އިނގިރޭސި ރަސްގެފާނު ކިންގ ޗާލްސް ތިންވަނައި ގެ ދައުވަތަކަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު، އިނގިރޭސިވިލާތަށް ފުރާވަޑައިގެންފި އެވެ.

ރައީސް އޮފީހުން ބުނެފައިވާ ގޮތުގައި އެ ދަތުރުފުޅަކީ ބައިނަލްއަޤުވާމީ، މޫސުމީ ލަނޑުދަނޑިތައް ހާސިލްކުރުމަށް ގެންނަން ޖެހޭ ބަދަލުތައް ގެނައުމުގެ ގޮތުން ބައިނަލްއަޤުވާމީ ފެންވަރުގައި ކުރިއަށްގެންދާ ހައި-ލެވެލް ބައްދަލުވުމެއްގައި ބައިވެރިވަޑައިގަތުމަށް އެ މަނިކުފާނު ކުރައްވާ ދަތުރުފުޅެކެވެ.

ސަސްޓެއިނަބަލް މާކެޓްސް އިނީޝިއޭޓިވް (އެސްއެމްއައި) ގެ ފަރާތުން އިންތިޒާމުކޮށްގެން ކުރިއަށްގެންދާ "ހައި-ލެވެލް ބްރީފިންގ އޮން ޕްރައިވެޓް ކެޕިޓަލް މޮބިލައިޒޭޝަން" ބައްދަލުވުމަކީ ދުނިޔޭގެ ޑިވެލޮޕްމަންޓް ބޭންކްތަކާއި، ދުނިޔޭގެ ބޮޑެތި މާލީ މުއައްސަސާތަކުގެ އެންމެ އެިސްވެރިން ބައިވެރިވެވަޑައިގަންނަވާ ބައްދަލުވުމެއްކަން ފާހަގަކޮށްލެވެ އެވެ.

މި ބައްދަލުވުމުގައި މައިގަނޑުގޮތެއްގައި މަޝްވަރާކުރެއްވުމަށް ހަމަޖެހިފައިވާ ކަންކަމުގެ ތެރޭގައި މޫސުމީ ލަނޑުދަނޑިތައް ހާސިލްކުރުމަށް ގެންނަން ޖެހޭ ބަދަލުތައް ގެނައުމަށްޓަކައި ބައިނަލްއަޤުވާމީ ފެންވަރުގައި ކުރަންޖެހޭ މަސައްކަތްތަކަށް އެއްބާރުލުން ދިނުން ހިމެނެ އެވެ. މީގެ އިތުރުން ދެމެހެއްޓެނިވި ތަރައްޤީގެ ދުވެލި ހަލުވި ކުރުމާއި، ބައިނަލްއަޤުވާމީ ގުޅުންތައް ވަރުގަދަ ކުރުމާއި، ޕްރައިވެޓް ކެޕިޓަލް ބޭނުންކުރެވިދާނޭ ހާލަތުތަކާއި މެދު ވެސް މަޝްވަރާކުރުމަށް ވަނީ ހަމަޖެހިފަ އެވެ.

ސަސްޓެއިނަބަލް މާކެޓްސް އިނީޝިއޭޓިވް އަކީ، އިނގިރޭސި ރަސްގެފާނު ކިންގ ޗާލްސް ތިންވަނައިގެ ތަސައްވުރެއްގެ މައްޗަށް އެމަނިކުފާނުގެ އިސްނެންގެވުމާއި އެކު ބާއްވަވާ ބައްދަލުވުމެކެވެ.