ޣައްޒާ ހަނގުރާމަ ހުއްޓާލުމަށް އދ.ގެ ސަލާމަތީ މަޖިލީހުގެ މެންބަރު ގައުމުތަކުން ގޮވާލައިފި

އިސްރާއީލާއި ހަމާސްއާ ދެމެދު ޣައްޒާގައި ކުރަމުންދާ ހަނގުރާމަ ހުއްޓާލުމަށް އދ.ގެ ސަލާމަތީ މަޖިލީހުގެ މެންބަރު ގައުމުތަކުން އަނެއްކާވެސް ގޮވާލައިފިއެވެ.

މެންބަރު ގައުމުތަކުން މިކަމަށް ގޮވާލައިފައިވަނީ ފަލަސްތީނުގެ މައްސަލައާއި މެދުއިރުމަތީގެ މަސްރަހާ ގުޅޭ ގޮތުން އދ.ގެ ސަލާމަތީ މަޖިލީހުގެ މެންބަރު ގައުމުތަކުން ބޭއްވި ބައްދަލުވުމެއްގައެވެ.

އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ރިޔާސަތު ބެލެހެއްޓެވި މި ބައްދަލުވުމުގައި މެންބަރު ގައުމުތަކުގެ ޚާރިޖީ ވަޒީރުންނާއި ކައުންސިލްގެ 15 މެންބަރުންގެ ސަފީރުން ބައިވެރިވެވަޑައިގެންނެވިއެވެ.

މި ބައްދަލުވުން އދ.އިން ބާއްވާފައި މިވަނީ އިސްރާއީލުން ޣައްޒާގައި ހިންގަމުންދާ އޮޕަރޭޝަންގެ ސަބަބުން އިންސާނީ ކާރިސާއެއް ކުރިމަތިވެފައިވާ ޣައްޒާއަށް ކުރިމަތިވެފައިވާ ނުތަނަވަސްކަމުގެ ސަބަބުން މިހާރުން މިހާރަށް ހަނގުރާމަ ހުއްޓާލުމަށް ގޮވާލާ މީހުންގެ ޢަދަދު އިތުރުވަމުންދާ ދަނޑިވަޅެއްގައެވެ.

މި ބައްދަލުވުމުގައި ބައިވެރިވެވަޑައިގެންނެވި އުރުދުންގެ ބޮޑުވަޒީރުގެ ނައިބު އަދި ޚާރިޖީ ވަޒީރު އައިމަން ސަފާދީ ވިދާޅުވީ "ގަޑި ޖެހިއްޖެ" ކަމަށެވެ. އެހެންނަމަވެސް ހަނގުރާމަ ހުއްޓާލުމަށާއި އިންސާނީ އެހީއާ ބެހޭ ގޮތުން ކައުންސިލްގެ އަމިއްލަ ގަރާރެއް ތަންފީޒު ކުރުމަށް ކައުންސިލުން އަދި ގޮވާލާފައިނުވާ ކަމަށެވެ.

މި ބައްދަލުވުމުގައި ސަޢޫދީ ޢަރަބިއްޔާގެ ވައިސް މިނިސްޓަރ އޮފް ފޮރިން އެފެއާޒް ވަލީދު އެލް ކެރެއިޖީ ވާހަކަ ދައްކަވަމުން ވިދާޅުވީ އެންމެ ބޮޑު އިސްކަމެއް ދޭންވީ ފަލަސްޠީނުގައި އުފެދިފައިވާ ދަތިތައް ފިލުވައި، ފަލަސްޠީނުގައި އުފެދިފައިވާ ނުތަނަވަސްކަން ނިމުމަކަށް ގެނައުމަށް ކަމަށާއި، މިހާރުން މިހާރަށް ހަނގުރާމަ ހުއްޓާލުމަށް ގަރާރެއް ފާސްކުރުމަށް ކައުންސިލަށް ގޮވާލައްވާ ކަމަށެވެ.

އަދި މި ސަރަހައްދުގެ ސުލްހަ ގާއިމުކުރުމަށް އިސްރާއީލުން ބައިނަލްއަގްވާމީ ގާނޫނުތަކާ ހިލާފު އަމަލުތައް ހުއްޓުވުމަށް ސަލާމަތީ މަޖިލީހަށް ގޮވާލާ ކަމަށެވެ.

