ޢުމުރުން 64 އަހަރުގެ ޝާހީނާޒް ބަކްރުއާއި އޭނާގެ ޢާއިލާއަށް މި ވަގުތު ބޯ ހިޔާ ކޮށްލެވެން އޮތް ހަމަ އެކަނި ތަނަކީ ރަފަޙުގައި ވަގުތީ ޓެންޓު ޖަހާފައި ވާ ކޭމްޕެކެވެ. އުތުރުގެ ޣައްޒާ ސިޓީގައި އެ ޢާއިލާއިން ދިރިއުޅެމުން ދިޔަ ތަނަވަސް ގެދޮރު ދޫކޮށް ޝާހީނާޒްއާއި އޭނާގެ ޢާއިލާއިން ނިކުތް ފަހުން އެތައް ތަނަކަށް ބަދަލުވެއްޖެއެވެ. އޮކްޓޯބަރ 7 ވަނަ ދުވަހު އިޒްރޭލުން ހިންގަން ފެށި ޤަތުލުޢާންމުގެ ޢުދުވާންތަކުން ދިފާޢުވެވޭތޯއެވެ.

ނިރުބަވެރި ޔަހޫދީންގެ ޤަތުލުޢާންމަށް 100 ދުވަސް ވީ އިރު، ޝާހީނާޒް ފަދައިން ޣައްޒާގެ 2.3 މިލިއަނެއްހާ މީހުންގެ ދިރިއުޅުން މިއަދު އޮތީ ނާމާން އަދި ބިރުވެރި ހުވަފެނެއްގެ ތެރޭގައި ފަދައެވެ. ދިރިއުޅުމުގެ އެންމެ ޒަރޫރީ ބޭނުންތައްވެސް ފުދެން ނެތް އިރު، މިއަދު ޣައްޒާގައި ނޭވާލުމަކީވެސް ވޭން ހުރި ކަމެކޭ ބުނެވިދާނެއެވެ.

ވަގުތީ ޓެންޓުގައި ޝާހީނާޒް ދިރިއުޅެމުން ދަނީ އޭނާގެ 32 އަހަރުގެ އަންހެން ދަރިފުޅު ހީބާއާއި، 4 މާމަދަރިންނާވެސް އެކުގައެވެ. ހީބާ މިހާރުވެސް އިނީ ބަލިވެއެވެ.

ހީބާގެ ބަނޑަށް މިހާރު 6 މަސް ފުރިފައި ވާ އިރު، ބަނޑުގައި އޮތް ދަރިފުޅުގެ މުސްތަޤުބަލާ މެދު ހީބާގެ ހިތުގައި ޖަހަމުން ދަނީ ނުތަނަވަސް ކަމާއި މާޔޫސްކަމުގެ ވިންދެކެވެ.

މުޅި ޣައްޒާ ހަފުސްކޮށް ފަލަސްޠީނުގެ ނަސްލު ދޮވެލުމަށް އަރުވާޖަހައިގެން އޮތް އިޒްރޭލުގެ ޤަތުލުޢާންމުގައި މި ދުނިޔެއާ ވަކިކޮށްލި ފަލަސްޠީނު ރައްޔިތުންގެ ޢަދަދު 24000 އަށް އަރައެވެ. އެއީ ކޮން ބައެއްކަން ކަށަވަރުވި މީހުންގެ ޢަދަދެވެ. އެޔެއް މިޔެއް ބެލުމެއް ނެތި ވައްޓާލާފައި ވާ ޢިމާރާތްތަކުގެ ދަށުގައި އަދިވެސް އެތައް ހާސް ބައެއްގެ ހަށިތައް ވާނެ ކަމަށް ޣައްޒާގެ ކަމާ ބެހޭ ފަރާތްތަކުން ބުނެއެވެ. ނިރުބަވެރި ޢުދުވާންތަކުގައި ފަލަސްޠީނުން 60000 އަށް ވުރެ ގިނަ މީހުން ވަނީ ޒަޚަމްވެފައެވެ.

