ކައުންސިލްތަކުގެ އިންތިޚާބުތަކުގައި ވާދަކުރާ މެމްބަރުންގެ ކިބައިގައި ހުންނަންޖެހޭ ޝަރުތުތައް ބަދަލުކުރުމަށް ލޯކަލް ކައުންސިލް އިންތިޚާބުތަކުގެ ގާނޫނަށް ސަރުކާރަށް ނިސްބަތްވާ ހޮޅުދޫ ދާއިރާގެ މެމްބަރު އަލީ މުހައްމަދު ހުށަހެޅުއްވި އިސްލާހު ގެނައުމުގެ ބިލް ރައްޔިތުންގެ މަޖިލީހަށް ބަލައިގަތުމަށް ފާސްކޮށްފި އެވެ.

އަންގާރަ ދުވަހު ބޭއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ދެވަނަ ޖަލްސާގައި އެބިލް މަޖިލީހަށް ބަލައިގަތުމަށް ފާސްކޮށްފައިވަނީ 41 މެމްބަރުންގެ އަޣްލަބިއްޔަތުންނެވެ. އެބިލް ބަލައިގަތުމަށް ނުފެންނަ ކަމަށް 23 މެމްބަރަކު ވޯޓް ދެއްވި އެވެ.

އެބިލަށް ބަހުސްކުރެއްވި އިދިކޮޅު އެމްޑީޕީއަށް ނިސަބަތްވާ މެމްބަރުން ވިދާޅުވީ އެއީ ސަރުކާރުން ހިންގާ ޖަރީމާތުގެ ތެރެއިން ހިންގަމުންދާ ކަމެއް ކަމަށެވެ. އެގޮތުން ބޮޑެތި ޖިނާއީ ކުށްތައް ކޮށްފައިވާ ފަރާތްތަކަށް ކައުންސިލް އިންތިހާބުތަކުގައި ބައިވެރިވެވޭ ގޮތަށް ގާނޫނަށް އިސްލާހު ހުށަހެޅީ ޕީޕީއެމް ޓިކެޓްގައި ކައުންސިލް އިންތިހާބަށް ވާދަކުރަން ބޭނުންވާ އިހުލާސްތެރި މީހުން ނެތުމުން ކަމަށް އިދިކޮޅު ފަރާތްތަކުން ބުންޏެވެ.

އެބިލް މިހާރު އޮތްގޮތަށް ފާސްކުރަން ނުފެންނަ ކަމަށް ޕީޕީއެމްގެ ބައެއް މެމްބަރުން ވެސް ވަނީ އެބިލަށް ބަހުސްކުރަމުން ވިދާޅުވެފަ އެވެ. އަދި އެބިލް ކޮމެޓީއަށް ފޮނުވައި ބައެއް އިސްލާހުތައް ގެންނަން ފެންނަ ކަމަށް ވެސް ޕީޕީއެމްގެ ބައެއް މެމްބަރުން ވިދާޅުވެފައި ވެއެވެ.

ކައުންސިލްތަކުގެ އިންތިހާބުގެ ގާނޫނަށް ހުށަހަޅުއްވާފައިވާ އިސްލާހާ ބެހޭ ގޮތުން ރާއްޖެއެމްވީ އަށް މައުލޫމާތު ދެއްވަމުން އަލީ މުހައްމަދު ވިދާޅުވީ ލޯކަލް ކައުންސިލްތަކުގެ އިންތިހާބުގެ ގާނޫނަށް ހުށަހަޅާފައިވާ އިސްލާހަކީ އިންތިހާބުގައި ކައުންސިލް މެމްބަރު ކަމަށް ކުރިމަތިލެވޭނެ ޝަރުތުތައް ބަދަލުކުރުމަށް ހުށަހަޅުއްވާފައިވާ އިސްލާހެއް ކަމަށެވެ. މިހާރު ހުށަހަޅާފައިވާ އިސްލާހުގެ ސަބަބުން މިހާރަށްވުރެ ފުޅާ ދާއިރާއެއްގައި ކައުންސިލް އިންތިހާބަށް ކުރިމަތިލުމުގެ ފުރުސަތު ހުޅުވިގެންދާނެ ކަމަށާއި ރައްޔިތުންނަށް އެ މީހުން ބޭނުންވާ މީހަކު ކައުންސިލް މެމްބަރު ކަމަށް ގެނައުމަށް އިތުރު ފުރުސަތު ލިބިގެންދާނެ ކަމަށް އޭނާ ވިދާޅުވިއެވެ.

