ރާއްޖޭގައި އައިވީއެފް ހެދުން އިތުރުވަނީ ބަރަހަނާ މަންޒަރު ބަލާތީ ކަމަށް ވިދާޅުވި ނައިބު ވަޒީރަކު ހޫނުފެނަށް!
17 ޑިސެމްބަރު 2023 | އާދީއްތަ 09:50އޭނާ ވިދާޅުވީ ބަރަހަނާ މަންޒަރުތައް ބެލުން ހުއްޓުވުމަކީ ހަމައެކަނި ދީނީ ކަމެއް ނޫން ކަމަށާއި ދަރިމައިވުމުގެ ސިއްހަތު ގޯސްވާން މެދުވެރިވާ އެންމެ ކަމަކީ ވެސް އެއީ ކަމަށް
ޓްރާންސްޕޯޓް މިނިސްޓްރީގެ ނައިބަކަށް ހުންނަވާ ހަސަން ޒިހާން
ރާއްޖޭގައި އައިވީއެފް ހެދުން އިތުރުވެފައިވީ ބަރަހަނާ މަންޒަރުތައް ބަލާމިންވަރު އިތުރުވާތީ ކަމަށް ވިދާޅުވި ޓްރާންސްޕޯޓް މިނިސްޓްރީގެ ނައިބު ހަސަން ޒިހާންނަށް އާންމުންގެ ފާޑުކިޔުން އަމާޒުވެއްޖެއެވެ.
މިކަން ހިނގަން މެދުވެރިވީ ޒިހާން އެކްސްގައި ކުރެއްވި ޕޯސްޓެއްގެ ސަބަބުންނެވެ. އެ ޕޯސްޓުގައި އޭނާ ވިދާޅުވެފައިވަނީ ބަރަހަނާ މަންޒަރުތައް ބެލުން ހުއްޓުވުމަކީ ހަމައެކަނި ދީނީ ކަމެއް ނޫން ކަމަށާއި ދަރިމައިވުމުގެ ސިއްހަތު ގޯސްވާން މެދުވެރިވާ އެންމެ ކަމަކީ ވެސް އެއީ ކަމަށެވެ.
އަދި ރާއްޖެއިން އެހާ ގިނަ ބަޔަކު އައިވީއެފްގެ ޚިދުމަތްތަކަށް ދާން ޖެހެނީ ކީއްވެގެންތޯ ޒިހާން ވަނީ ސުވާލު އުފައްދަވާފައެވެ.
އިނގިރޭސި ބަހުން އޭނާ ކުރެއްވި ޓްވީޓާ އެކު، އާންމުންގެ ފާޑުކިޔުން އަމާޒުވާން ފެށިއެވެ. އެގޮތުން މިއީ ދިވެހި ދައުލަތުން މުސާރަ ދޭ ނައިބު ވަޒީރުންގެ ބަސްމަގު ހުންނަންޖެހޭ ގޮތްތޯ މިހާކު ސުވާލުކޮށްފައިވެއެވެ.
މީގެއިތުރުން މި ސަރުކާރުގެ ނައިބު ވަޒީރު ޒިހާން އެފަދައިން ވިދާޅުވުމަކީ އައިވީއެފްގެ ފަރުވާ ހޯދަމުންދާ މީހުންނަށް ކުރެވޭ ފުރައްސާރައެއް ކަމަށް ވެސް މީހަކު ބުނެފައިވެއެވެ.
އަދި ޒިހާން އެފަދައިން ވިދާޅުވުމަކީ އައިވީއެފްގެ ފަރުވާ ހޯދާ މީހުންނަށް ކުރެވޭ ކުޑައިމީސް އަމަލެއްގެ ގޮތުގައި ފާހަގަކުރަމުން މީހަކު ބުނީ، ވަޒީރުގެ އެ ޕޯސްޓުން ފެންނަނީ ގިނައިން ވާހަކަ ދައްކާ ވަރަކަށް އެ ބޭފުޅާގެ ޖާހިލުކަން ކަމަށެވެ.
"ދަރިމައިވުމުގެ މައްސަލަތައް ކުރިމަތިވާ މީހުންނަކީ ބަރަހަނާ މަންޒަރުތައް ބަލަން އެޑިކްޓްވާ މީހުން ކަމަށް ތުހުމަތު ކުރުމަކީ މުޅިން ވެސް އިހުތިރާމް ކުޑަ ކުރުން. ވާހަކަ ދައްކާ ވަރަކަށް ފެންނަނީ އޭނާގެ ޖާހިލުކަން،" އެ މީހާ ބުންޏެވެ.
އިތުރު މީހަކު ބުނި ގޮތުގައި، ކޮންމެ ފަހަރަކު ވެސް ޒިހާން އެއްޗެއް ވިދާޅުވާން އުޅުމުން ފެންނަނީ އެ ވިދާޅުވާ އެއްޗަކީ އެންމެ ތާކުންތާކުން ނުޖެހޭ އެއްޗެއް ކަމަށެވެ.
ޒިހާން އެފަދައިން ވިދާޅުވިއިރު، އައިވީއެފް ހެދުން އިތުރުވުމާ ގުޅޭ ގައުމީ ދިރާސާއެއް ރާއްޖޭގައި އަދި ހަދާފައެއް ނުވެއެވެ.