ބައެއް މީހުންނަކީ ޢުމުރުގެ ބާކީ އޮތް ދުވަސްތައް، ނުކުޅެދޭ މީހުންގެ ގޮތުގައި ހޭދަ ކުރަން މަޖުބޫރުވެފައި ވާ މިހުންނެވެ. މި ގެއްލުންތަކަކީ 1948 ވަނަ އަހަރު އިޒްރޭލާއި ފަލަސްޠީނާ ދެމެދު ކުރި ހަނގުރާމައަށް ފަހު، ފަލަސްޠީނުގެ ރައްޔިތުން ތަޙައްމަލު ކުރަމުން ދާ އެންމެ ބޮޑު ގެއްލުމެވެ.

މުޅި ޣައްޒާ މިއަދު އޮތީ ގައުކުނޑީގެ ގޮނޑަކަށް ވެފައެވެ. މުޅި އާބާދީހެން މިއަދު ފިތިބާރުވެގެން ދިރިއުޅެމުން ދަނީ ޣައްޒާގެ ދެކުނުގައެވެ. އޭގެ ތެރެއިންވެސް އެތައް ބަޔަކު މިއަދު އުޅެނީ ރަފަޙުގައެވެ.

ޣައްޒާގެ ހުރިހާ ހޮސްޕިޓަލެއްހެން އިޒްރޭލުން ވަނީ ސުންނާފަތި ކޮށްފައެވެ. ނަމަވެސް ހޮސްޕިޓަލު ފަދަ ތަންތަނަކީ އެއްވެސް ހަނގުރާމައެއްގައި އެތަންތަނަށް ޙަމަލާ ދީ އުޅޭ ތަންތަނެއް ނޫނެވެ. އިޒްރޭލު އަސްކަރިއްޔާގެ ނިރުބަވެރި ޙަމަލާތަކުގެ އިތުރުން، ޣައްޒާއަށް ކުރިމަތިކޮށްފައި ވާ ފިއްތުންތަކުގެ ސަބަބުން އުފެދިފައި ވާ އިންސާނީ ކާރިޘާގެ ޝިކާރައަކަށްވެގެންވެސް ފަލަސްޠީނުން އެތައް ބައެއް ފުރާނަ ގެއްލި ދިއުމުގެ ބިރު މިހާރު އިންތިހާ ބޮޑެވެ.

ޚިދުމަތް ދެވޭ މަދު ހޮސްޕިޓަލުތައް އޮތީ ފުރި ބާރުވެފައެވެ. އޮޕަރޭޓް ކުރަމުން ދަނީ ކެޕޭސިޓީއަށް ވުރެ އެތައް ސަތޭކަ ގުނައެއް އިތުރަށެވެ. ޑޮކްޓަރުންނާއި ޞިއްޙީ ޚިދުމަތް ތެރިން ތިބީ ވަރުބަލިވެފައެވެ. ބައެއް ޑޮކްޓަރުންނަކީ 24 ގަޑިއިރުގެ ޝިފްޓުގައި މަސައްކަތް ކުރަން މަޖުބޫރު ވެފައި ވާ ޑޮކްޓަރުންނެވެ. ޞިއްޙީ ޢާލާތްތަކާއި ބޭހުގެ ސަޕްލައިވެސް އެކަށީގެން ވާ ގޮތެއްގައި ލިބެން ނެތް އިރު، ބޮޑެތި ޒަޚަމްތަކާ އެކު ފަރުވާއެއްގެ އުންމީދުގައި ހޮސްޕިޓަލަށް އަންނަ ބަލި މީހުންނަށް ފަރުވާ ދިނުމުގައި ޑޮކްޓަރުންނަށް ކުރިމަތިވެފައި އޮތް ނަފްސާނީ ވޭނަކީވެސް ހަނދާން ނައްތާލެވެން އޮތް ކަމެއް ނޫނެވެ.

ޣައްޒާ ކޮންޓްރޯލް ކުރަމުންދާ ޙަމާސް ޖަމާޢަތުގެ ވަސް މި ދުނިޔެއިން ފޮހެލުމަށް ކަމަށް ބުނެ އިޒްރޭލުން ދެމުންދާ ޢުދުވާންތައް ކުޑަކޮށްވެސް މަޑުޖައްސާލާފައި ނުވާ އިރު، އަދިވެސް އެތައް މަހަކަށް އެ ޙަމަލާތައް ކުރިއަށް ދާނެ ކަމަށް ޔަހޫދީން ވަނީ އިންޒާރު ކޮށްފައެވެ. ބަރަކާތްތެރި ރަމަޟާން މަހަށް، ބާކީ 2 މަސްދުވަސްވެސް ދެން ނެތެވެ.