އަލީ މުހައްމަދު ވިދާޅުވީ މި އިސްލާހުގެ ސަބަބުން ކައުންސިލް އިންތިހާބަށް ކުރިމަތިލުމަށް ބޭނުންވާ އެއްވެސް މީހަކަށް އެއްވެސް ޒާތެއްގެ ހުރަހެއް ކުރިމަތި ނުވާނެ ކަމަށެވެ. އެގޮތުން ގާނޫނުއަސާސީގައި ކައުންސިލް އިންތިހާބަށް ކުރިމަތިލާ މީހެއްގައި ހުންނަން ޖެހޭ ކަމަށް ބުނެފައިވާ ޝަރުތުތަކަށް ވުރު އިތުރު ނުވަތަ އެއަށް ހުރަސް އެޅޭ ފަދަ އެއްވެސް ޝަރުތެއް ހުށަހަޅާފައި ނުވާނެ ކަމަށް އޭނާ ވިދާޅުވިއެވެ.

ލޯކަލް ކައުންސިލް އިންތިހާބުގެ ގާނޫނަށް އޭނާ ހުށަހެޅުއްވި އިސްލާހުގެ ސަބަބުން މިއަހަރު އެޕްރީލް މަހު ބޭއްވުމަށް ހަމަޖެހިފައިވާ ކައުންސިލް އިންތިހާބަށް ކުރިމަތިލާފައިވާ ކެންޑިޑޭޓުންނަށް އެއްވެސް އަސަރެއް ނުވަތަ ހުރަހެއް ކުރިމަތި ވެދާނެތޯ ސުވާލު ކުރުމުން، އަލީ މުހައްމަދު ވިދާޅުވީ މި އިސްލާހުތަކުގެ ސަބަބަން ކައުންސިލް އިންތިހާބަށް މިހާރު ކުރިމަތިލާފައިވާ އެއްވެސް ކެންޑިޑޭޓަކަށް ހުރަސްތަކެއް އަދި ކުރިމަތިވެދާނެ ކަމަށް ގަބޫލުފުޅު ނުކުރައްވާ ކަމަށެވެ. އެފަދަ ގޮތަކަށް ކަމެއް ދިމާވެދާނެ ގޮތަކަށް ގާނޫނަށް އިސްލާހެއް ހުށަހެއް ނާޅުއްވާނެ ކަމަށް އޭނާ ވިދާޅުވިއެވެ.

އަލީ މުހައްމަދު ވިދާޅުވި ގޮތުގައި އިސްލާހު ހުށަހެޅުއްވީ ބިލް ރައްޔިތުންގެ މަޖިލީހުން ފާސްކޮށް ރައީސުލްޖުމްހޫރީއްޔާ ތަސްދީގު ކުރައްވާ ދުވަހުން ފެށިގެން އަމަލު ކުރަން ފަށާ ގޮތަށެވެ.

އަލީ މުހައްމަދު އެގޮތަށް ވިދާޅުވިއިރު، މިހާރަކަށް އައިސް މަޖިލީހަށް ހުށަހެޅޭ ބައެއް ބިލްތައް ދެ ދުވަހުގެ ތެރޭގައި މަޖިލީހުން ފާސްކޮށް، ރައީސުލްޖުމްހޫރިއްޔާ އެބިލް ތަސްދީގުކޮށް، ދިވެހި ސަރުކާރުގެ ގެޒެޓްގައި ޝާއިއުކޮށް ގާނޫނަށް ބަދަލުވެފައި ވެއެވެ.

އެހެންކަމުން ބައެއް މެމްބަރުން ވަނީ މިހާރު ބޭއްވުމަށް މަސައްކަތް ކުރަމުންދާ ލޯކަލް ކައުންސިލްތަކުގެ އިންތިހާބަށް އެބިލްގެ ސަބަބުން އަސަރެއް ފޯރުމަކީ އެކަށީގެންވާ ކަމެއްކަމަށް ވިދާޅުވެ ކަންބޮޑުވުން ފާޅުކުރައްވާފަ އެވެ.