ޣައްޒާގެ އުތުރުގައި ހުންނަ އަލް-އަވްދާ ހޮސްޕިޓަލުން 240 މީހުން އިސްރާއިލްގެ ސިފައިން ހައްޔަރުކޮށްފިއެވެ.

ޣައްޒާގެ ހެލްތު މިނިސްޓްރީއާ ހަވާލާދީ އަލްޖަޒީރާއިން ރިޕޯޓުކޮށްފައިވާގޮތުން އިސްރާއިލް އަސްކަރިއްޔާއިން ވަނީ ޣައްޒާގެ އުތުރުގައި ހުންނަ އަލް-އަވްދާ ހޮސްޕިޓަލު ވަށާލައި އެހޮސްޕިޓަލުން މީހުން ހައްޔަރުކުރަން ފަށައިފައެވެ.

އެގޮތުން، ހޮސްޕިޓަލުގެ ސްޓާފުންނާއި ބަލިމީހުންނާ ހޮސްޕިޓަލްގައި ބޯހިޔާވަހިކަން ހޯދަމުންދާ މީހުންގެ ތެރެއިން 240 މީހުން އިސްރާއިލް އަސްކަރިއްޔާއިން ހައްޔަރުކޮށްފައިވާކަމަށް ޣައްޒާގެ ހެލްތު މިނިސްޓްރީން ބުނެއެވެ. އޭގެ ތެރޭގައި 80 ސިއްހީ ހިދުމަތްތެރިންނާއި، 40 ބަލިމީހުންގެ އިތުރުން، ހޮސްޕިޓަލްގައި ބޯހިޔާވަހިކަން ހޯދަމުންދިޔަ 120 މީހުން ހިމެނެއެވެ.

އިސްރާއިލުން ހައްޔަރުކުރި މީހުންގެ ތެރޭގައި ހޮސްޕިޓަލްގެ ޑިރެކްޓަރު އަހްމަދު މުހަންނާވެސް ހިމެނެއެވެ.

އިސްރާއިލް އަސްކަރިއްޔާއިން ވަނީ އަލް-އަވްދާ ހޮސްޕިޓަލް އެމީހުންގެ ބެރެކްއަކަށް ހަދާފައިކަމަށް ޣައްޒާގެ ހެލްތު މިނިސްޓްރީން ބުނެއެވެ.

ޣައްޒާގެ ހެލްތު މިނިސްޓްރީން ވަނީ، އެހޮސްޕިޓަލްގައި ތާށިވެފައިތިބި މީހުނަށް ފެނާ ކާބޯތަކެތީގެ އިތުރުން ބޭސްވެސް ނުލިބޭކަމަށް ބުނެފައެވެ. އަދި ހޮސްޕިޓަލްގެ އެއް ޔުނިޓުން އަނެއް ޔުނިޓަށް މީހުން ދިއުމަށްވެސް ދަނީ ހުރަސް އަޅަމުންނެވެ.

އިސްރާއިލް އަސްކަރިއްޔާއިން ވަނީ ޣައްޒާގެ އުތުުގައި ހުންނަ ކަމަލް އަދުވާން ހޮސްޕިޓަލް ވަށާލައި، އެހޮސްޕިޓަލް ހުސްކުރުމަށްވެސް އަމުރުކޮށްފައެވެ. އަދި ކަމަލް އަދުވާން ހޮސްޕިޓަލްގެ ޑިރެކްޓަރު އަހުމަދު އަލް-ކަހްލޫތު ހިމެނޭހެން އެހޮސްޕިޓަލްގެ ގިނަ އަދަދެއްގެ ސްޓާފުންވެސް ހައްޔަރުކޮށްފައެވެ.

މިހާރުވެސް، ޝިފާ ހޮސްޕިޓަލްގެ ޑިރެކްޓަރު މުހައްމަދު އަބޫ ސަލްމިޔާ ހިމެނޭހެން، ޣައްޒާގެ ސިއްހީ ހިދުމަތްތެރިންގެ ތެރެއިން ގިނަ އަދަދެއްގެ މީހުން ވަނީ ހައްޔަރުކޮށްފައެވެ.

އިސްރާއިލް އަސްކަރިއްޔާއިން ދަނީ ހޮސްޕިޓަލްތަކުގައި ރައްކާތެރިކަން ހޯދަމުންދާ ޣައްޒާގެ ރައްޔިތުންނަށް އެތަންތަން ދޫކޮށް ދިއުމަށް އަމުރުކުރަމުންނެވެ.

އިސްރާއިލުން ޣައްޒާގެ އުތުރުގެ އެހޮސްޕިޓަލްތައް ހިސާރުކުރުމާއެކު، މިހާރު ޣައްޒާގެ އުތުރުގައި، ރައްޔިތުންނަށް ފަރުވާދޭނެ ހޮސްޕިޓަލެއްނެތެވެ. އަދި ދެކުނުގައި ހުރި މަދު ހޮސްޕިޓަލްތަށް ވަނީ އަނިޔާލިބެމުންދާ ހުރިހާ އެންމެނަށް ފަރުވާދޭން ނުކުޅެދިފައެވެ.

ދެކުނުގެ ހޮސްޕިޓަލްތަކުގައިވެސް އެކަށީގެންވާ އަދަދަށް، ބޭނުންވާ ސިއްހީ ސާމާނު ނެތް އިރު، ސިއްހީ ފަރުވާދޭ ފަރާތްތަކަށް މިހާރު ވަނީ ފަރުވާދޭނީ ކޮންބަޔަކަށްތޯ އަދި ފަރުވާނުދީ ދޫކޮށްލާނީ ކޮންބަޔެއްތޯ އިހުތިޔާރުކުރަން މަޖުބޫރުވެފައެވެ.

އިސްރާއިލުން ޣައްޒާއަށް ދެމުންދާ ހަމަލާތަކުގައި މަރުވި މީހުންގެ އަދަދު 19،000ން މައްޗަށް އަރާފައިވާއިރު އަނިޔާލިބުނު މީހުންގެ އަދަދު ވަނީ 51،000ން މައްޗަށް އަރާފައެވެ.