ޤަތުލުޢާންމުގައި ޒަޚަމްވެ، ފުރާނަ ސަލާމަތްވި ޒުވާނެއްގެ ސީދާ ސާދާ ލޯބި: އަދުގެ ޒުވާނުންނަށް މިސާލެއް!

ދެ މީހެއްގެ އުފެދޭ ލޯބީގެ ޖަޒުބާތަކީ އޭގައި އިޚްލާޞްތެރިކަމާއި، އިޙްތިރާމު އެކުލެވޭ ޖަޒުބާތެއް ކަމުގައި ވާ ނަމަ، އެ ދެމީހުންގެ މެދަށް ވަންނާނެ އިތުރު މީހަކު ނުހުންނާނެއޭ ބުނެވިދާނެއެވެ. އެ ދެމީހުންގެ ގުޅުމަށް ހުރަސް އެޅޭނެ ގޮތެއްވެސް ނޯންނާނެއޭ ބުނެވިދާނެއެވެ. ޔަހޫދީ ނިރުބަވެރިންގެ ޤަތުލުޢާންމުގައި ހަފުސްކޮށްފައި އޮތް ޣައްޒާގެ 2 ޒުވާނަކު ކިތަންމެ ހާ ފުރިހަމައަކަށްވެސް އެކަން ސާބިތު ކޮށްދީފިއެވެ. ދެ ޖިންސުގެ ދެ މީހުންގެ މެދުގައި އުފެދޭ ލޯބީގެ ގުޅުމަކީ ޝަރުޢީ އިމުގެ ތެރެއިން ގުޅިލާމަހާލެވޭ މަތިވެރި ގުޅުމަކަށް ވާން ޖެހޭ އިރު، އެ ޒުވާނުން މިއަދު އެ ސާބިތުކޮށްދިނީ ޒުވާންކަމުގެ ވިންދުގައި ހަވާނަފުސަށް ދީލާނުލާ ކަމުގެ ރީތި މިސާލެކެވެ.

ޣައްޒާ ސިޓީއަށް ނިސްބަތްވާ، ފަލަސްޠީނުގެ 2 ރައްޔިތުން ކަމަށް ވާ މުޙައްމަދު އަލް-ޣަންދޫރާއި ޝަހާދު، ކައިވެނީގެ މަތިވެރި ގުޅުމުން ދެ މީހުންގެ ޙަޔާތުގެ ގޮށްޖަހާލީ ޖެނުއަރީ 18 ވީ ބުރާސްފަތި ދުވަހުއެވެ. އަދުގެ ޒުވާނުންގެ ކައިވެނި ޙަފުލާތަކާ ޚިލާފަށް، އެ ކައިވެނި މާލަމަކީ އެންމެ ޒަމާނީ މާލަމެއް ނޫނެވެ. އެ ކައިވެނީގެ ވަލީމާ ކުރިއަށް ގެންދިޔައީ، ނިރުބަވެރި ޔަހޫދީ މުޖުރިމުންގެ ޢުދުވާންތަކުގައި ގެދޮރު ގެއްލިފައި ވާ ފަލަސްޠީނުގެ ރައްޔިތުންނަށް، މިޞްރު ބޯޑަރާ ދާދި ކައިރީގައި އޮންނަ ރަފަޙުގައި އަޅާފައިވާ ރެފިއުޖީ ކޭމްޕެއްގެ ޓެންޓެއްގައެވެ.

ވަލީމާގައި، ދެ ފަރާތުގެ ޢާއިލާއިންވެސް ކޮންމެވެސް ވަރަކަށް މެންބަރުން ބައިވެރިވިއެވެ. މާ ބޮޑު އުފާފާޅު ކުރުންތަކެއް ނުފެނެއެވެ. ނަމަވެސް، މުޙައްމަދާއި ޝަހާދުގެ އުފަލުގައި، ހުރިހާ އެންމެންވެސް ބައިވެރިވަމުން އިޚްލާސްތެރި ހިތަކާއެކުކަން ކިތަންމެ ހާ ވެސް ސާފެވެ.

ކައިވެނީގެ ގޮށް ޖަހާލެވުނެއް ކަމަކު، ލިބެން ވާ ޙަޤީޤީ އުފާ ނުލިބޭ ކަމުގެ އިޙްސާސް މުޙައްމަދަށް ދިޔައީ ކުރެވެމުންނެވެ. ނަމަވެސް އޭނާ ހުރީ ލިބޭ މިންވަރަށް ޝުކުރުކޮށްލައިގެންނެވެ.

ޣައްޒާގެ ރަށްވެހިންގެ ކިބައިން ފެނިގެންދާ އެންމެ ފާހަގަކޮށްލެވޭ އެއް ސިފައަކީވެސް އެއީއެވެ. އެއިރަކު އުޅެން ޖެހުނު ކޮންމެ ޙާލަކަށް، އިންތިހާ ފަސޭހައިން އަހުލުވެރިވެއެވެ. މިންވަރަށް އީމާންވެއެވެ. އަދި އަމިއްލަ ޙައްޤުތައް ހޯދަން ގަދަ އަޅާ މަސައްކަތްވެސް ކުރެއެވެ.

ޝަހާދުގެ މަންމަ، އުއްމު ޔާހިޔާ ޚަލީފާގެ ވާހަކަވެސް ހުރީ ހަމަ އެފަދަ ގޮތަކަށެވެ.

ނަމަވެސް، އޭނާއަކީވެސް އެހެން މަންމައިން ފަދައިން ދަރިފުޅަށްޓަކައި ފޮނި ހުވަފެންތަކެއް ދުށް މަންމައެކެވެ. އެ ހިތުގައި އަޅާނެ ވޭން، ތަސައްވުރު ކޮށްލަންވެސް ދައްޗެވެ.

100 އަށް ވުރެ ގިނަ ދުވަހަށް ދިގުލައިގެން ގޮސްފައި ވާ ޤަތުލުޢާންމުގައި މި ދުނިޔެއާ ވަކިވެ ދިޔަ ފަލަސްޠީނު ރައްޔިތުންގެ ޢަދަދު، 24700 އަށް ވުރެ މައްޗަށް އަރައެވެ. ކޮންމެ 24 ގަޑިއިރެއްގެ ތެރޭގައި މަރާލާ މީހުންގެ ޢަދަދަށް ބެލި ކަމުގައި ވީ ނަމަވެސް، އެ ޢަދަދުތައް އުޅެނީ 100 އިން މަތީގައެވެ. ކޮންމެ ދުވަހަކުވެސް ސަތޭކަ އެތައް ފުރާނައެއް މި ދުނިޔެއާ ވަކި ކުރަމުން ދަނީ، ޣައްޒާ ކޮންޓްރޯލް ކުރާ ޙަމާސް ޖަމާޢަތުގެ ވަސް މި ބިންމަތިން ފޮހެލުމަށް ކަމަށް ބުނެއެވެ. ޔަހޫދީންގެ ޙަމަލާތަކުގައި ޒަޚަމްވި މީހުންގެ ޢަދަދު، ލައްކައަކާ ގާތް ކުރެއެވެ. މުޅި ޣައްޒާގެ އާބާދީހެން އޮތީ ގެދޮރު ގެއްލި، އަމިއްލަ ވަޒަނުގައި ރެފިއުޖީންނަށް ވެފައެވެ. ބަނޑަށްޖެހިފައެވެ.