އޮސަސޫނާ ބަލިކޮށް، ބާސެލޯނާ ފައިނަލަށް

އޮސަސޫނާ 2-0އިން ބަލިކޮށް، ސްޕެނިޝް ސުޕަކަޕް ފައިނަލަށް ބާސެލޯނާ ދަތުރުކޮށްފި އެވެ.

ސައުދީ އަރަބިއާގައި އާދީއްތަ ދުވަހުގެ ރޭ ކުޅޭ ފައިނަލުގައި ބާސެލޯނާއާ ދެކޮޅަށް ނުކުންނާނީ ވާދަވެރި ރެއާލް މެޑްރިޑެވެ. ރެއާލް މެޑްރިޑް ފައިނަލަށް ދަތުރުކުރީ ބުދަ ދުވަހުގެ ރޭ އެތްލެޓިކޯ މެޑްރިޑް 5-3އިން ބަލިކޮށްގެންނެވެ.

ގޯލެއް ނުޖެހި ނިމިދިޔަ ފުރަތަމަ ހާފަށް ފަހު ބާސެލޯނާ އަށް ލީޑް ނަގައިދިނީ އިކާއީ ގުންޑޮގަން ދިން ޕާހަކުން ރޮބަޓް ލެވޮންޑޯސްކީ އެވެ. އަދި ފަހު ލަނޑު ޖެހީ އިތުރު ވަގުތުގައި ޔަމީން ޔަމާލެވެ.

ބާސެލޯނާ ވަނީ މި މުބާރާތުގެ ތަށި ރެކޯޑް އަދަދެއް ކަމަށްވާ14 ފަހަރު ކާމިޔާބުކޮށްފަ އެވެ.

ސްޕެނިޝް ސުޕަކަޕް ސައޫދީ އަރަބިއާގައި ކުޅެނީ އެ ގައުމުގެ ސަރުކާރާއެކު ވެފައިވާ އެއްބަސްވުމެއްގެ ދަށުންނެވެ. މި މުބާރާތް ސައޫދީ ގައި ކުޅޭތީވެ އެ ގައުމުގެ ސަރުކާރުން މުބާރާތުގައި ކުޅޭ ހތަރު ޓީމާއި އިނާމް ފައިސާ އަށް އަދި ސްޕޭނުގެ އެފްއޭއަށް ގިނަ އަދަދަކަށް ފައިސާދެ އެވެ.