއްޒު ވިދާޅުވިއެވެ. އަދި ޤުރުއާނާބެހޭ މަރުކަޒުގެ އައުޓްރީޗް ސެންޓަރުގެ މަސައްކަތްވެސް ވަރަށް އަވަހަށް ފުރިހަމަ ވެގެންދާނެ ކަމަށް މުއިއްޒު ވިދާޅުވިއެވެ.
ފުލުހުންގެ މަރުކަޒު ޤާއިމުކުރުމުގެ ޢަމަލީ މަސައްކަތް މިއަދު ފެރިދޫގައި ފައްޓަވާފައިވީ ނަމަވެސް، އެ އިމާރާތް އެޅެންދެން ވެސް ރަށުގެ އަމަން އަމާންކަން ބެލެހެއްޓުމަށްޓަކައި ރަށުގައި ޤާއިމުވެ ތިބޭނޭ ތިން ފުލުހުން، މި ހަފުތާގެ ތެރޭގައި ފެރިދޫއަށް ފޮނުއްވާނޭ ކަމަށް މުއިއްޒު ވިދާޅުވިއެވެ.
މި ދަތުރުފުޅުގައި އެ ރަށުގެ ފެނާއި ނަރުދަމާގެ ޚިދުމަތްވެސް ވަނީ އިފްތިތާޙު ކޮށްފައެވެ. ފެނާ ނަރުދަމާ ގެ މަޝްރޫއަކީ ރައީސް ސާލިހް ގެ ސަރުކާރުން އެރަށުގައި ފެށި މަޝްރޫއެކެވެ.
މުއިއްޒު ވިދާޅުވީ، ރައްޔިތުން ގާތަށް ކުރައްވާ ޒިޔާރަތްތަކުގެ މަޤްޞަދަކީ ރައްޔިތުން އެދޭ ކަންކަން ރައްޔިތުން އެދޭ ގޮތަށް ކޮށްދެވޭކަން ޔަޤީން ކުރެއްވުން ކަމަށެވެ.