އަދި ހަނގުރާމަ ހުއްޓާލުމާ ގުޅޭ ގޮތުން އެއް ސްޓޭންޑެއް ގެންގުޅެ، އިސްރާއީލުގެ ނޭއްގާނީ ވިސްނުމުގެ ސަބަބުން އިސްރާއީލު ހިމެނޭ ގޮތަށް ސަރަހައްދުގެ ހަމަޖެހުން ހޯދުމަށް ކުރާ މަސައްކަތަށް ބުރޫއަރާކަން ގަބޫލުކުރަން ޖެހޭ ކަމަށްވެސް އޭނާ ވިދާޅުވިއެވެ.

ޔުނައިޓެޑް އަރަބް އެމިރޭޓްސް (ޔޫއޭއީ) އިން އދއަށް ކަނޑައަޅުއްވާފައި ހުންނަވާ ދާއިމީ މަންދޫބު ލާނާ ޒަކީ ނުސެއިބެހް ވިދާޅުވީ ޣައްޒާގައި ކުރިމަތިވެފައިވާ ތަކުލީފުގެ މިންވަރަކީ ތާރީޚުގެ އެންމެ އަނދިރި ދުވަސްތަކާ ވާދަކުރާ މިންވަރެއް ކަމަށެވެ.

ސްލޮވޭނިއާގެ ޚާރިޖީ އަދި ޔޫރަޕިއަން އެފެއާޒް މިނިސްޓަރު ޓަންޖާ ފަޖޮން ވެސް ވަނީ ޣައްޒާގައި މިހާރުން މިހާރަށް ހަނގުރާމަ ހުއްޓާލުމަށް ގޮވާލައްވާފައެވެ.

އެކަމަނާ ވިދާޅުވީ ސުލްހައިގެ ޝަރުތުތައް ގެނައުމަށާއި ޖަވާބުދާރީ ކުރުވުމާއި ޣައްޒާ އާރާސްތުކުރުމަށް މަގުފަހިކުރުމަށާއި ސަރަހައްދީ ގޮތުން އިތުރަށް ހަލަބޮލިވުން ހުއްޓުވުމަށް ހަނގުރާމަ ހުއްޓާލުމަކީ ވަރަށް މުހިންމު ކަމެއް ކަމަށެވެ.

އިންޑޮނޭޝިއާގެ ޚާރިޖީ ވަޒީރު ރެޓްނޯ މަރްސޫދީ ވެސް ވަނީ ވަގުތުން އަދި ދާއިމީކޮށް ހަނގުރާމަ ހުއްޓާލުމަށް ގޮވާލައްވާފައެވެ.

މޮޒަމްބިކްއިން އދއަށް ކަނޑައަޅުއްވާފައި ހުންނަވާ ދާއިމީ މަންދޫބު ޕެޑްރޯ ކޮމިސާރިއޯ އަފޮންސޯ ވިދާޅުވީ، މިހާރުގެ ހާލަތަށް ބަލާއިރު، އިންސާނީ ހަމަލާތައް ވަގުތުން ވަގުތަށް ހުއްޓާލުމަށާއި، ހަމަނުޖެހުންތައް ނިމުމަކަށް ގެނައުމަށް ގޮވާލާ ކަމަށެވެ.

ޗައިނާގެ އދ.ގެ ސަފީރު ޖަންގް ޖޫން ތަކުރާރުކޮށް ވިދާޅުވީ ވަގުތުން ހަނގުރާމަ ހުއްޓާލުމަކީ އިސްކަމެއް ދޭންޖެހޭ ކަމެއް ކަމަށެވެ.

މިދިޔަ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ފަލަސްތީނަށް ދެމުންދާ ހަމަލާތަކުގައި ފަލަސްތީނުގެ 25،490 މީހުން ޝަހީދުވެ، 63،354 މީހުން ވަނީ ޒަޚަމްވެފައެވެ.

އިސްރާއީލުން ދިން ޙަމަލާތަކުގެ ސަބަބުން ޣައްޒާގެ އާބާދީގެ 85 އިންސައްތަ މީހުން ކާބޯތަކެއްޗާއި ސާފު ފެނާއި ބޭހުގެ ދަތިކަން ބޮޑުވެ ގެދޮރު ގެއްލިފައިވާއިރު، އެންކްލޭވްގެ އިންފްރާސްޓްރަކްޗަރުގެ 60 އިންސައްތަ ވަނީ ހަލާކުވެ ނުވަތަ ބޭނުން ނުކުރެވޭވަރުވެފައި ކަމަށް އދ.އިން ބުނެއެވެ.