އިނގިރޭސި ރަސްގެފާނު ކެންސަރު ބައްޔަށް ފަރުވާ ހޯއްދަވަނީ

އިނގިރޭސިވިލާތުގެ ރަސްގެފާނު ޗާލްސް ތިންވަނައަށް ކެންސަރު ޖެހިފައިވާ ކަން އެ ޤައުމުގެ ޝާހީ ގަނޑުވަރު, ބަކިންގްހަމް ޕެލެސްއިން ހާމަކޮށްފިއެވެ. 

އެކަން ހާމަކޮށް އެ ގަނޑުވަރުން އަންގާރަ ދުވަހު ނެރުނު ބަޔާނެއްގައި ބުނީ، ރަސްގެފާނު ޗާލްސްގެ ޕްރޮސްޓޭޓްގެ ފަރުވާއަކަށް ކުރެއްވި ޓެސްޓުތަކެއްގެ ތެރެއިން ކެންސަރު ޖެހިފައިވާ ކަން ހާމަވެފައިވާ ކަމަށެވެ.

އެއީ ކޮން ވައްތަރެއްގެ ކެންސަރެއް ކަމެއް އެ ގަނޑުވަރުން ހާމަކޮށްފައެއް ނުވާއިރު، ރަސްގެފާނު ޗާލްސްގެ ޕްރޮސްޓޭޓް ދުޅަވުމާ ގުޅިގެން، އެމަނިކުފާނަށް ލަންޑަން ކްލިނިކް ޕްރައިވެޓް ހޮސްޕިޓަލުގައި ތިން ދުވަހަށް ވަނީ ފަރުވާދީފައެވެ. އެ ފަރުވާތަކަށް ފަހު އެމަނިކުފާނު ހޮސްޕިޓަލުން ދޫކޮށްފައިވާ ކަމަށް އެ ބަޔާނުގައި ބުންޏެވެ.

ރަސްގެފާނު ޗާލްސްއަށް ކެންސަރު ޖެހިފައިވާކަން ހާމަވުމާއެކު، އެމަނިކުފާނުގެ ބައެއް ރަސްމީ ޒިންމާތައް މަދުކުރެވި، އެ ޒިންމާތަކުގެ ތެރެއިން ކުރައްވަން ޖެހިވަޑައިގަންނަވާ ބައްދަލުވުންތައް ވެސް ކެންސަލް ކުރައްވާފައެވެ. އެހެން ނަމަވެސް، ބައްޔަށް ފަރުވާ ހޯއްދަވައިގެން ރަސްމީ މަސައްކަތްތަކަށް އެނބުރި ނުކުންނަވަން ރަސްގެފާނު އުންމީދުކުރައްވާ ކަަމށް ވެސް އެ ބަޔާނުގައި ބުންޏެވެ.

އުމުރުފުޅުން 75 އަހަރުގެ ޗާލްސް އިނގިރޭސި ތަޚުތާ ހަވާލުވެޑައިގަތީ ހުސްވި 2022 ވަނަ އަހަރުގެ ސެޕްޓެމްބަރު މަހުގެ ތެރޭގައެވެ. އެގޮތުން އެއީ، މަންމާފުޅު ރާނީ އެލިޒަބަތް ދެވަނަ އަވަހާރަވުމާ ގުޅިގެންނެވެ.