ޔާމީން މިނިވަންކުރުމާމެދު ސުވާލުކުރުމުން ސަރުކާރުގެ ސީދާ ޖަވާބެއް ނުލިބުނު

ކުރީގެ ރައީސް އަބްދުﷲ ޔާމީން މިިނިވަންކުރުމާމެދު ސުވާލުކުރުމުން ސަރުކާރަށް ސީދާ ޖަވާބެއް ނުދެވުނެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ވަނީ، ޔާމީން ދޫކޮށްނުލެވި ވަނީ ކޮން ކަމެއް ނުކުރެވިގެންތޯ ސުވާލުކޮށްފައެވެ. އެހެންނަމަވެސް އެކަމަށް ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް އަބްދުﷲ ޚަލީލު އެކަމަށް ސީދާ ޖަވާބެއް ދެއްވާފައެއް ނުވެއެވެ.

ރިޝްވަތު ހިފުމާއި މަނީލޯންޑަރިންގެ ކުށް ސާބިތުވުމާއި ގުޅިގެން 11 އަހަރުގެ ޖަލު ހުކުމެއް ތަންފީޒް ކުރައްވަމުންދާ ޔާމީން މިނިވަންކޮށްދެއްވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. އަދި އެ މަސައްކަތް ވެރިކަމުގެ ފުރަތަމަ ދުވަހު ކުރައްވާނެ ކަމަށްވެސް، ރިޔާސީ އިންތިޚާބުގެ ކެމްޕެއިންގެ ދުވަސްވަރު ވަނީ ވިދާޅުވެފައެވެ. ރައީސް މުއިއްޒު އޭރު ވިދާޅުވީ ޔާމީން މިނިވަން ނުކުރެވި ވަނީ އޭރުގެ ސަރުކާރުން ޝަރުއީ ދާއިރާއަށް ސިޔާސީ ނުފޫޒު ފޯރުވާތީ ކަމަށެވެ. ނަމަވެސް ކުރީގެ ސަރުކާރުން ޔާމީނަށް ދިން ލުއިތައް ފިޔަވައި އިތުރު އެއްވެސް ލުޔެއް މި ސަރުކާރުން ދީފައެއްނުވެއެވެ.

ޔާމީން މިނިވަންކުރުމާމެދު ސުވާލު ދެންނެވުމުން، ފިރުޒުލް ދެއްކެވީ ޝަރުއީ ދާއިރާ މިނިވަންކުރުމާއި އެ ދާއިރާ އިސްލާހުކުރުމުގެ ވާހަކައެވެ. އަދި ޝަރުއީ ދާއިރާއަށް ފޯރުވާ ނުފޫޒު ނައްތާލުމާއި، ސަރުކާރުން ޖުޑީޝަރީ އިސްލާހުކުރުމަށް ގެންގުޅޭ ސިޔާސަތުތަކުގެ ވާހަކަދެއްކެވިއެވެ. އަދި ޝަރުއީ ދާއިރާއާ ގުޅުންހުރި ގާނޫނުތައް އިސްލާހުކުރުމުގެ ވާހަކަވެސް ދެއްކެވިއެވެ. ނަމަވެސް ޔާމީން މިނިވަން ނުކުރެވި އޮތް ސަބަބު ސާފުކޮށެއް ނުދެއްވައެވެ. އަދި އެކަމަށްޓަކައި ކުރައްވާ މަސައްކަތްތަކެއް ވެސް ހާމައެއް ނުކުރައްވައެވެ.

ޔާމީން މިނިވަންކުރުމަށް ރައީސް މުއިއްޒުގެ ސަރުކާރުން މަސައްކަތް ނުކުރާތީ އާއްމުންގެ ފާޑުކިޔުން ވަނީ އަމާޒުވެފައެވެ. މީގެ އިތުރުން ޔާމީން މިނިވަންކުރުމާމެދު އެކި ފަހަރު އެކި ގޮތަށް މުއިއްޒު ވާހަކަދައްކަވާފައިވާތީ، ޔާމީނަށް ތާއީދުކުރާ އާއްމުންގެ ފާޑުކިޔުން ވަނީ އަމާޒުވެފައެވެ. އަދި ޑރ. މުއިއްޒު ވެރިކަމަށް ވަޑައިގަންނަވާ އެންމެ ބޮޑު އެއް މަގުސަދަކީ ޔާމީން މިނިވަންކުރެއްވުން ކަމަށް ވިދާޅުވެ އޭރު ކެމްޕެއިން ކުރެއްވިނަމަވެސް، ވެރިކަން ލިބުމުން ރާގު ބަދަލުވެފައިވާކަމަށް އާއްމުން ދަނީ ބުނަމުންނެވެ.