މެންޗެސްޓަރ ސިޓީ އަށް ކުޅެމުން އަންނަ ނޯވޭގެ އާލިން ހާލަންޑް އަދި ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ފްރާންސްގެ ކީލިއަން އެމްބާޕޭ ގެނައުމަކީ، ބާސެލޯނާ އަށް ކުރެވޭނެ ކަމެއް ނޫން ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
އޭނާ މިހެން ބުނީ ބާސެލޯނާ އިން އެ ޓީމުގެ ސްކޮޑު ވަރުގަދަ ކުރަމުން އަންނަ މަސައްކަތާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބު ދެމުންނެވެ. އެގޮތުން އެ ދެ ކުޅުންތެރިން ގެނައުމަކީ، މިވަގުތު ބާސެލޯނާގެ މާލީ ޙާލަތު ތަންދޭ ކަމެއް ނޫން ކަމަށް އޭނާ ބުންޏެވެ. އޭނާ ފާހަގަ ކުރި ގޮތުގައި ބޮޑެތި ޚަރަދު ކޮށްފައި، އައު ކުޅުންތެރިން ގެނައުމަކީ ބޭނުންތެރި ކަމެއް ނޫނެވެ.
މީގެ އިތުރުން ޒަވީ ބުނީ މިވަގުތު ބާސެލޯނާގައި އޮތް ސްކޮޑާ މެދު އޭނާ ހިތްހަމަ ޖެހޭ ކަމަށެވެ. ޒަވީ ބުނީ ބާސެލޯނާގައި ތިބި ކުޅުންތެރިންނަކީ އެ ޓީމަށް އެންމެ އެކަށީގެންވާ ކުޅުންތެރިން ކަމަށާއި، ދެން އައު ކުޅުންތެރިން ގެންނާނީ ގިނަ ކަންތައްތަކަށް ބެލުމަށްފަހު ކަމަށެވެ. ޒަވީ ދެކޭ ގޮތުގައި ބާސެލޯނާގައި ހިމެނޭ ޒުވާން ކުޅުންތެރިންނާއި، ތަޖުރިބާ ހުރި ކުޅުންތެރިންނަކީ ވަރަށް މަސައްކަތް ކުރާ ކުޅުންތެރިންނެވެ. ވަގުތާއެކު މަސައްކަތް ކޮށްފި ނަމަ، އެ ކުޅުންތެރިންގެ ހުނަރު އިތުރަށް ތަރައްޤީ ވެގެންދާނެ ކަމަށް ވެސް އޭނާ ވަނީ ފާހަގަކޮށްފަ އެވެ.
ބާސެލޯނާގެ މާލީ ޙާލަތު ރަނގަޅު ނުވުމުގެ ސަބަބުން އެ ޓީމަށް ކުޅުންތެރިން ގެނައުމުގެ ދަތިތަކާ ކުރިމަތިލާން ޖެހުނެވެ. އެ ޓީމުން ވަނީ އެ ޓީމަށް ކުރިން ކުޅުނު ކެޕްޓަން ލިއޮނަލް މެސީ އަލުން ގެނައުމަށް ވެސް މަސައްކަތް ކޮށްފަ އެވެ. ނަމަވެސް އެ ޓީމަށް އެކަން ކާމިޔާބު ނުވީ ވެސް، މާލީ ޙާލަތުގެ ސަބުންނެވެ.
