ހަމާސް އިން ޣައްޒާގައި ހިފަހައްޓާފައިވާ 50 ރަހީނުން އެއްކޮށް ދޫކޮށްލަން ޖެހޭނެ ކަމަށް އިސްރާއީލުން ބުނުމާއެކު ހަނގުރާމަ ހުއްޓާލުމަށް ހަމާސް ގެ ހުށަހެޅުން އިސްރާއީލުން ގަބޫލު ނުކުރާނެ ކަމަށް ބެލެން ފަށައިފިއެވެ.

މިކަން އިސްރާއީލުގެ އޮފިޝަލަކު ވަނީ ހާމަކޮށްފައިވާ ކަމަށް ބީބީސީ އިން ރިޕޯޓު ކޮށްފައިވެއެވެ.

ގަތަރާއި މިޞްރުން މެދުވެރިވެގެން ހުށަހަޅާފައިވާ މި ހުށަހެޅުމުގައި، ގާތްގަނޑަކަށް ދެބައިކުޅައެއްބައި ރަހީނުން ދޫކޮށްލުމަށް ވަނީ ހުށަހަޅާފައެވެ. އަދި މި ހުށަހެޅުމަކީ ކުރިން އިސްރާއީލުން އެއްބަސްވެފައިވާ އެމެރިކާގެ ހުށަހެޅުމާ "ވަރަށް ބޮޑަށް އެއްގޮތް" ހުށަހެޅުމެއް ކަމަށް ގަތަރުން ބުނެފައިވެއެވެ.

އިސްރާއީލުން މި ހުށަހެޅުން މުޅިން ބަލައިނުގަންނަ ކަމަކަށް ނުބުނެއެވެ. އެހެންނަމަވެސް އިސްރާއީލުގެ ސަރުކާރުގެ ތަރުޖަމާނު ޑޭވިޑް މެންސަރ ބީބީސީ އަށް ބުނެފައި ވަނީ އިސްރާއީލުން "ބައިބައިކޮށްގެން ހަދާ އެއްބަސްވުންތަކަށް" ޝައުޤުވެރިކަމެއް ނެތް ކަމަށެވެ.

"މިހާރު ހާލަތު ވަނީ ބަދަލުވެފައެވެ. ބޮޑުވަޒީރު ވަނީ ޣައްޒާގެ މުސްތަޤްބަލާ ގުޅޭ ޕްލޭނެއް އެކުލަވާލާފައެވެ،" މެންސަރ ބުނެފައިވެއެވެ.

ފަލަސްޠީނުގެ މަޞްދަރުތަކުން ބުނާ ގޮތުގައި ހަމާސް ގެ ހުށަހެޅުމުގައި ވަނީ ދިރިތިބި 10 ރަހީނުންނާއި މަރުވެފައިވާ 18 ރަހީނުންގެ ހަށިގަނޑު ހަވާލު ކުރުމެވެ. އޭގެ އިތުރުން ހަނގުރާމަ ހުއްޓާލާފައި އޮންނަ 60 ދުވަހުގެ މުއްދަތުގެ ތެރޭގައި ދެފަރާތުން ހަނގުރާމަ ދާއިމީ ހުއްޓާލުމަށާއި ބާކީ ތިބި ރަހީނުން އަނބުރާ ގެނައުމާ ބެހޭގޮތުން މަޝްވަރާ ކުރާނެއެވެ.

22 މަސްދުވަހުގެ ހަނގުރާމައަށް ފަހު، ބާކީ ތިބި 50 ރަހީނުންގެ ތެރެއިން 20 ރަހީނުން ދިރި ތިބި ކަމަށް އިސްރާއީލުން ޤަބޫލުކުރެއެވެ.

މި ހަފްތާގެ ފަހުކޮޅު، ޣައްޒާ ސިޓީ މުޅިން ހިފުމަށް އެކުލަވާލާފައިވާ އިސްރާއީލުގެ އަސްކަރީ ޕްލޭން އިސްރާއީލުގެ ކެބިނެޓުން ފާސްކުރާނެ ކަމަށް ބެލެވެއެވެ. މިހާރުވެސް އިސްރާއީލުގެ ހަމަލާތައް އިތުރުވަމުން ދިއުމާ ގުޅިގެން އެތައް ހާސް ބަޔަކު ވަނީ އެ ސަރަޙައްދުން ނުކުމެފައެވެ.

ފާއިތުވި މަހު ހަމާސްއާއެކު ނުސީދާކޮށް ކުރެވުނު މަޝްވަރާތައް ނާކާމިޔާބު ވުމާ ގުޅިގެން، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ޣައްޒާ މުޅިން ހިފުމުގެ ނިޔަތް އޮތްކަން އިޢުލާނު ކޮށްފައެވެ. މީގެ ތެރޭގައި 2.1 މިލިއަން ފަލަސްޠީނު ރައްޔިތުންގެ ގިނަ ބަޔަކު ހިމާޔަތަށް އައިސްފައިވާ ސަރަޙައްދުތައް ވެސް ހިމެނެއެވެ.

ހޯމަ ދުވަހުގެ ރޭ، ހަމާސް އިން ނެރުނު ބަޔާނެއްގައި ބުނެފައިވަނީ، އެ ޖަމާއަތާއި އެހެން ފަލަސްތީނު ޖަމާޢަތްތަކުން، މިޞްރާއި ގަތަރުގެ މެދުވެރިންގެ ފަރާތުން ހުށަހެޅި ހަނގުރާމަ ހުއްޓާލުމުގެ ހުށަހެޅުމަށް އެއްބަސްވެފައިވާ ކަމަށެވެ.

ހަމާސް އިން ބުނެފައި ވަނީ، މި ހުށަހެޅުމަށް އެއްވެސް ބަދަލެއް ގެނައުމަށް އެދިފައި ނުވާ ކަމަށެވެ.