އަށްހާސް ސިޓީ ފޮނުވިއަސް ދިވެހި ފުލުހުން ޖެހެނީ ބަލައިގަންނަން: ރޮޒެއިނާ

ޔާމީން ރަޝީދު މަރުގެ ތަޙްގީގް އިންސާފްވެރިކަމާއި އެކު ކުރިއަށް ގެންދިއުމަށް އެދި ޔާމީންގެ އާއިލާއިން 800 ސިޓީ ފުލުހުންގެ އޮފީހަށް ހުށައެޅުމުން އެސީޓީތަށް ބޭރުކޮށްލި ކަމަށާއި އެހެންނަމަވެސް ރައްޔިތުންގެ ފަރާތުން 8000 ސިޓީ ފޮނުވިއަސް ދިވެހި ފުލުހުން ޖެހެނީ ބަލާއިގަންނަން ކަމަށް ވިދާޅުވެ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ފުލުހުންގެ މުއައްސަސާއަށް ވަރަށް ބޮޑަށް ފާޑު ވިދާޅުވެއްޖެ އެވެ.

ކައުންސިލް އިންތިހާބުގެ ކެމްޕޭންގައި އައްޑޫ ސިޓީގެ ހިތަދޫގައި ބޭއްވި ޖަލްސާގައި ވާހަކަދައްކަވަމުން، އެމްޑީޕީ ޕާލިމެންޓްރީ ގުރޫޕުގެ ނައިބް ލީޑަރުކަންވެސް ކުރައްވާ ރޮޒެއިނާ ވިދާޅުވީ ފުލުހުންގެ އިދާރާއިން، އަނިޔާވެރި، ރަހުމުކުޑަގޮތަކަށް މަރާލި ޔާމިން ރަޝީދުގެ ބައްޕަ ބޭރުކޮށްލީ ވަރަށް ދެރަކޮށްލާފައި ކަމަށާއި ދިވެހި ރައްޔިތުންގެ ހިމާޔަތާއި ރައްކާތެރިކަން ކަށަވަރުކޮށްދޭން ރައްޔިތުން މުސާރަ ދީފައި ތިބޭ ބަޔަކު އެގޮތަށް ކަންތައް ކޮށްގެން ނުވާނެ ކަމަށެވެ.

ޕޯޑިއަމްތަކުގައި ވާހަކަފުޅު ދައްކަވަމުން ރައީސް ޔާމިން ވިދާޅުވަމުން ގެންދަވަނީ އެމަނިކުފާނުގެ ސަރުކާރުން ރަނގަޅު ކުރަންވީ ކަންތަކަކީ ކޮބައިކަން އިދިކޮޅު ފަރާތްތަކުން ކިޔައި ނުދޭ ކަމަށާއި އެހެން ނަމަވެސް އަދުލުއިންސާފްގެ ނިޒާމް ހަރުދަނާ ކުރުމަށް އިދިކޮޅު ފަރާތްތަކުން ސަރުކާރަށް ގޮވާލާ އަޑު ރައީސް ޔާމިންއަށް ނީވެނީތޯ ރޮޒެއިނާ ވަނީ ސުވާލު އުފައްދަވާފައެވެ. އަދި ނޫސްވެރިކަމުގެ މިނިވަން ކަމާއި އެއްވެ އުޅުމުގެ މިނިވަން ކަމާއި ހިޔާލުފާޅު ކުރުމުގެ މިނިވަން ނެތް ވާހަކަ އިދިކޮޅު ފަރާތްތަކުން ގޮވަމުންދާއިރު އެވާހަކަވެސް އަޑު ނިވެނީތޯ ރޮޒެއިނާ ވިދާޅުވި އެވެ.

"އިދިކޮޅު ފަރާތަކުން ނުބުނޭ ކަމަށް. ބަލަ އަޅުގަނޑުމެން އަދި އދިކޮޅު އިއްތިހާދުން އަބަދު މި ކިޔަނީ އަދުލުއިންސާފްގެ ނިޒާމް ހަރުދަނާ ކުރުމަށް. އެއްވެއުޅުމުގެ މިނިވަންކަމެއް ނެތް ، ނޫސްވެރިކަމުގެ މިނިވަން ކަމެއް ނެތް ، އަދި ވެސް އަޅުގަނޑުމެން ޝުކުރިއްޔާ ޔާމީން އޭ ކިޔަންވީތޯ" ރޮޒެއިނާ ވިދާޅުވި އެވެ.

އެހެންކަމުން މިއަދު ރައްޔިތުން ތިބީ ގޮތް މެއި މަހުގެ 6 ވަނަ ދުވަހު ވޯޓުން ސަރުކާރަށް ދައްކާލާނެ ކަމަށް ވިދާޅުވަމުން ރޮޒެއިނާ ވިދާޅުވި އެވެ.