ބްރޯޑްކޮމްގެ މެމްބަރުކަމަށް އައްޔަންކުރަން ފޮނުވި ނަންތައް އަނބުރާ ގެންދިޔައީ ރަނގަޅަކަށް ނޫން، މަޖިލީހުން ގޮތެއް ނިންމަނީ
ކޮމިޓީ މަރުހަލާއިން ނިމިފައި ވަނިކޮށް މެމްބަރުންގެ ނަންތަކެއް ނުގެންދެވޭނެ
ބްރޯޑްކާސްޓިންގ ކޮމިޝަން
ބްރޯޑްކޮމްއަށް އައްޔަންކުރުމަށް ފޮނުވާފައިވާ މެމްބަރުންގެ ނަންތައް އަނބުރާ ގެންގޮސްފައިވަނީ ރަނގަޅަށް ނޫންކަމަށްވާތީ، ނަންތަކާމެދު މަޖިލީހުގެ ތަޅުމުން ގޮތެއް ނިންމަން ފާސްކޮށްފިއެވެ.
އެގޮތަށް ނިންމާފައިވަނީ މަޖިލީހުގެ އާއްމު ކޮމިޓީންނެވެ. ކޮމިޓީ ސްޓޭޖަށް ދިއުމަށްފަހު ނަންތައް އަނބުރާ ގެންދެވުމަކީ އާންމު އުސޫލެއްގެގޮތުން އަމަލުކުރާ ގޮތެއް ނޫނެވެ. ކޮމިޓީ މަރުހަލާއަށް ދިއުމަށްފަހު ބިލްތައްވެސް އަނބުރާ ގެންދިއުމަކީ އާއްމު އުސޫލެއްގެ ގޮތުން އަމަލުކުރާ ގޮތެއް ނޫނެވެ. އެހެންކަމުން ކޮމިޓީ މަރުހަލާއިން ނިމިފައި ވަނިކޮށް މެމްބަރުންގެ ނަންތައް ނުގެންދެވޭނެ ކަމަށް، "ރާއްޖެ އެމްވީ"އަށް މައުލޫމާތުދެއްވަމުން މަޖިލީހުގެ ގިނަ ދުވަސްވީ މެމްބަރަކުވެސް ވަނީ ވިދާޅުވެފައެވެ.
ކުރީ ސަރުކާރުން ބައެއް މުއައްސަސާތަކާއި ގައުމުތަކުގެ ސަފީރުން އައްޔަންކުރަން ފޮނުވި ނަންތައް އަނބުރާ ގެންދެވިކަމަށް މަޖިލީހުގެ ރިޔާސަތުން ވަނީ ކުރިން އިއުލާންކުރައްވާފައެވެ. އެ ނަންތައް އަނބުރާ ގެންދެވީ މިދިޔަ މަހުގެ 22 ވަނަ ދުވަހު، ޑރ. މުހައްމަދު މުއިއްޒު ފޮނުއްވި ސިޓީފުޅަކާ އެކުގައެވެ. ކުރީގެ ރައީސް އިބްރާހީމް މުހައްމަދު ސާލިހު، ބްރޯޑްކާސްޓިންގ ކޮމިޝަން (ބްރޯޑްކޮމް)އާއި ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް)އަށް އައްޔަންކުރަން ފޮނުއްވާފައިވާ ނަންތައް މި ސަރުކާރުން އަނބުރާ ގެންދަވާފައިވާކަމަށް އޭރު އިޢުލާންކުރެއްވިއެވެ.
ނަމަވެސް މިނިވަން މުއައްސަސާތަކުގެ ކޮމިޓީން އޮތީ އޭރު މިނިވަން މުއައްސަސާތަކަށް ފޮނުއްވި ނަންތައް ދިރާސާކޮށް ނިންމާފައެވެ. ބުދަ ދުވަހުގެ އާންމު ކޮމިޓީގައި ކޮމިޓީގެ މެމްބަރު މުހައްމަދު ރަޝީދު ވިދާޅުވީ، މިނިވަން މުއައްސަސާ ކޮމިޓީން ދިރާސާކޮށް ނިންމާފައިވާ ރިޕޯޓަށް އާންމު ކޮމިޓީގެ ލަފަޔަކަށް އެދިފައިވާކަމަށެވެ. ކޮމިޓީގެ ރިޕޯޓާމެދު ޚިޔާލު ތަފާތުވެފައިވާ ކަމަށް އޭނާ ވިދާޅުވިއެވެ. ކޮމިޓީން އެކަމާމެދު ގޮތެއް ނިންމުމުގެ ބަދަލުގައި މަޖިލީހުގެ ތަޅުމުން ގޮތެއް ނިންމެވުމަށް އޭނާ ވަނީ ހުށަހަޅާފައެވެ. އެ ހުށަހެޅުން ފާސްވީ ކޮމިޓީގެ އިއްތިފާގުންނެވެ.
އެނގިފައިވާ ގޮތުން މަޖިލީހަށް ފޮނުވާ މައްސަލައަކާމެދު ގޮތެއް ނިންމާފައި ވަނިކޮށް، ނަން އަނބުރާ ނުގެންދެވޭނެ ކަމަށް މަޖިލީހުގެ ކޮމިޓީއަށް ވަނީ ލަފާ ލިބިފައެވެ. އެހެންކަމުން އެ މައްސަލައާމެދު ތަޅުމުގައި ގޮތެއް ނިންމާނެެއެވެ.
