އެޗްއާރުސީއެމްގެ މެމްބަރުކަމަށް ކުރިމަތިލުމަށް ފުރުސަތު ހުޅުވާލައިފި
17 މެއި 2017 | ބުދަ 16:05ދާދިފަހުން އެކޮމިޝަންގެ ނައިބު ރައީސް ޝިފާގު މުފީދު ވަނީ މެމްބަރުކަމުން އިސްތިއުފާ ދެއްވާފަ
އެމްއާރުސީއެމްގެ ކުރީގެ ނައިބު ރައީސް ޝިފާގު މުފީދު (ވައަތްފަރާތުގައި)
ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ މެމްބަރު ކަމަށް ކުރިމަތިލުމުގެ ފުރުސަތު ހުޅުވާލައިފި އެވެ.
ރައީސުލްޖުމްރިއްޔާގެ އޮފީހުން ކޮށްފައިވާ އިއުލާނެއްގައި ވަނީ ހިއުމަން ރައިޓްސް ކޮމިޝަނުގެ މެމްބަރު ކަމަށް ކުރިމަތިލުމުގެ ފުރުސަތު މި މެއި މަހުގެ 24 ވަނަ ދުވަހުގެ 14:00ގެ ނިޔަލަށް ހުޅުވާލާފަ އެވެ.
ހިއުމަން ރައިޓްސް ކޮމިޝަނުގެ މެމްބަރުކަމަށް ކުރިމަތިލާ މީހުންގެ ސަރުތުތަކުގެ ތެރޭގައި ސިޔާސީ ޕާޓީއެއްގެ މެމްބަރަކު ކަމުގައި ނުވަތަ ސިޔާސީ ޕާޓީއެއްގައި ހަރަކާތްތެރިވާ މީހަކު ކަމުގައި ވެގެން ނުވާނެ ކަމަށެވެ.
ރައީސް އޮފީހުން ހިއުމަން ރައިޓްސް ކޮމިޝަނުގެ މެމްބަރުކަމަށް ކުރިމަތިލުމުގެ ފުރުސަތު ހުޅުވާލާފައި މިވަނީ އެކޮމިޝަނުގެ މެމްބަރު ޝިފާގު މުފީދު އިސްތިއުފާ ދެއްވުމާ ގުޅިގެންނެވެ. އެޗްއާރުސީއެމްގެ ނައިބު ރައީސްގެ މަގާމުގައި ހުންނެވި، ޝިފާގު އިސްތިއުފާ ދެއްވާފައިވަނީ މި މެއި މަހުގެ 11 ވީ ބުރާސްފަތި ދުވަހު ކަމަށްވެއެވެ. އަދި ޖެހިގެންއައި އާދިއްތަ ދުވަހު ޝިފާގުއަށް ވަނީ ހޯމް މިނިސްޓްރީގެ ސްޓޭޓް މިނިސްޓަރުކަން ދެއްވާފަ އެވެ.
އޭގެފަހުން ޝިފާގު ގެންދަވަނީ ސަރުކާރު ކޯލިޝަން ޕީޕީއެމްއާއި އެމްޑީއޭއިން ހިންގާ ޖަގަހަ ޖަލްސާތަކުގައި ބައިވެރިވެ، ހަރަކާތްތެރިވަމުންނެވެ.
އެޗްއާރްސީއެމް އަށް 2015 ވަނަ އަހަރު އައްޔަންކުރި ޝިފާގު އެ ކޮމިޝަނުން އިސްތިއުފާ ދެއްވި އިރު ކޮމިޝަންގެ މަސައްކަތްތަކާ މެދު ހިތްހަމަޖެހިވަޑައިނުގެން މީގެ ކުރިން ވާހަކަ ދައްކަވާފައި ވެއެވެ.
