ބްރޯޑްކޮމްގެ ޒިންމާ އަދާނުކޮށް، ބްރޯޑްކާސްޓަރުންގެ ފަހަތުން ދުވުން ނޫން ކަމެއް ނެތް: ހަސީނު
ހަސީނު ވިދާޅުވަނީ ބްރޯޑްކާސްޓިންގ ކޮމިޝަނުން އެކޮމިޝަނުގެ ގާބިލުކަން ނެތްކަމަށް އިއުތިރާފު ވެފައިވާ ކަމަށް
ބްރޯޑްކާސްޓިންގ ކޮމިޝަނަށް ޖަވާބުދާރީވުމަށް ފަހު، އަލީ ޔޫސުފާއި ގާނޫނީ ވަކީލު ހަސީނު ރާއްޖެޓީވީއަށް މައުލޫމާތު ދެއްވަނީ
މޯލްޑިވްސް ބްރޯޑްކާސްޓިންގ ކޮމިޝަނުން އަދާކުރަންޖެހޭ ގާނޫނީ ޒިންމާ އަދާނުކޮށް، ފެންނަމުންދަނީ ބްރޯޑްކާސްޓަރުގެ ފަހަތުން ދުވުމާއި ވަކި މީޑިއެއްގެ ފަހަތުން ނެއްޓިގެން ނޫޅެވޭ މަންޒަރު ކަމަށް މަޝްހޫރު ގާނޫނީ ވަކީލު އަބްދުﷲ ހަސީނު ވިދާޅުވެއްޖެއެވެ.
ހަސީނު އެގޮތަށް ވިދާޅުވީ ރާއްޖެޓީވީގެ ނިއުސް ޑައިރެކްޓަރ އަލީ ޔޫސުފް ބްރޯޑްކާސްޓިންގ ކޮމިޝަނަށް ހާޒިކުރަމުންދާ އަބުރުގެ މައްސަލާގައި އެކޮމިޝަނަށް ޖަވާބުދާރީވުމަށް ފަހު އެކޮމިޝަނުން ނިކުމެވަޑައިގެންނެވުމަށް ފަހު ރާއްޖެޓީވީއަށް ދެއްވި އިންޓަރވިއުއެއްގަ އެވެ.
ބްރޯޑްކާސްޓިން ކޮމިޝަނަށް ހަސީން ވަޑައިގެންނެވީ ރާއްޖެޓީވީން ގެނެސްދިން ޚަބަރަކާ ގުޅިގެން ކުރީގެ ނޫސްވެރިޔާ އާލާ އިބްރާހީމް 50،000ރ. އިން ޖޫރިމަނާކުރި މައްސަލަ އަލުން ރިވިއުކުރުމަށް ކަމަށް ބުނެ އެ ކޮމިޝަނުން ބަލަމުން ގެންދާ މައްސަލައިގަ އަލީ ޔޫސުފް ހާޒިރުކުރުމުން އޭނާގެ ވަކީލެއްގެ ގޮތުގައެވެ.
އަލީ ޔޫސުފްގެ ވަކީލެއްގެ ގޮތުގައި ވަޑއިގެން ހަސީން ވިދާޅުވީ ދައުލަތުން ވަރަށް ބޮޑު ހަރަދެއް ކޮށްގެން ހިންގަމުންދާ ބްރޯޑް ކާސްޓިންގ ކޮމިޝަނުން ބްރޯޑްކާސްޓަރުންގެ ފަހަތުން ދުވުމަށް ވުރެ، ބްރޯޑްކާސްޓް ކުރުމުގެ ދާއިރާ އިތުރަށް ތަރައްގީކޮށް ކުރިއަށް ގެންދިއުމުގެ ވިސްނުން ގެންގުޅުން މާމުހިއްމު ކަމަށެވެ. ނަމަވެސް ފެންނަމުން ދަނީ ގާނޫނީ ޒިންމާވެސް އަދާނުކުރެވޭތަންކަމަށާއި ކޮމިޝަނަށް ހުށަހެޅޭ މައްސަލަތައް ވެސް ބެލުމުގެ ގާބިލްކަން ނެތްކަމަށް އެކޮމިޝަނުން ބުނުމަކީ ހައިރާންވާ ކަމެއް ވެސް ނޫން ކަމަށެވެ.
