"ވާރުތަވާ ރަސްކަމެއް އޮންނަން ޖެހޭނެ ކަމަކަށް ގަބޫލެއްނުކުރަން"

މެއި 6 ވީ ހޮނިހިރު ދުވަހަކީ، އިރެއްގައި ދުނިޔެ ދުށް އެންމެ ވަރުގަދަ އިސްތިއުމާރީ ބާރުގެގޮތުގައި އޮތް އިނގިރޭސިވިލާތުގެ ތާރީޚުގައި ލިޔެވިގެންދާނެ ދުވަހެކެވެ. އެއީ އެތައް އަހަރަކަށްފަހު، އެ ގައުމުގެ ޝާހީ ވެރިކަމުގެ ތަޚުތުގައި ރަސްކަލަކު ރަސްމީކޮށް ވެޑުވުނު ދުވަހެވެ. އިނގިރޭސިވިލާތުގެ އިތުރުން، ދުނިޔޭގެ އެކި ކަންކޮޅުތަކުން އެތައް މިލިއަން ބަޔަކު އެ ރަސްމިއްޔާތު ބަލަމުން ދިޔައީ ޝައުގުވެރިކަމާއެކުގައި ކަމަށް ވީނަމަވެސް، އިނގިރޭސިވިލާތުގައި މިއަދު ދަނީ ވިރާސީ ވެރިކަމާ ދެކޮޅު އަޑުފަށްގަނޑު ގަދަވަމުންކަން ފާހަގަކުރަން ޖެހެއެވެ.

އިނގިރޭސި ރަސްކަމުގެ ތަޚުތުގައި ރަސްގެފާނު ޗާލްސް 3 ވަނަ، ރަސްމީކޮށް ވެޑުވުމުގެ އިހުތިފާލުތައް ފެށުމުގެ ގަޑިއިރުތަކެއް ކުރިން، އިދިކޮޅު މުޒާހަރާތައް ވަނީ ފަށާފައެވެ. ރޮއިޓަރޒްއާ ވާހަކަ ދެއްކި އެކަކީ އުމުރުން 40ގެ އަހަރުތައް ގުނަމުންދާ ޓީޗަރެއް ކަމަށްވާ ކޮލީން ޑިއަރއެވެ. ޑިއަރ ބުނިގޮތުގައި، މިފަދަ ހާލަތަކަށް، ވާރުތަވެގެން އަންނަ ރަސްކަމެއް އޮންނަންޖެހޭ ކަމަކަށް އޭނާއަކަށް ގަބޫލެއް ނުކުރެވެއެވެ.

އިނގިރޭސިވިލާތުގައި އޮތް ރަސްކަމާ ދެކޮޅަށް ފާޅުގައި މަސައްކަތްތަކެއް ކުރަން ފެށި އެއް ހިސާބަކީ 1980ގެ ކުރީކޮޅެވެ. "ރިޕަބްލިކް"ގެ ނަމުގައި އުފެއްދި ގުރޫޕަކުން ކެމްޕޭން ކުރަމުން ދަނީ ދައުލަތުގެ އެންމެ އިސްވެރިޔަކީ އިންތިޚާބުކުރެވޭ މީހަކަށް ހެދުމަށެވެ. "ރިޕަބްލިކް"އިން އުއްމީދުކުރާގޮތުގައި ރަސްކަމުގެ ތަޚުތުގައި ޗާލްސް ވެޑުވުމަށް ކުރިއަށްދިޔަ އިހުތިފާލާ ދިމާކޮށް، ރަސްކަމާ ދެކޮޅަށް ކުރިއަށް ގެންދިޔަ މުޒާހަރާއަކީ، ތާރީޚުގައިވެސް އެ ގުރޫޕުން ކުރިއަށްގެންދިޔަ އެންމެ ވަރުގަދަ ހަރަކާތެވެ. ރަސްކަމުގެ ތަޚުތުގައި، ރަސްމީކޮށް ޗާލްސް ވެޑުވުމަކީ، އިނގިރޭސިވިލާތުގައި އޮތް ރަސްކަން ނިމުމަކަށް ގެނައުމަށް އެ ގުރޫޕަށް ލިބޭނެ އެންމެ ރަނގަޅު ފުރުސަތުކަމަށްވެސް "ރިޕަބްލިކް"އިން ގަބޫލުކުރެއެވެ.

ރަސްކަމާ ދެކޮޅު މުޒާހަރާތަކުގައި އިސްކޮށް ހުރި ގްރާމް ސިމިތުއާއި އަދިވެސް އިތުރު އެހެން މެންބަރުންތަކެއް ވަނީ ހައްޔަރުކޮށްފައެވެ.

48 އަހަރުގެ ޑޮލްޓަރ، ޖޭމްސް މެކްޑެމޮޓްއަށް މި ވާހަކަ އިވުނީ ގުރޫޕް ޗެޓެއްގެ ތެރެއިން ކަމަށް އޭނާ ބުނެއެވެ. އަދި މިއީ ޚުދުމުޚުތާރުކަމެއްގެ ގޮތުގައި އޭނާ ވަނީ ސިފަކޮށްފައެވެ.

"ތީ މަގޭ ރަސްގެފާނެއް ނޫން" މި ޝިއާރު ބޭނުންކޮށްފައިވާ ރީނދޫ ކުލައިގެ ޓީޝާޓްތަކުގައި އެތައް ބަޔަކު ވަނީ ލަންޑަނުގެ މަގުތަކަށް ނުކުމެފައެވެ. ތަޚުތުގައި ޗާލްސް ވެޑުވުމުގެ އިހުތިފާލާ ދިމާކޮށް، ސަލާމަތީ ފައުޖުތަކުގެ 11000 އެއްހާ މެންބަރުންވެސް ވަނީ މަގުތަކަށް ނެރެފައެވެ. މި އިހުތިފާލަކީ މިދިޔަ 70 އަހަރު ދުވަހުގެ ތެރޭގައިވެސް އިނގިރޭސިވިލާތުގައި ކުރިއަށް ގެންދިޔަ އެންމެ ބޮޑު އިހުތިފާލެވެ.