އިޒްރޭލުގެ ޢުދުވާންތަކުގައި މިހާތަނަށް އެންމެ ބޮޑު ތަކުލީފެއް އުފުލަމުން ދަނީ ޣައްޒާގެ ޢާންމުންނެވެ. ވަކިން ޚާއްޞަކޮށް، އަންހެނުންނާއި ކުޑަކުދިންނެވެ. ނިރުބަވެރިންގެ ޙަމަލާތަކުގައި ޢާންމުން މަރުވާ މައްސަލައާ ގުޅިގެން ބައިނަލްއަޤުވާމީ މުޖުތަމަޢުން އަމާޒު ކުރާ ފާޑުކިއުންތަކުގެ ރައްދުގައި އިޒްރޭލުން ބުނަނީ، ޢާންމުންގެ ސަލާމަތަށް ވީ ވަރަކުން ބަލާ ކަމަށެވެ. ނަމަވެސް ހަނގުރާމައިގެ ބޭނުންތަކަށް، ޙަމާސް ޖަމާޢަތުން ޢާންމު ތަންތަން ބޭނުން ކުރަމުން ދިއުމަކީ ޢާންމުންގެ ފުރާނަ ނުރައްކަލަށް ހުށަހަޅާ ސަބަބު ކަމަށް ބުނެ އިޒްރޭލުން ކުޅެނީ ދިފާޢަށެވެ.

އޭނާއާއި އޭނާގެ ޢާއިލާއަށް ކުރިމަތިލާން ޖެހިފައި އޮތް ތަކުލީފުތަކަކީ، ފަލަސްޠީނުގެ އަޚުންނާއި އުޚުތުންނަށް އުފުލަންޖެހިފައި އޮތް ތަކުލީފުތަކާއި، ވޭނާއި ކުކުޅުމުގެ ހަނދާން، ޝާހީނާޒްއަށް އައު ކޮށްދެނި ކަންކަމެވެ.

ހީބާގެ ހުރިހާވެސް އުންމީދަކީ ހަނގުރާމަ ހުއްޓި، ހިންދެމިލެވޭ ގޮތްވުމެވެ.

އިޒްރޭލުގެ ޖަރީމާތައް ހުއްޓުވުމަށް ބައިނަލްއަޤުވާމީ މުޖުތަމަޢަށް މާ ބޮޑު ކަމެއް ކުރާކަށް ނުކެރިފައި އޮތް އިރު، ޔަހޫދީ ނިރުބަވެރިން ގޮވައިގެން ބައިނަލްއަޤުވާމީ ޢަދުލު އިންސާފުގެ ކޯޓު (އައިސީޖޭ)އަށް ވަންނަން ކެރުނު ހަމަ އެކަނި ޤައުމަކީ ދެކުނު އެފްރިކާއެވެ. އިޒްރޭލުން ޤަތުލުޢާންމު ހިންގާ ކަމުގެ ތުހުމަތުގައި އައިސީޖޭއަށް ދެކުނު އެފްރިކާއިން ހުށަހެޅި ދަޢުވާއަށް އިޒްރޭލުން ފާޅުގައި އިންކާރު ކުރެއެވެ. އިޒްރޭލުން ބުނާ ގޮތުގައި ހިނގަމުންދާ ހުރިހާ ކަމަކީވެސް އަމިއްލަ ނަފުސުގެ ދިފާޢުގައި ހިންގާ ކަންކަމެވެ.

މިއީ އިޒްރޭލަށް ފާޅުގައި އެއްބާރުލުން ދެމުންދާ އެމެރިކާއާއި އެކުވެރިންނަށް ބަލައިގަންނެވޭ ދިފާޢެކެވެ. ނަމަވެސް އިންސާނިއްޔަތު ކަމުގެ ޒައްރެއްގެ މިންވަރު ހުރި މީހަކު ނަމަ، އިޒްރޭލުގެ ޔަހޫދީންނަކީ ނަސްލު ދޮވެލުމުގެ ނިރުބަވެރި ޖަރީމާ ހިންގަމުންދާ މުޖުރިމުން ނޫން ކަމަކަށް ނުބުނާނެއެވެ.