ފަލަސްތީނުގެ އެއް އާއިލާއެއްގެ 70 މެމްބަރުން ޝަހީދު ކޮށްލައިފި

އިސްރާއިލްގެ ނިރުބަވެރިން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި އ.ދގެ މުވައްޒަފަކާއި އޭނާގެ ޢާއިލާގެ 70 މެންބަރުން ޝަހީދު ކޮށްލައިފިއެވެ.

ޔަހޫދީންގެ ޝިކާރައަކަށްވެ ޝަހީދުވެފައި ވަނީ އ.ދގެ ތަރައްޤީއާ ބެހޭ ޕްރޮގްރާމް (ޔޫ.އެން.ޑީ.ޕީ)ގެ މުވައްޒަފެއް ކަމުގައިވާ އައިޞާމް މަޣްރިބީއާއި އޭނާގެ ޢާއިލާގެ މެންބަރުންނެވެ.

ޝަހީދު ކޮށްލާފައިވާ މީހުންގެ ތެރޭގައި މަޣްރިބީގެ އަންހެނުންނާއި ދަރިން ވެސް ހިމެނެއެވެ."ޔޫ.އެން.ޑީ.ޕީއާ މަޣްރިބީ ގުޅުނީ މީގެ 30 ވަރަކަށް އަހަރު ކުރިން. އޭނާ މަސައްކަތް ކޮށްފައި ވަނީ ޔޫ.އެން.ޑީ.ޕީގެ ޕްރޮގްރާމް އޮފް އެސިސްޓެންސް ޓު ޕަލަސްޓީނިޔަން ޕީޕަލްގެ ދަށުން. އޭނާއާއި، އޭނާގެ ޢާއިލާ ޝަހީދު ކޮށްލުމުން މުޅި އ.ދގެ ޢާއިލާއަށް ވަނީ ހިތާމައާއި މޮޅިވެރިކަން ވެރިވެފައި. ޣައްޒާގެ ޢާންމު ރައްޔިތުންނާއި އ.ދގެ މުވައްޒަފުންނަކީ ޙަމަލަތަކުގެ އަމާޒަކަށް ހަދައިގެން ނުވާނެ،" ޔޫ.އެން.ޑީ.ޕީގެ އިސް އޮފިޝަލެއް ކަމުގައިވާ އާކިމް ސްޓައިނަރ ވިދާޅުވިއެވެ.

އުމުރުން 56 އަހަރުގެ މަޣްރިބީއާއި އޭނާގެ ޢާއިލާ ޝަހީދު ކޮށްލާފައި ވަނީ ޣައްޒާ ސިޓީގައި އެ މީހުން ދިރިއުޅޭ ސަރަޙައްދަށް ޔަހޫދީ ފައުޖުން ދިން ރަޙުމު ކުޑަ ވައިގެ ޙަމަލަތަކެއްގައެވެ.

ޣައްޒާއަށް އިންސާނީ އެހީތެރިކަން ފޯރުކޮށްދިނުމަށް ގޮވައިލާ ޑިސެންބަރު 22 ވަނަ ދުވަހު އ.ދގެ ސަލާމަތީ މަޖިލީހުން ޤަރާރެއް ފާސްކުރުމާ އެކު ޔަހޫދީ ފައުޖުން ވަނީ ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާން އިތުރަށް ފުޅާ ކޮށްފައެވެ.

އަދި، ދެމުންދާ ޙަމަލަތަކުގެ ޢަދަދު އިތުރު ކޮށްފައެވެ.މަޣްރިބީ ޝަހީދު ކޮށްލުމާ ގުޅިގެން ދުނިޔޭގެ ޞިއްޙަތު ޖަމުޢިއްޔާގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރިއޭސޮސް ވެސް ވަނީ ކަންބޮޑުވުން ފާޅު ކުރައްވާފައެވެ.

"އިންސާނިއްޔަތަށް ޓަކައި މަސައްކަތް ކުރާ މީހުންނަށް ޙަމަލަތައް އަމާޒު ކުރުމަކީ ބަލައިގަނެވޭނެ ކަމެއް ނޫން،" ޓެޑްރޯސް ވިދާޅުވިއެވެ.

މަޣްރިބީއަކީ ޔަހޫދީންގެ ޙަމަލަތަކުގައި ޝަހީދު ކޮށްލާފައިވާ އ.ދގެ ފުރަތަމަ މުވައްޒަފެއް ނޫނެވެ. އޮކްޓޫބަރު 7 ވަނަ ދުވަހުން ފެށިގެން ޣައްޒާއަށް ދެމުންދާ ޙަމަލަތަކުގައި ޔަހޫދީން ވަނީ އ.ދގެ 7,136 މުވައްޒަފުން ޝަހީދު ކޮށްލާފައެވެ.

މި ކަމާ ގުޅޭ ގޮތުން ކަންބޮޑުވުން ފާޅު ކުރައްވައި ވާހަކަފުޅު ދައްކަވަމުން އ.ދގެ ސެކްރެޓަރީ ޖެނެރަލް އެންޓޯނިޔޯ ގުޓަރެޝް ވިދާޅުވީ، މިއީ ތާރީޚުގައި ވެސް އ.ދގެ ގިނަ ޢަދަދެއްގެ މުވައްޒަފުންތަކެއްގެ ފުރާނަ ނަގައިލާފައިވާ ފުރަތަމަ ފަހަރު ކަމުގައެވެ.

ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ޣައްޒާއަށް ދީފައިވާ ޙަމަލަތަކުގައި 201 މީހުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ހާމަ ކުރެއެވެ. އަދި، 370 އަށްވުރެ ގިނަ މީހުން ވަނީ ޒަޚަމު ކޮށްލާފައެވެ.

މިއާއެކު، އޮކްޓޫބަރު 7 ވަނަ ދުވަހުން ފެށިގެން ހިންގަމުންދާ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މި ވަނީ 20,000 އަށްވުރެ މައްޗަށް އަރާފައެވެ. އޭގެ ތެރޭގައި 8,000 އެއްހާ ކުޑަކުދިން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 52,000 އަށް އަރާފައެވެ.