"ރާއްޖެ އަކީ ސިންގަޕޫރު ފިޔަވާ އެންމެ ބޮޑަށް ރެގިއުލޭޓްކޮށްގެން ހިންގާ ގައުމު، ވިޔަފާރިތެރެއަށް ސަރުކާރުން ވަދެގެން ނުވާނެ"
13 ފެބުރުއަރީ 2025 | ބުރާސްފަތި 18:11ސަރުކާރުން ޓެކްސީ ޑްރައިވަރުންނާއި މެދު އަމަލުކުރާ ގޮތުން، ޓެކްސީ ޑްރައިވަރުންގެ ގިނަ ކަންބޮޑުވުންތަކެއް މިއަދު އެބަ ހުރި ކަމަށް ރައީސް ޔާމީން ވިދާޅުވި
ހުޅުމާލޭގައި ދުއްވާފައި އަންނަ ޓެކްސީ ތަކެއް
ރާއްޖެ އަކީ ސިންގަޕޫރު ފިޔަވާ އެންމެ ބޮޑަށް ރެގިއުލޭޓްކޮށްގެން ޓެކްސީ ވިޔަފާރި ހިންގާ ގައުމު ކަމަށާއި ވިޔަފާރިތެރެއަށް ސަރުކާރުން ވަދެގެން ނުވާނެ ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ ޕީއެންއެފްގެ ޖަގަހަ ޖަލްސާގައި ވާހަކަދައްކަވަމުންނެވެ.
ސަރުކާރުން ޓެކްސީ ޑްރައިވަރުންނާއި މެދު އަމަލުކުރާ ގޮތުން، ޓެކްސީ ޑްރައިވަރުންގެ ގިނަ ކަންބޮޑުވުންތަކެއް މިއަދު އެބަ ހުރި ކަމަށް ރައީސް ޔާމީން ވިދާޅުވިއެވެ. ޓެކްސީ ޑްރައިވަރުންނަކީ ބުރަ މަސައްކަތެއް ކުރާ ބައެއް ކަމަށާއި އެ ވިޔަފާރި ތެރެއަށް ސަރުކާރުން ވަނުމަކީ ވަރަށް ބޮޑު ކަންބޮޑުވުމެއް ކަމަށް ރައީސް ޔާމީން ވިދާޅުވިއެވެ. ސަރުކާރަކުން ޓެކްސީ ޑްރައިވަރުންގެ ވިޔަފާރި ތެެރެއަށް ވަންނަން ޖެހޭ ޤަބޫލުކުރެވޭ އެއްވެސް ސަބަބެއް ނެތް ކަމަށް އެ މަނިކުފާނު ވިދާޅުވިއެވެ. އެ ވިޔަފާރި ރަނގަޅުކުރުމަށް އަގާއި މެދު ގޮތްތަކެއް ކަނޑައެޅުމަކީ ކުރެވިދާނެ ކަމެއް ކަމަށް އޭނާ ވިދާޅުވިއެވެ.
މީގެ އިތުރުން މިހާރުގެ ރައީސް ޑރ.މުހައްމަދު މުއިއްޒު އާއި ޓްރާންސްޕޯޓް މިނިސްޓްރީން ވެސް ވަނީ ޓެކްސީ ޑްރައިވަރުންނަށް އޮޅުވާލާފައި ކަމަށް އެ މަނިކުފާނު ވިދާޅުވިއެވެ. ޓެކްސީ ޑްރައިވަރުންނަށް ނިކަމެތިވާ ފަދަ ކަމެއް ނުކުރާނެ ކަަމަށް ބުނެ ސަރުކާރުން ވީ ވައުދާއި މިއަދު ހިލާފުވެފައިވާ ކަމަށް ރައީސް ޔާމީން ވިދާޅުވިއެވެ. އަދި ސަރުކާރުން ޓެކްސީ ޚިދުމަތް ފަށަން ނޫޅޭ ކަމަށް ބުނެ މަޖިލީހުގެ ޕީއެންސީގެ ޕީޖީ ލީޑަރ، އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވި ވާހަކަ އަށް ވެސް އެ މަނިކުފާނު ފާޑު ވިދާޅުވިއެވެ. ފަލާހު އަށް އެއްވެސް ކަމެއްގެ ހަގީގަތް އެނގިވަޑައިނުގަންނަވާ ކަމަށް އެ މަނިކުފާނު ވިދާޅުވިއެވެ.
ޕީއެންއެފްގެ ޖަލްސާގައި ވާހަކަދެއްކި ޓެކްސީ ޑްރައިވަރަކު ބުނީ މި ސަރުކާރު ވެރިކަަމަށް ގެނައުމަށް ޑްރައިވަރުން ވެސް ވަރަށް ބޮޑަށް މަސައްކަތް ކުރި ކަމަށެވެ. އަދި މީޓަރ ޓެކްސީ ފެށުމަށް ވެސް ވާހަކަ ދެކެވުނު ކަމަށާއި ސަރުކާރުން އެކަމުގައި ބަލަން ޖެހޭ ކަންކަން ބެލުމަށް މަސައްކަތް ކޮށްފައިވާ ކަމަށް އޭނާ ވަނީ ބުނެފައެވެ. އެހެންނަމަވެސް ފަހުން ސަރުކާރުން ބޭނުންވީ ޓެކްސީ ޚިދުމަތުގެ ތެރެއަށް ވަދެ ވިޔަފާރީގެ ކޮންޓްރޯލް ނަގަން ކަމަށް އޭނާ ވިދާޅުވިއެވެ.
މި ސަރުކާރުން ވަނީ ވައުދު އުވާލާ، ޑްރައިވަރުންގެ ކަންބޮޑުވުންތަކަށް ބެލުމެއް ނެތި ސަރުކާރުން ޓެކްސީ ހިދުމަތް ފެށުމަށް އެމްޓީސީސީއާ ހަވާލުކޮށްފައެވެ.