"ބްރޯޑްކާސްޓިންގ ކޮމިޝަނުން ޒިންމާދާރުކަމާ އެކު މިގައުމުގެ ހާލަތު ރަނގަޅު ކުރުމަށް، ބްރޯޑްކާސްޓްކުރާ ފަރާތްތަކަށް ފުރުސަތުތައް ތަނަވަސްކޮށްދީ، އެފަރާތްތަކަށް ކުރިއެރުން ލިބޭނެ ގޮތަކަށް އަމަލުކުރައްވާ ކަމަކަށް ފާހަގައެއް ނުކުރެވޭ. އޭގެބަދަލުގައި ބްރޯޑްކާސްޓަރުން ފަހާދުވެ، ބްރޯޑްކާސްޓަރުންނަށް އެކިއެކި ދިއްތުރާތައް ކުރިމަތިކޮށް، ސިޔާސީގޮތުން ވަކިކަހަލަ ނުފޫޒުތަކެއް ފޯރުވަމުންދާ ފަރާތެއްގެ ގޮތުގައި ފާހަގަކުރެވެނީ،" ހަސީނު ވިދާޅުވި އެވެ.
ހަސީން ވިދާޅުވީ މިހާރު ފެނިގެންދަނީ ޚަބަރު ލިޔުނު ނޫސްވެރިޔާގެ ބަދަލުގައި އަނެއްކާ ވެސް ބްރޯޑްކާސްޓަރެއްގެ ފަހަތުން ކޮމިޝަން ދުވާ މަންޒަރުކަމަށާއި ގާނޫނުއަސާސީއާ ޚިލާފަށް މައްސަލަ ބެލި ކަމަށް އިއުތިރާފްވި ބަޔަކު ދެން އަލުން އެފަދަ ކަމެއް ތަކުރާރުނުކުރާނެ ކަމުގެ އެއްވެސް ޔަގީން ކަމެއް ނެތް ކަމަށެވެ.
އަލީ ޔޫސުފް ވިދާޅުވީ ކޮމިޝަނުން ކުރީ ދެ ސުވާލެއް ކަމަށާއި އެއީ ރާއްޖެ ޓީވީގައި ޚަބަރު ގެނެސްދިނުމުގައި އަމަލުކުރާ ގޮތާއި އާލާ ލިޔުނު ޚަބަރުގައި އަބުރު ގެއްލުނު ކަމަށް ބުނާ މީހާގެ ނަން ޚަބަރުގައި ހިމެނީ އޭނާ ނޫން ކަމަށް ބުނާ މައްސަލައަކާ ބެހޭ ގޮތުން ކަމަށެވެ.
އަލީ ޔޫސުފް ވިދާޅުވީ އާލާ ފުރަތަމަ ޖޫރިމަނާ ކުރީ ގާނޫނުއަސާސީގައި ބުނާ ފަދައިން މައްސަލަ ރައްދުވާ ފަރާތުގެ ބަހެއް ނުހޯދައި ކަމަށް ވާތީ އެއީ ގާނޫނުއަސާސީއާ ހިލާފް ނިންމުމެއް ކަމަށް ކޮމިޝަނުން ނިންމައި އެ މައްސަލަ އަލުން ރިވިއުކުރަން ނިންމި އިރު އެ މައްސަލައާ ގުޅިގެން ރާއްޖެ ޓީވީ 200،000ރ. އިން ޖޫރިމަނާކުރި ކުރުން ބާތިލްކޮށްފައި ނުވާ ކަމަށެވެ. ނަމަވެސް މައްސަލައިގެ އަސްލަކީ އާލާ ލިޔުނު ޚަބަރު ކަމަށްވާ އިރު އެ މައްސަލަ ބާތިލްކުރާ ނަމަ ރާއްޖެޓީވީގެ ޖޫރިމަނާ ވެސް ބާތިލް ވާނެ ކަމަށް އަލީ ޔޫސުފް ވިދާޅުވިއެވެ.
